| Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi |
२. सुलभसुत्तं
2. Sulabhasuttaṃ
१०१. वुत्तञ्हेतं भगवता, वुत्तमरहताति मे सुतं –
101. Vuttañhetaṃ bhagavatā, vuttamarahatāti me sutaṃ –
‘‘चत्तारिमानि, भिक्खवे, अप्पानि चेव सुलभानि च, तानि च अनवज्जानि। कतमानि चत्तारि? पंसुकूलं, भिक्खवे, चीवरानं अप्पञ्च सुलभञ्च, तञ्च अनवज्जं। पिण्डियालोपो , भिक्खवे, भोजनानं अप्पञ्च सुलभञ्च, तञ्च अनवज्जं। रुक्खमूलं, भिक्खवे , सेनासनानं अप्पञ्च सुलभञ्च, तञ्च अनवज्जं। पूतिमुत्तं, भिक्खवे, भेसज्जानं अप्पञ्च सुलभञ्च तञ्च अनवज्जं। इमानि खो, भिक्खवे, चत्तारि अप्पानि चेव सुलभानि च, तानि च अनवज्जानि। यतो खो, भिक्खवे, भिक्खु अप्पेन च तुट्ठो होति सुलभेन च (अनवज्जेन च) 1, इमस्साहं अञ्ञतरं सामञ्ञङ्गन्ति वदामी’’ति। एतमत्थं भगवा अवोच। तत्थेतं इति वुच्चति –
‘‘Cattārimāni, bhikkhave, appāni ceva sulabhāni ca, tāni ca anavajjāni. Katamāni cattāri? Paṃsukūlaṃ, bhikkhave, cīvarānaṃ appañca sulabhañca, tañca anavajjaṃ. Piṇḍiyālopo , bhikkhave, bhojanānaṃ appañca sulabhañca, tañca anavajjaṃ. Rukkhamūlaṃ, bhikkhave , senāsanānaṃ appañca sulabhañca, tañca anavajjaṃ. Pūtimuttaṃ, bhikkhave, bhesajjānaṃ appañca sulabhañca tañca anavajjaṃ. Imāni kho, bhikkhave, cattāri appāni ceva sulabhāni ca, tāni ca anavajjāni. Yato kho, bhikkhave, bhikkhu appena ca tuṭṭho hoti sulabhena ca (anavajjena ca) 2, imassāhaṃ aññataraṃ sāmaññaṅganti vadāmī’’ti. Etamatthaṃ bhagavā avoca. Tatthetaṃ iti vuccati –
‘‘अनवज्जेन तुट्ठस्स, अप्पेन सुलभेन च।
‘‘Anavajjena tuṭṭhassa, appena sulabhena ca;
न सेनासनमारब्भ, चीवरं पानभोजनं।
Na senāsanamārabbha, cīvaraṃ pānabhojanaṃ;
विघातो होति चित्तस्स, दिसा नप्पटिहञ्ञति॥
Vighāto hoti cittassa, disā nappaṭihaññati.
अधिग्गहिता तुट्ठस्स, अप्पमत्तस्स भिक्खुनो’’ति 5॥
Adhiggahitā tuṭṭhassa, appamattassa bhikkhuno’’ti 6.
अयम्पि अत्थो वुत्तो भगवता, इति मे सुतन्ति। दुतियं।
Ayampi attho vutto bhagavatā, iti me sutanti. Dutiyaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / २. सुलभसुत्तवण्णना • 2. Sulabhasuttavaṇṇanā
