| Library / Tipiṭaka / တိပိဋက • Tipiṭaka / ဣတိဝုတ္တကပာဠိ • Itivuttakapāḷi |
၅. သုက္ကဓမ္မသုတ္တံ
5. Sukkadhammasuttaṃ
၄၂. ဝုတ္တဉ္ဟေတံ ဘဂဝတာ, ဝုတ္တမရဟတာတိ မေ သုတံ –
42. Vuttañhetaṃ bhagavatā, vuttamarahatāti me sutaṃ –
‘‘ဒ္ဝေမေ, ဘိက္ခဝေ, သုက္ကာ ဓမ္မာ လောကံ ပာလေန္တိ။ ကတမေ ဒ္ဝေ? ဟိရီ 1 စ, ဩတ္တပ္ပဉ္စ။ ဣမေ စေ, ဘိက္ခဝေ, ဒ္ဝေ သုက္ကာ ဓမ္မာ လောကံ န ပာလေယ္ယုံ, နယိဓ ပညာယေထ မာတာတိ ဝာ မာတုစ္ဆာတိ ဝာ မာတုလာနီတိ ဝာ အာစရိယဘရိယာတိ ဝာ ဂရူနံ ဒာရာတိ ဝာ။ သမ္ဘေဒံ လောကော အဂမိသ္သ ယထာ အဇေဠကာ ကုက္ကုဋသူကရာ သောဏသိင္ဂာလာ 2။ ယသ္မာ စ ခော, ဘိက္ခဝေ, ဣမေ ဒ္ဝေ သုက္ကာ ဓမ္မာ လောကံ ပာလေန္တိ တသ္မာ ပညာယတိ မာတာတိ ဝာ မာတုစ္ဆာတိ ဝာ မာတုလာနီတိ ဝာ အာစရိယဘရိယာတိ ဝာ ဂရူနံ ဒာရာတိ ဝာ’’တိ။ ဧတမတ္ထံ ဘဂဝာ အဝောစ။ တတ္ထေတံ ဣတိ ဝုစ္စတိ –
‘‘Dveme, bhikkhave, sukkā dhammā lokaṃ pālenti. Katame dve? Hirī 3 ca, ottappañca. Ime ce, bhikkhave, dve sukkā dhammā lokaṃ na pāleyyuṃ, nayidha paññāyetha mātāti vā mātucchāti vā mātulānīti vā ācariyabhariyāti vā garūnaṃ dārāti vā. Sambhedaṃ loko agamissa yathā ajeḷakā kukkuṭasūkarā soṇasiṅgālā 4. Yasmā ca kho, bhikkhave, ime dve sukkā dhammā lokaṃ pālenti tasmā paññāyati mātāti vā mātucchāti vā mātulānīti vā ācariyabhariyāti vā garūnaṃ dārāti vā’’ti. Etamatthaṃ bhagavā avoca. Tatthetaṃ iti vuccati –
‘‘ယေသံ စေ ဟိရိဩတ္တပ္ပံ၊ သဗ္ဗဒာ စ န ဝိဇ္ဇတိ။
‘‘Yesaṃ ce hiriottappaṃ, sabbadā ca na vijjati;
ဝောက္ကန္တာ သုက္ကမူလာ တေ၊ ဇာတိမရဏဂာမိနော။
Vokkantā sukkamūlā te, jātimaraṇagāmino.
‘‘ယေသဉ္စ ဟိရိဩတ္တပ္ပံ၊ သဒာ သမ္မာ ဥပဋ္ဌိတာ။
‘‘Yesañca hiriottappaṃ, sadā sammā upaṭṭhitā;
ဝိရူဠ္ဟဗ္ရဟ္မစရိယာ တေ၊ သန္တော ခီဏပုနဗ္ဘဝာ’’တိ။
Virūḷhabrahmacariyā te, santo khīṇapunabbhavā’’ti.
အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ။ ပဉ္စမံ။
Ayampi attho vutto bhagavatā, iti me sutanti. Pañcamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ဣတိဝုတ္တက-အဋ္ဌကထာ • Itivuttaka-aṭṭhakathā / ၅. သုက္ကဓမ္မသုတ္တဝဏ္ဏနာ • 5. Sukkadhammasuttavaṇṇanā
