| Library / Tipiṭaka / തിപിടക • Tipiṭaka / മിലിന്ദപഞ്ഹപാളി • Milindapañhapāḷi |
൧൪. സുഖുമപഞ്ഹോ
14. Sukhumapañho
൧൪. രാജാ ആഹ ‘‘ഭന്തേ നാഗസേന, സക്കാ സബ്ബം സുഖുമം ഛിന്ദിതു’’ന്തി? ‘‘ആമ, മഹാരാജ, സക്കാ സബ്ബം സുഖുമം ഛിന്ദിതു’’ന്തി. ‘‘കിം പന, ഭന്തേ, സബ്ബം സുഖുമ’’ന്തി? ‘‘ധമ്മോ ഖോ, മഹാരാജ, സബ്ബസുഖുമോ, ന ഖോ, മഹാരാജ, ധമ്മാ സബ്ബേ സുഖുമാ, ‘സുഖുമ’ന്തി വാ ‘ഥൂല’ന്തി വാ ധമ്മാനമേതമധിവചനം. യം കിഞ്ചി ഛിന്ദിതബ്ബം, സബ്ബം തം പഞ്ഞായ ഛിന്ദതി, നത്ഥി ദുതിയം പഞ്ഞായ ഛേദന’’ന്തി.
14. Rājā āha ‘‘bhante nāgasena, sakkā sabbaṃ sukhumaṃ chinditu’’nti? ‘‘Āma, mahārāja, sakkā sabbaṃ sukhumaṃ chinditu’’nti. ‘‘Kiṃ pana, bhante, sabbaṃ sukhuma’’nti? ‘‘Dhammo kho, mahārāja, sabbasukhumo, na kho, mahārāja, dhammā sabbe sukhumā, ‘sukhuma’nti vā ‘thūla’nti vā dhammānametamadhivacanaṃ. Yaṃ kiñci chinditabbaṃ, sabbaṃ taṃ paññāya chindati, natthi dutiyaṃ paññāya chedana’’nti.
‘‘കല്ലോസി, ഭന്തേ നാഗസേനാ’’തി.
‘‘Kallosi, bhante nāgasenā’’ti.
സുഖുമപഞ്ഹോ ചുദ്ദസമോ.
Sukhumapañho cuddasamo.
