| Library / Tipiṭaka / තිපිටක • Tipiṭaka / ඉතිවුත්තකපාළි • Itivuttakapāḷi |
2. සුඛවිහාරසුත්තං
2. Sukhavihārasuttaṃ
29. වුත්තඤ්හෙතං භගවතා, වුත්තමරහතාති මෙ සුතං –
29. Vuttañhetaṃ bhagavatā, vuttamarahatāti me sutaṃ –
‘‘ද්වීහි, භික්ඛවෙ, ධම්මෙහි සමන්නාගතො භික්ඛු දිට්ඨෙව ධම්මෙ සුඛං විහරති අවිඝාතං අනුපායාසං අපරිළාහං; කායස්ස භෙදා පරං මරණා සුගති පාටිකඞ්ඛා . කතමෙහි ද්වීහි? ඉන්ද්රියෙසු ගුත්තද්වාරතාය ච, භොජනෙ මත්තඤ්ඤුතාය ච. ඉමෙහි ඛො, භික්ඛවෙ, ද්වීහි ධම්මෙහි සමන්නාගතො භික්ඛු දිට්ඨෙව ධම්මෙ සුඛං විහරති අවිඝාතං අනුපායාසං අපරිළාහං; කායස්ස භෙදා පරං මරණා සුගති පාටිකඞ්ඛා’’ති. එතමත්ථං භගවා අවොච. තත්ථෙතං ඉති වුච්චති –
‘‘Dvīhi, bhikkhave, dhammehi samannāgato bhikkhu diṭṭheva dhamme sukhaṃ viharati avighātaṃ anupāyāsaṃ apariḷāhaṃ; kāyassa bhedā paraṃ maraṇā sugati pāṭikaṅkhā . Katamehi dvīhi? Indriyesu guttadvāratāya ca, bhojane mattaññutāya ca. Imehi kho, bhikkhave, dvīhi dhammehi samannāgato bhikkhu diṭṭheva dhamme sukhaṃ viharati avighātaṃ anupāyāsaṃ apariḷāhaṃ; kāyassa bhedā paraṃ maraṇā sugati pāṭikaṅkhā’’ti. Etamatthaṃ bhagavā avoca. Tatthetaṃ iti vuccati –
‘‘චක්ඛු සොතඤ්ච ඝානඤ්ච, ජිව්හා කායො තථා 1 මනො;
‘‘Cakkhu sotañca ghānañca, jivhā kāyo tathā 2 mano;
එතානි යස්ස ද්වාරානි, සුගුත්තානිධ භික්ඛුනො.
Etāni yassa dvārāni, suguttānidha bhikkhuno.
‘‘භොජනම්හි ච මත්තඤ්ඤූ, ඉන්ද්රියෙසු ච සංවුතො;
‘‘Bhojanamhi ca mattaññū, indriyesu ca saṃvuto;
කායසුඛං චෙතොසුඛං, සුඛං සො අධිගච්ඡති.
Kāyasukhaṃ cetosukhaṃ, sukhaṃ so adhigacchati.
‘‘අඩය්හමානෙන කායෙන, අඩය්හමානෙන චෙතසා;
‘‘Aḍayhamānena kāyena, aḍayhamānena cetasā;
දිවා වා යදි වා රත්තිං, සුඛං විහරති තාදිසො’’ති.
Divā vā yadi vā rattiṃ, sukhaṃ viharati tādiso’’ti.
අයම්පි අත්ථො වුත්තො භගවතා, ඉති මෙ සුතන්ති. දුතියං.
Ayampi attho vutto bhagavatā, iti me sutanti. Dutiyaṃ.
Footnotes:
Related texts:
අට්ඨකථා • Aṭṭhakathā / සුත්තපිටක (අට්ඨකථා) • Suttapiṭaka (aṭṭhakathā) / ඛුද්දකනිකාය (අට්ඨකථා) • Khuddakanikāya (aṭṭhakathā) / ඉතිවුත්තක-අට්ඨකථා • Itivuttaka-aṭṭhakathā / 2. සුඛවිහාරසුත්තවණ්ණනා • 2. Sukhavihārasuttavaṇṇanā
