| Library / Tipiṭaka / તિપિટક • Tipiṭaka / અઙ્ગુત્તરનિકાય (ટીકા) • Aṅguttaranikāya (ṭīkā) |
(૭) ૨. સુખવગ્ગવણ્ણના
(7) 2. Sukhavaggavaṇṇanā
૬૫. દુતિયસ્સ પઠમે સબ્બકામનિપ્ફત્તિમૂલકં સુખન્તિ અનવસેસઉપભોગપરિભોગવત્થુનિપ્ફત્તિહેતુકં કામસુખં. પબ્બજ્જામૂલકં સુખન્તિ પબ્બજ્જાહેતુકં પવિવેકસુખં.
65. Dutiyassa paṭhame sabbakāmanipphattimūlakaṃ sukhanti anavasesaupabhogaparibhogavatthunipphattihetukaṃ kāmasukhaṃ. Pabbajjāmūlakaṃ sukhanti pabbajjāhetukaṃ pavivekasukhaṃ.
૬૬. દુતિયે કામેતિ પઞ્ચ કામગુણે, સબ્બેપિ વા તેભૂમકે ધમ્મે. વુત્તઞ્હેતં ‘‘સબ્બેપિ તેભૂમકા ધમ્મા કમનીયટ્ઠેન કામા’’તિ (મહાનિ॰ ૧). નેક્ખમ્મં વુચ્ચતિ પબ્બજ્જા ઘરબન્ધનતો નિક્ખન્તત્તા. નિબ્બાનમેવ વા –
66. Dutiye kāmeti pañca kāmaguṇe, sabbepi vā tebhūmake dhamme. Vuttañhetaṃ ‘‘sabbepi tebhūmakā dhammā kamanīyaṭṭhena kāmā’’ti (mahāni. 1). Nekkhammaṃ vuccati pabbajjā gharabandhanato nikkhantattā. Nibbānameva vā –
‘‘પબ્બજ્જા પઠમં ઝાનં, નિબ્બાનઞ્ચ વિપસ્સના;
‘‘Pabbajjā paṭhamaṃ jhānaṃ, nibbānañca vipassanā;
સબ્બેપિ કુસલા ધમ્મા, નેક્ખમ્મન્તિ પવુચ્ચરે’’તિ. (ઇતિવુ॰ અટ્ઠ॰ ૧૦૯) –
Sabbepi kusalā dhammā, nekkhammanti pavuccare’’ti. (itivu. aṭṭha. 109) –
હિ વુત્તં.
Hi vuttaṃ.
૬૭. તતિયે ઉપધી વુચ્ચન્તિ પઞ્ચુપાદાનક્ખન્ધા, તન્નિસ્સિતં સુખં ઉપધિસુખં. તપ્પટિપક્ખતો નિરુપધિસુખં લોકુત્તરસુખં.
67. Tatiye upadhī vuccanti pañcupādānakkhandhā, tannissitaṃ sukhaṃ upadhisukhaṃ. Tappaṭipakkhato nirupadhisukhaṃ lokuttarasukhaṃ.
૬૮. ચતુત્થે વટ્ટપરિયાપન્નં સુખં વટ્ટસુખં. નિબ્બાનારમ્મણં સુખં વિવટ્ટસુખં.
68. Catutthe vaṭṭapariyāpannaṃ sukhaṃ vaṭṭasukhaṃ. Nibbānārammaṇaṃ sukhaṃ vivaṭṭasukhaṃ.
૬૯. પઞ્ચમે સંકિલેસન્તિ સંકિલિટ્ઠં. તેનાહ ‘‘વટ્ટગામિસુખ’’ન્તિ. વિવટ્ટસુખન્તિ મગ્ગફલસહગતં સુખં.
69. Pañcame saṃkilesanti saṃkiliṭṭhaṃ. Tenāha ‘‘vaṭṭagāmisukha’’nti. Vivaṭṭasukhanti maggaphalasahagataṃ sukhaṃ.
૭૦. છટ્ઠે અરિયાનમેવ સુખં અરિયસુખં, અરિયઞ્ચ તં સુખઞ્ચાતિપિ અરિયસુખં. અનરિયાનમેવ સુખં અનરિયસુખં. અનરિયઞ્ચ તં સુખઞ્ચાતિપિ અનરિયસુખં.
70. Chaṭṭhe ariyānameva sukhaṃ ariyasukhaṃ, ariyañca taṃ sukhañcātipi ariyasukhaṃ. Anariyānameva sukhaṃ anariyasukhaṃ. Anariyañca taṃ sukhañcātipi anariyasukhaṃ.
૭૧. સત્તમે તન્તિ ચેતસિકસુખં.
71. Sattame tanti cetasikasukhaṃ.
૭૨. અટ્ઠમે સહ પીતિયા વત્તતીતિ સપ્પીતિકં, પીતિસહગતં સુખં. સભાવતો વિરાગતો ચ નત્થિ એતસ્સ પીતીતિ નિપ્પીતિકં સુખં. અટ્ઠકથાયં પનેત્થ ઝાનસુખમેવ ઉદ્ધટં, તથા ચ ‘‘લોકિયસપ્પીતિકસુખતો લોકિયનિપ્પીતિકસુખં અગ્ગ’’ન્તિ વુત્તં. લોકિયનિપ્પીતિકમ્પિ હિ અગ્ગં લબ્ભતેવાતિ ભૂમન્તરં ભિન્દિત્વા અગ્ગભાવો વેદિતબ્બો.
72. Aṭṭhame saha pītiyā vattatīti sappītikaṃ, pītisahagataṃ sukhaṃ. Sabhāvato virāgato ca natthi etassa pītīti nippītikaṃ sukhaṃ. Aṭṭhakathāyaṃ panettha jhānasukhameva uddhaṭaṃ, tathā ca ‘‘lokiyasappītikasukhato lokiyanippītikasukhaṃ agga’’nti vuttaṃ. Lokiyanippītikampi hi aggaṃ labbhatevāti bhūmantaraṃ bhinditvā aggabhāvo veditabbo.
૭૩. નવમે સાતસભાવમેવ સુખં સાતસુખં, ન ઉપેક્ખાસુખં વિય અસાતસભાવં. કામઞ્ચેત્થ કાયવિઞ્ઞાણસહગતમ્પિ સાતસુખમેવ, અટ્ઠકથાયં પન ‘‘તીસુ ઝાનેસુ સુખ’’ન્તેવ વુત્તં.
73. Navame sātasabhāvameva sukhaṃ sātasukhaṃ, na upekkhāsukhaṃ viya asātasabhāvaṃ. Kāmañcettha kāyaviññāṇasahagatampi sātasukhameva, aṭṭhakathāyaṃ pana ‘‘tīsu jhānesu sukha’’nteva vuttaṃ.
૭૪. દસમે સમાધિસમ્પયુત્તં સુખં સમાધિસુખં. ન સમાધિસમ્પયુત્તં સુખં અસમાધિસુખં.
74. Dasame samādhisampayuttaṃ sukhaṃ samādhisukhaṃ. Na samādhisampayuttaṃ sukhaṃ asamādhisukhaṃ.
૭૫. એકાદસમે સુત્તન્તકથા એસાતિ ‘‘સપ્પીતિકં ઝાનદ્વય’’ન્તિ વુત્તં.
75. Ekādasame suttantakathā esāti ‘‘sappītikaṃ jhānadvaya’’nti vuttaṃ.
૭૭. તેરસમે રૂપજ્ઝાનં રૂપં ઉત્તરપદલોપેન, તં આરમ્મણં એતસ્સાતિ રૂપારમ્મણં. ચતુત્થજ્ઝાનગ્ગહણં પન યદસ્સ પટિયોગી, તેન સમાનયોગક્ખમદસ્સનપરં. યં કિઞ્ચિ રૂપન્તિ યં કિઞ્ચિ રુપ્પનલક્ખણં રૂપં. તપ્પટિક્ખેપેન અરૂપં વેદિતબ્બં.
77. Terasame rūpajjhānaṃ rūpaṃ uttarapadalopena, taṃ ārammaṇaṃ etassāti rūpārammaṇaṃ. Catutthajjhānaggahaṇaṃ pana yadassa paṭiyogī, tena samānayogakkhamadassanaparaṃ. Yaṃ kiñci rūpanti yaṃ kiñci ruppanalakkhaṇaṃ rūpaṃ. Tappaṭikkhepena arūpaṃ veditabbaṃ.
સુખવગ્ગવણ્ણના નિટ્ઠિતા.
Sukhavaggavaṇṇanā niṭṭhitā.
Related texts:
તિપિટક (મૂલ) • Tipiṭaka (Mūla) / સુત્તપિટક • Suttapiṭaka / અઙ્ગુત્તરનિકાય • Aṅguttaranikāya / (૭) ૨. સુખવગ્ગો • (7) 2. Sukhavaggo
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / અઙ્ગુત્તરનિકાય (અટ્ઠકથા) • Aṅguttaranikāya (aṭṭhakathā) / (૭) ૨. સુખવગ્ગવણ્ણના • (7) 2. Sukhavaggavaṇṇanā
