| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
២. សុខសុត្តវណ្ណនា
2. Sukhasuttavaṇṇanā
២៥០. ទុក្ខំ ន ហោតីតិ អទុក្ខំ, សុខំ ន ហោតីតិ អសុខំ, ម-ការោ បទសន្ធិករោ។ អទុក្ខមសុខន្តិ វេទយិតសទ្ទាបេក្ខាយ នបុំសកនិទ្ទេសោ។ សបរសន្តានគតេ សន្ធាយ អជ្ឈត្តពហិទ្ធាគហណន្តិ អាហ ‘‘អត្តនោ ច បរស្ស ចា’’តិ។ តេន សព្ពម្បិ វេទយិតំ គហិតន្តិ ទដ្ឋព្ពំ ។ នស្សនសភាវន្តិ ឥត្តរខណតាយ ភង្គតោ ឧទ្ធំ អបស្សិតព្ពសភាវំ។ បលោកោ ភេទោ ឯតស្ស អត្ថីតិ បលោកិនំ។ តេនាហ ‘‘ភិជ្ជនសភាវ’’ន្តិ។ ញាណេន ផុសិត្វា ផុសិត្វាតិ បុព្ពភាគេ វិបស្សនាញាណេន អនិច្ចា បភង្គុនោតិ អារម្មណតោ, ឧត្តរកាលំ អសម្មោហតោ មគ្គបរម្បរាយ ផុសិត្វា ផុសិត្វា វយំ បស្សន្តោ។ វិរជ្ជតីតិ មគ្គវិរាគេន វិរជ្ជតិ។ សម្មសនចារវេទនា កថិតា អារទ្ធវិបស្សកានំ វសេន ទេសនាតិ។ លោកិយលោកុត្តរេហិ ញាណេហិ យាថាវតោ បរិជាននំ បដិវិជ្ឈនំ ញាណផុសនំ។
250. Dukkhaṃ na hotīti adukkhaṃ, sukhaṃ na hotīti asukhaṃ, ma-kāro padasandhikaro. Adukkhamasukhanti vedayitasaddāpekkhāya napuṃsakaniddeso. Saparasantānagate sandhāya ajjhattabahiddhāgahaṇanti āha ‘‘attano ca parassa cā’’ti. Tena sabbampi vedayitaṃ gahitanti daṭṭhabbaṃ . Nassanasabhāvanti ittarakhaṇatāya bhaṅgato uddhaṃ apassitabbasabhāvaṃ. Paloko bhedo etassa atthīti palokinaṃ. Tenāha ‘‘bhijjanasabhāva’’nti. Ñāṇena phusitvā phusitvāti pubbabhāge vipassanāñāṇena aniccā pabhaṅgunoti ārammaṇato, uttarakālaṃ asammohato maggaparamparāya phusitvā phusitvā vayaṃ passanto. Virajjatīti maggavirāgena virajjati. Sammasanacāravedanā kathitā āraddhavipassakānaṃ vasena desanāti. Lokiyalokuttarehi ñāṇehi yāthāvato parijānanaṃ paṭivijjhanaṃ ñāṇaphusanaṃ.
សុខសុត្តវណ្ណនា និដ្ឋិតា។
Sukhasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ២. សុខសុត្តំ • 2. Sukhasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ២. សុខសុត្តវណ្ណនា • 2. Sukhasuttavaṇṇanā
