| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
५. सुजातसुत्तं
5. Sujātasuttaṃ
२३९. सावत्थियं विहरति। अथ खो आयस्मा सुजातो येन भगवा तेनुपसङ्कमि। अद्दसा खो भगवा आयस्मन्तं सुजातं दूरतोव आगच्छन्तं। दिस्वान भिक्खू आमन्तेसि – ‘‘उभयेनेवायं, भिक्खवे, कुलपुत्तो सोभति – यञ्च अभिरूपो दस्सनीयो पासादिको परमाय वण्णपोक्खरताय समन्नागतो, यस्स चत्थाय कुलपुत्ता सम्मदेव अगारस्मा अनगारियं पब्बज्जन्ति तदनुत्तरं ब्रह्मचरियपरियोसानं दिट्ठेव धम्मे सयं अभिञ्ञा सच्छिकत्वा उपसम्पज्ज विहरती’’ति। इदमवोच भगवा…पे॰… सत्था –
239. Sāvatthiyaṃ viharati. Atha kho āyasmā sujāto yena bhagavā tenupasaṅkami. Addasā kho bhagavā āyasmantaṃ sujātaṃ dūratova āgacchantaṃ. Disvāna bhikkhū āmantesi – ‘‘ubhayenevāyaṃ, bhikkhave, kulaputto sobhati – yañca abhirūpo dassanīyo pāsādiko paramāya vaṇṇapokkharatāya samannāgato, yassa catthāya kulaputtā sammadeva agārasmā anagāriyaṃ pabbajjanti tadanuttaraṃ brahmacariyapariyosānaṃ diṭṭheva dhamme sayaṃ abhiññā sacchikatvā upasampajja viharatī’’ti. Idamavoca bhagavā…pe… satthā –
‘‘सोभति वतायं भिक्खु, उजुभूतेन चेतसा।
‘‘Sobhati vatāyaṃ bhikkhu, ujubhūtena cetasā;
विप्पयुत्तो विसंयुत्तो, अनुपादाय निब्बुतो।
Vippayutto visaṃyutto, anupādāya nibbuto;
धारेति अन्तिमं देहं, जेत्वा मारं सवाहिनि’’न्ति॥ पञ्चमं।
Dhāreti antimaṃ dehaṃ, jetvā māraṃ savāhini’’nti. pañcamaṃ;
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ५. सुजातसुत्तवण्णना • 5. Sujātasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ५. सुजातसुत्तवण्णना • 5. Sujātasuttavaṇṇanā
