10. Sugandhattheraapadānaṃ

81.

‘‘Imamhi bhaddake kappe, brahmabandhu mahāyaso;

Kassapo nāma gottena ², uppajji vadataṃ varo.

82.

‘‘Anubyañjanasampanno, bāttiṃsavaralakkhaṇo;

Byāmappabhāparivuto, raṃsijālasamotthaṭo ⁴.

83.

‘‘Assāsetā yathā cando, sūriyova pabhaṅkaro;

Nibbāpetā yathā megho, sāgarova guṇākaro.

84.

‘‘Dharaṇīriva sīlena, himavāva samādhinā;

Ākāso viya paññāya, asaṅgo anilo yathā.

85.

‘‘Sa kadāci mahāvīro, parisāsu visārado;

Saccāni sampakāseti, uddharanto mahājanaṃ.

86.

‘‘Tadā hi bārāṇasiyaṃ, seṭṭhiputto mahāyaso;

Āsahaṃ dhanadhaññassa ⁶, pahūtassa bahū tadā.

87.

‘‘Jaṅghāvihāraṃ vicaraṃ, migadāyamupeccahaṃ ⁸;

Addasaṃ virajaṃ buddhaṃ, desentaṃ amataṃ padaṃ.

88.

‘‘Visaṭṭhakantavacanaṃ , karavīkasamassaraṃ;

Haṃsarutehi ¹⁰ nigghosaṃ, viññāpentaṃ mahājanaṃ.

89.

‘‘Disvā devātidevaṃ taṃ, sutvāva madhuraṃ giraṃ;

Pahāyanappake bhoge, pabbajiṃ anagāriyaṃ.

90.

‘‘Evaṃ pabbajito cāhaṃ, na cirena bahussuto;

Ahosiṃ dhammakathiko, vicittapaṭibhāṇavā.

91.

‘‘Mahāparisamajjhehaṃ, haṭṭhacitto punappunaṃ;

Vaṇṇayiṃ hemavaṇṇassa, vaṇṇaṃ vaṇṇavisārado.

92.

‘‘Esa khīṇāsavo buddho, anīgho chinnasaṃsayo;

Sabbakammakkhayaṃ patto, vimuttopadhisaṅkhaye.

93.

‘‘Esa so bhagavā buddho, esa sīho anuttaro;

Sadevakassa lokassa, brahmacakkappavattako.

94.

‘‘Danto dametā santo ca, sametā nibbuto isi;

Nibbāpetā ca assattho, assāsetā mahājanaṃ.

95.

‘‘Vīro sūro ca vikkanto ¹², pañño kāruṇiko vasī;

Vijitāvī ca sa jino, appagabbo anālayo.

96.

‘‘Aneñjo acalo dhīmā, amoho asamo muni;

Dhorayho usabho nāgo, sīho sakko garūsupi.

97.

‘‘Virāgo vimalo brahmā, vādī sūro raṇañjaho;

Akhilo ca visallo ca, asamo saṃyato ¹⁴ suci.

98.

‘‘Brāhmaṇo samaṇo nātho, bhisakko sallakattako;

Yodho buddho sutāsuto ¹⁷, acalo mudito sito ¹⁸.

99.

‘‘Dhātā dhatā ca santi ca, kattā netā pakāsitā;

Sampahaṃsitā bhettā ca, chettā sotā pasaṃsitā.

100.

‘‘Akhilo ca visallo ca, anīgho akathaṃkathī;

Anejo virajo kattā, gandhā vattā pasaṃsitā.

101.

‘‘Tāretā atthakāretā, kāretā sampadāritā;

Pāpetā sahitā kantā, hantā ātāpī tāpaso ²⁰.

102.

‘‘Samacitto ²³ samasamo, asahāyo dayālayo ²⁴;

Accherasatto ²⁶ akuho, katāvī isisattamo.

103.

‘‘Nittiṇṇakaṅkho nimmāno, appameyyo anūpamo;

Sabbavākyapathātīto, sacca neyyantagū ²⁸ jino.

104.

‘‘Sattasāravare ³⁰ tasmiṃ, pasādo amatāvaho;

Tasmā buddhe ca dhamme ca, saṅghe saddhā mahatthikā ³².

105.

‘‘Guṇehi evamādīhi, tilokasaraṇuttamaṃ;

Vaṇṇento parisāmajjhe, akaṃ ³⁴ dhammakathaṃ ahaṃ.

106.

‘‘Tato cutāhaṃ tusite, anubhotvā mahāsukhaṃ;

Tato cuto manussesu, jāto homi sugandhiko.

107.

‘‘Nissāso mukhagandho ca, dehagandho tatheva me;

Sedagandho ca satataṃ, sabbagandhova hoti me ³⁶.

108.

‘‘Mukhagandho sadā mayhaṃ, padumuppalacampako;

Parisanto ³⁸ sadā vāti, sarīro ca tatheva me.

109.

‘‘Guṇatthavassa sabbantaṃ, phalaṃ tu ⁴⁰ paramabbhutaṃ;

Ekaggamanasā sabbe, vaṇṇayissaṃ ⁴² suṇātha me.

110.

‘‘Guṇaṃ buddhassa vatvāna, hitāya ca na sadisaṃ ⁴⁴;

Sukhito ⁴⁷ homi sabbattha, saṅgho vīrasamāyuto ⁴⁸.

111.

‘‘Yasassī sukhito kanto, jutimā piyadassano;

Vattā aparibhūto ca, niddoso paññavā tathā.

112.

‘‘Khīṇe āyusi ⁵⁰ nibbānaṃ, sulabhaṃ buddhabhattino;

Tesaṃ hetuṃ pavakkhāmi, taṃ suṇātha yathātathaṃ.

113.

‘‘Santaṃ yasaṃ bhagavato, vidhinā abhivādayaṃ;

Tattha tatthūpapannopi ⁵², yasassī tena homahaṃ.

114.

‘‘Dukkhassantakaraṃ buddhaṃ, dhammaṃ santamasaṅkhataṃ;

Vaṇṇayaṃ sukhado āsiṃ, sattānaṃ sukhito tato.

115.

‘‘Guṇaṃ vadanto buddhassa, buddhapītisamāyuto;

Sakantiṃ parakantiñca, janayiṃ tena kantimā.

116.

‘‘Jino te titthikākiṇṇe ⁵⁴, abhibhuyya kutitthiye;

Guṇaṃ vadanto jotesiṃ ⁵⁶, nāyakaṃ jutimā tato.

117.

‘‘Piyakārī janassāpi, sambuddhassa guṇaṃ vadaṃ;

Saradova sasaṅkohaṃ, tenāsiṃ piyadassano.

118.

‘‘Yathāsattivasenāhaṃ , sabbavācāhi santhaviṃ;

Sugataṃ tena vāgiso, vicittapaṭibhānavā.

119.

‘‘Ye bālā vimatiṃ pattā, paribhonti mahāmuniṃ;

Niggahiṃ te saddhammena, paribhūto na tenahaṃ ⁵⁸.

120.

‘‘Buddhavaṇṇena sattānaṃ, kilese apanesahaṃ;

Nikkilesamano homi, tassa kammassa vāhasā.

121.

‘‘Sotūnaṃ vuddhimajaniṃ ⁶⁰, buddhānussatidesako;

Tenāhamāsiṃ ⁶² sappañño, nipuṇatthavipassako.

122.

‘‘Sabbāsavaparikkhīṇo, tiṇṇasaṃsārasāgaro;

Sikhīva anupādāno, pāpuṇissāmi nibbutiṃ.

123.

‘‘Imasmiṃyeva kappasmiṃ, yamahaṃ santhaviṃ jinaṃ;

Duggatiṃ nābhijānāmi, buddhavaṇṇassidaṃ phalaṃ.

124.

‘‘Kilesā jhāpitā mayhaṃ…pe… viharāmi anāsavo.

125.

‘‘Svāgataṃ vata me āsi…pe… kataṃ buddhassa sāsanaṃ.

126.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sugandho thero imā gāthāyo

Abhāsitthāti.

Sugandhattherassāpadānaṃ dasamaṃ.

Tiṇadāyakavaggo tepaññāsamo.

Tassuddānaṃ –

Tiṇado mañcado ceva, saraṇabbhañjanappado;

Supaṭo daṇḍadāyī ca, nelapūjī tatheva ca.

Bodhisammajjako maṇḍo, sugandho dasamoti ca;

Gāthāsataṃ satevīsaṃ, gaṇitañcettha sabbaso.