| Library / Tipiṭaka / តិបិដក • Tipiṭaka / ខុទ្ទសិក្ខា-មូលសិក្ខា • Khuddasikkhā-mūlasikkhā |
៤៧. សុទ្ធិនិទ្ទេសោ
47. Suddhiniddeso
សុទ្ធីតិ –
Suddhīti –
៤៥៥.
455.
ទេសនា សំវរោ ឯដ្ឋិបច្ចវេក្ខណ ភេទតោ;
Desanā saṃvaro eṭṭhipaccavekkhaṇa bhedato;
សុទ្ធី ចតុព្ពិធា បាតិមោក្ខសំវរសម្មតំ;
Suddhī catubbidhā pātimokkhasaṃvarasammataṃ;
ទេសនាយ វិសុទ្ធត្តា, ទេសនាសុទ្ធិ វុច្ចតិ។
Desanāya visuddhattā, desanāsuddhi vuccati.
៤៥៦.
456.
‘‘ន បុនេវំ ករិស្ស’’ន្តិ, ចិត្តាធិដ្ឋានសំវរា;
‘‘Na punevaṃ karissa’’nti, cittādhiṭṭhānasaṃvarā;
វុត្តោ សំវរសុទ្ធីតិ, សុជ្ឈតិន្ទ្រិយសំវរោ។
Vutto saṃvarasuddhīti, sujjhatindriyasaṃvaro.
៤៥៧.
457.
បហាយានេសនំ ធម្មេនុប្បាទេន្តស្ស ឯដ្ឋិយា;
Pahāyānesanaṃ dhammenuppādentassa eṭṭhiyā;
សុទ្ធត្តា ឯដ្ឋិសុទ្ធីតិ, វុត្តមាជីវនិស្សិតំ។
Suddhattā eṭṭhisuddhīti, vuttamājīvanissitaṃ.
៤៥៨.
458.
យោនិសោ បដិសង្ខាយ, ចីវរំ បដិសេវតិ;
Yoniso paṭisaṅkhāya, cīvaraṃ paṭisevati;
ឯវមាទិយថាវុត្ត-បច្ចវេក្ខណសុជ្ឈនា;
Evamādiyathāvutta-paccavekkhaṇasujjhanā;
បច្ចវេក្ខណសុទ្ធីតិ, វុត្តំ បច្ចយនិស្សិតន្តិ។
Paccavekkhaṇasuddhīti, vuttaṃ paccayanissitanti.
