| Library / Tipiṭaka / तिपिटक • Tipiṭaka / खुद्दसिक्खा-मूलसिक्खा • Khuddasikkhā-mūlasikkhā |
४७. सुद्धिनिद्देसो
47. Suddhiniddeso
सुद्धीति –
Suddhīti –
४५५.
455.
देसना संवरो एट्ठिपच्चवेक्खण भेदतो।
Desanā saṃvaro eṭṭhipaccavekkhaṇa bhedato;
सुद्धी चतुब्बिधा पातिमोक्खसंवरसम्मतं।
Suddhī catubbidhā pātimokkhasaṃvarasammataṃ;
देसनाय विसुद्धत्ता, देसनासुद्धि वुच्चति॥
Desanāya visuddhattā, desanāsuddhi vuccati.
४५६.
456.
‘‘न पुनेवं करिस्स’’न्ति, चित्ताधिट्ठानसंवरा।
‘‘Na punevaṃ karissa’’nti, cittādhiṭṭhānasaṃvarā;
वुत्तो संवरसुद्धीति, सुज्झतिन्द्रियसंवरो॥
Vutto saṃvarasuddhīti, sujjhatindriyasaṃvaro.
४५७.
457.
पहायानेसनं धम्मेनुप्पादेन्तस्स एट्ठिया।
Pahāyānesanaṃ dhammenuppādentassa eṭṭhiyā;
सुद्धत्ता एट्ठिसुद्धीति, वुत्तमाजीवनिस्सितं॥
Suddhattā eṭṭhisuddhīti, vuttamājīvanissitaṃ.
४५८.
458.
योनिसो पटिसङ्खाय, चीवरं पटिसेवति।
Yoniso paṭisaṅkhāya, cīvaraṃ paṭisevati;
एवमादियथावुत्त-पच्चवेक्खणसुज्झना।
Evamādiyathāvutta-paccavekkhaṇasujjhanā;
पच्चवेक्खणसुद्धीति, वुत्तं पच्चयनिस्सितन्ति॥
Paccavekkhaṇasuddhīti, vuttaṃ paccayanissitanti.
