| Library / Tipiṭaka / តិបិដក • Tipiṭaka / ខុទ្ទសិក្ខា-មូលសិក្ខា • Khuddasikkhā-mūlasikkhā |
៤៧. សុទ្ធិនិទ្ទេសវណ្ណនា
47. Suddhiniddesavaṇṇanā
៤៥៥. ទេសនា សំវរោ ឯដ្ឋិ, បច្ចវេក្ខណ ភេទតោតិ (បារា. អដ្ឋ. ២.៥៨៥; វិសុទ្ធិ. ១.១៩) ទេសនាសុទ្ធិ សំវរសុទ្ធិ បរិយេដ្ឋិសុទ្ធិ បច្ចវេក្ខណសុទ្ធីតិ ឯវំ ចតុព្ពិធា សុទ្ធីតិ អត្ថោ។ ឥទានិ តាហិ សុទ្ធីហិ វិសុជ្ឈនកេ ទស្សេតុំ ‘‘បាតិមោក្ខសំវរសម្មត’’ន្តិអាទិមាហ។
455.Desanāsaṃvaro eṭṭhi, paccavekkhaṇa bhedatoti (pārā. aṭṭha. 2.585; visuddhi. 1.19) desanāsuddhi saṃvarasuddhi pariyeṭṭhisuddhi paccavekkhaṇasuddhīti evaṃ catubbidhā suddhīti attho. Idāni tāhi suddhīhi visujjhanake dassetuṃ ‘‘pātimokkhasaṃvarasammata’’ntiādimāha.
៤៥៦. ‘‘បុន ឯវំ ន ករិស្ស’’ន្តិ ចិត្តាធិដ្ឋានសំវរា យស្មា សុជ្ឈតិ ឥន្ទ្រិយសំវរោ, តស្មា ឥន្ទ្រិយសំវរោ ‘‘សំវរសុទ្ធី’’តិ វុត្តោតិ សម្ពន្ធោ។
456. ‘‘Puna evaṃ na karissa’’nti cittādhiṭṭhānasaṃvarā yasmā sujjhati indriyasaṃvaro, tasmā indriyasaṃvaro ‘‘saṃvarasuddhī’’ti vuttoti sambandho.
៤៥៧. បហាយានេសនន្តិ អនេសនំ បហាយ ធម្មេន ឧប្បាទេន្តស្ស បច្ចយេតិ បាឋសេសោ។
457.Pahāyānesananti anesanaṃ pahāya dhammena uppādentassa paccayeti pāṭhaseso.
៤៥៨. ‘‘បដិសង្ខា យោនិសោ ចីវរំ បដិសេវាមិ…បេ.… ឧប្បន្នានំ វេយ្យាពាធិកានំ…បេ.… បរមតាយា’’តិ (ម. និ. ១.២៣; អ. និ. ៦.៥៨) ច ឯវំ ចតូសុបិ បច្ចយេសុ យថាវុត្តបច្ចវេក្ខណសុជ្ឈនាតិ អត្ថោ។ ឯត្ថ បន ទុវិធំ បច្ចវេក្ខណំ បដិលាភកាលេ ច បរិភោគកាលេ ច។ បដិលាភកាលេ ហិ ធាតុវសេន វា បដិក្កូលវសេន វា បច្ចវេក្ខិត្វា ឋបិតចីវរាទីនិ តតោ ឧត្តរិ បរិភុញ្ជន្តស្ស អនវជ្ជោវ បរិភោគោ, បរិភោគកាលេបិ។ សុទ្ធិវិនិច្ឆយោ។
458. ‘‘Paṭisaṅkhā yoniso cīvaraṃ paṭisevāmi…pe… uppannānaṃ veyyābādhikānaṃ…pe… paramatāyā’’ti (ma. ni. 1.23; a. ni. 6.58) ca evaṃ catūsupi paccayesu yathāvuttapaccavekkhaṇasujjhanāti attho. Ettha pana duvidhaṃ paccavekkhaṇaṃ paṭilābhakāle ca paribhogakāle ca. Paṭilābhakāle hi dhātuvasena vā paṭikkūlavasena vā paccavekkhitvā ṭhapitacīvarādīni tato uttari paribhuñjantassa anavajjova paribhogo, paribhogakālepi. Suddhivinicchayo.
សុទ្ធិនិទ្ទេសវណ្ណនា និដ្ឋិតា។
Suddhiniddesavaṇṇanā niṭṭhitā.
