| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
७. सुद्धिकसुत्तं
7. Suddhikasuttaṃ
१९३. सावत्थिनिदानं । अथ खो सुद्धिकभारद्वाजो ब्राह्मणो येन भगवा तेनुपसङ्कमि; उपसङ्कमित्वा भगवता सद्धिं सम्मोदि। सम्मोदनीयं कथं सारणीयं वीतिसारेत्वा एकमन्तं निसीदि। एकमन्तं निसिन्नो खो सुद्धिकभारद्वाजो ब्राह्मणो भगवतो सन्तिके इमं गाथं अज्झभासि –
193. Sāvatthinidānaṃ . Atha kho suddhikabhāradvājo brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho suddhikabhāradvājo brāhmaṇo bhagavato santike imaṃ gāthaṃ ajjhabhāsi –
‘‘न ब्राह्मणो 1 सुज्झति कोचि, लोके सीलवापि तपोकरं।
‘‘Na brāhmaṇo 2 sujjhati koci, loke sīlavāpi tapokaraṃ;
विज्जाचरणसम्पन्नो, सो सुज्झति न अञ्ञा इतरा पजा’’ति॥
Vijjācaraṇasampanno, so sujjhati na aññā itarā pajā’’ti.
‘‘बहुम्पि पलपं जप्पं, न जच्चा होति ब्राह्मणो।
‘‘Bahumpi palapaṃ jappaṃ, na jaccā hoti brāhmaṇo;
अन्तोकसम्बु सङ्किलिट्ठो, कुहनं उपनिस्सितो॥
Antokasambu saṅkiliṭṭho, kuhanaṃ upanissito.
‘‘खत्तियो ब्राह्मणो वेस्सो, सुद्दो चण्डालपुक्कुसो।
‘‘Khattiyo brāhmaṇo vesso, suddo caṇḍālapukkuso;
आरद्धवीरियो पहितत्तो, निच्चं दळ्हपरक्कमो।
Āraddhavīriyo pahitatto, niccaṃ daḷhaparakkamo;
पप्पोति परमं सुद्धिं, एवं जानाहि ब्राह्मणा’’ति॥
Pappoti paramaṃ suddhiṃ, evaṃ jānāhi brāhmaṇā’’ti.
एवं वुत्ते, सुद्धिकभारद्वाजो ब्राह्मणो भगवन्तं एतदवोच – ‘‘अभिक्कन्तं, भो गोतम…पे॰… अञ्ञतरो च पनायस्मा भारद्वाजो अरहतं अहोसी’’ति।
Evaṃ vutte, suddhikabhāradvājo brāhmaṇo bhagavantaṃ etadavoca – ‘‘abhikkantaṃ, bho gotama…pe… aññataro ca panāyasmā bhāradvājo arahataṃ ahosī’’ti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ७. सुद्धिकसुत्तवण्णना • 7. Suddhikasuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ७. सुद्धिकसुत्तवण्णना • 7. Suddhikasuttavaṇṇanā
