| Library / Tipiṭaka / तिपिटक • Tipiṭaka / पटिसम्भिदामग्ग-अट्ठकथा • Paṭisambhidāmagga-aṭṭhakathā |
६४-६७. सुद्धिकपटिसम्भिदाञाणनिद्देसवण्णना
64-67. Suddhikapaṭisambhidāñāṇaniddesavaṇṇanā
११०. सुद्धिकपटिसम्भिदाञाणनिद्देसे इमेसं ञाणानं पभेदाभावतोयेव हेट्ठा विय पभेदं अदस्सेत्वायेव अत्थेसु ञाणं अत्थपटिसम्भिदातिआदि वुत्तं। पञ्ञापभेदाभावेपि अत्तना पटिविद्धचतुसच्चधम्ममत्तवसेन नानत्तसब्भावतो अत्थनानत्ते पञ्ञा अत्थपटिसम्भिदे ञाणन्तिआदि वुत्तं। तत्थ नानत्तेति अत्थादीनं अनेकभावे। ववत्थानेति अत्थादीनं निच्छयने। सल्लक्खणेति अत्थादीनं सम्मादस्सने। उपलक्खणेति अत्थादीनं भुसंदस्सने। पभेदेति अत्थादीनं नानाभेदे। पभावनेति अत्थादीनं पाकटीकरणेन उप्पादने। जोतनेति अत्थादीनं दीपने। विरोचनेति अत्थादीनं विविधा दीपने। पकासनेति अत्थादीनं पभासने । ‘‘नानत्ते’’ति मूलपदं कत्वा सब्बसाधारणवसेन वुत्तं। ‘‘ववत्थाने’’ति सोतापन्नस्स वसेन, ‘‘सल्लक्खणे उपलक्खणे’’ति सकदागामिस्स वसेन, ‘‘पभेदे पभावने’’ति अनागामिस्स वसेन, ‘‘जोतने विरोचने पकासने’’ति अरहतो वसेन वुत्तन्ति एवम्पेत्थ योजना कातब्बाति।
110. Suddhikapaṭisambhidāñāṇaniddese imesaṃ ñāṇānaṃ pabhedābhāvatoyeva heṭṭhā viya pabhedaṃ adassetvāyeva atthesu ñāṇaṃ atthapaṭisambhidātiādi vuttaṃ. Paññāpabhedābhāvepi attanā paṭividdhacatusaccadhammamattavasena nānattasabbhāvato atthanānatte paññā atthapaṭisambhide ñāṇantiādi vuttaṃ. Tattha nānatteti atthādīnaṃ anekabhāve. Vavatthāneti atthādīnaṃ nicchayane. Sallakkhaṇeti atthādīnaṃ sammādassane. Upalakkhaṇeti atthādīnaṃ bhusaṃdassane. Pabhedeti atthādīnaṃ nānābhede. Pabhāvaneti atthādīnaṃ pākaṭīkaraṇena uppādane. Jotaneti atthādīnaṃ dīpane. Virocaneti atthādīnaṃ vividhā dīpane. Pakāsaneti atthādīnaṃ pabhāsane . ‘‘Nānatte’’ti mūlapadaṃ katvā sabbasādhāraṇavasena vuttaṃ. ‘‘Vavatthāne’’ti sotāpannassa vasena, ‘‘sallakkhaṇe upalakkhaṇe’’ti sakadāgāmissa vasena, ‘‘pabhede pabhāvane’’ti anāgāmissa vasena, ‘‘jotane virocane pakāsane’’ti arahato vasena vuttanti evampettha yojanā kātabbāti.
सुद्धिकपटिसम्भिदाञाणनिद्देसवण्णना निट्ठिता।
Suddhikapaṭisambhidāñāṇaniddesavaṇṇanā niṭṭhitā.
इति सद्धम्मप्पकासिनिया पटिसम्भिदामग्ग-अट्ठकथाय
Iti saddhammappakāsiniyā paṭisambhidāmagga-aṭṭhakathāya
पठमो भागो निट्ठितो।
Paṭhamo bhāgo niṭṭhito.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / पटिसम्भिदामग्गपाळि • Paṭisambhidāmaggapāḷi / ६४-६७. सुद्धिकपटिसम्भिदाञाणनिद्देसो • 64-67. Suddhikapaṭisambhidāñāṇaniddeso
