| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
64-67. ஸுத்³தி⁴கபடிஸம்பி⁴தா³ஞாணனித்³தே³ஸவண்ணனா
64-67. Suddhikapaṭisambhidāñāṇaniddesavaṇṇanā
110. ஸுத்³தி⁴கபடிஸம்பி⁴தா³ஞாணனித்³தே³ஸே இமேஸங் ஞாணானங் பபே⁴தா³பா⁴வதோயேவ ஹெட்டா² விய பபே⁴த³ங் அத³ஸ்ஸெத்வாயேவ அத்தே²ஸு ஞாணங் அத்த²படிஸம்பி⁴தா³திஆதி³ வுத்தங். பஞ்ஞாபபே⁴தா³பா⁴வேபி அத்தனா படிவித்³த⁴சதுஸச்சத⁴ம்மமத்தவஸேன நானத்தஸப்³பா⁴வதோ அத்த²னானத்தே பஞ்ஞா அத்த²படிஸம்பி⁴தே³ ஞாணந்திஆதி³ வுத்தங். தத்த² நானத்தேதி அத்தா²தீ³னங் அனேகபா⁴வே. வவத்தா²னேதி அத்தா²தீ³னங் நிச்ச²யனே. ஸல்லக்க²ணேதி அத்தா²தீ³னங் ஸம்மாத³ஸ்ஸனே. உபலக்க²ணேதி அத்தா²தீ³னங் பு⁴ஸங்த³ஸ்ஸனே. பபே⁴தே³தி அத்தா²தீ³னங் நானாபே⁴தே³. பபா⁴வனேதி அத்தா²தீ³னங் பாகடீகரணேன உப்பாத³னே. ஜோதனேதி அத்தா²தீ³னங் தீ³பனே. விரோசனேதி அத்தா²தீ³னங் விவிதா⁴ தீ³பனே. பகாஸனேதி அத்தா²தீ³னங் பபா⁴ஸனே . ‘‘நானத்தே’’தி மூலபத³ங் கத்வா ஸப்³ப³ஸாதா⁴ரணவஸேன வுத்தங். ‘‘வவத்தா²னே’’தி ஸோதாபன்னஸ்ஸ வஸேன, ‘‘ஸல்லக்க²ணே உபலக்க²ணே’’தி ஸகதா³கா³மிஸ்ஸ வஸேன, ‘‘பபே⁴தே³ பபா⁴வனே’’தி அனாகா³மிஸ்ஸ வஸேன, ‘‘ஜோதனே விரோசனே பகாஸனே’’தி அரஹதோ வஸேன வுத்தந்தி ஏவம்பெத்த² யோஜனா காதப்³பா³தி.
110. Suddhikapaṭisambhidāñāṇaniddese imesaṃ ñāṇānaṃ pabhedābhāvatoyeva heṭṭhā viya pabhedaṃ adassetvāyeva atthesu ñāṇaṃ atthapaṭisambhidātiādi vuttaṃ. Paññāpabhedābhāvepi attanā paṭividdhacatusaccadhammamattavasena nānattasabbhāvato atthanānatte paññā atthapaṭisambhide ñāṇantiādi vuttaṃ. Tattha nānatteti atthādīnaṃ anekabhāve. Vavatthāneti atthādīnaṃ nicchayane. Sallakkhaṇeti atthādīnaṃ sammādassane. Upalakkhaṇeti atthādīnaṃ bhusaṃdassane. Pabhedeti atthādīnaṃ nānābhede. Pabhāvaneti atthādīnaṃ pākaṭīkaraṇena uppādane. Jotaneti atthādīnaṃ dīpane. Virocaneti atthādīnaṃ vividhā dīpane. Pakāsaneti atthādīnaṃ pabhāsane . ‘‘Nānatte’’ti mūlapadaṃ katvā sabbasādhāraṇavasena vuttaṃ. ‘‘Vavatthāne’’ti sotāpannassa vasena, ‘‘sallakkhaṇe upalakkhaṇe’’ti sakadāgāmissa vasena, ‘‘pabhede pabhāvane’’ti anāgāmissa vasena, ‘‘jotane virocane pakāsane’’ti arahato vasena vuttanti evampettha yojanā kātabbāti.
ஸுத்³தி⁴கபடிஸம்பி⁴தா³ஞாணனித்³தே³ஸவண்ணனா நிட்டி²தா.
Suddhikapaṭisambhidāñāṇaniddesavaṇṇanā niṭṭhitā.
இதி ஸத்³த⁴ம்மப்பகாஸினியா படிஸம்பி⁴தா³மக்³க³-அட்ட²கதா²ய
Iti saddhammappakāsiniyā paṭisambhidāmagga-aṭṭhakathāya
பட²மோ பா⁴கோ³ நிட்டி²தோ.
Paṭhamo bhāgo niṭṭhito.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 64-67. ஸுத்³தி⁴கபடிஸம்பி⁴தா³ஞாணனித்³தே³ஸோ • 64-67. Suddhikapaṭisambhidāñāṇaniddeso
