| Library / Tipiṭaka / તિપિટક • Tipiṭaka / સુત્તનિપાતપાળિ • Suttanipātapāḷi |
૪. સુદ્ધટ્ઠકસુત્તં
4. Suddhaṭṭhakasuttaṃ
૭૯૪.
794.
પસ્સામિ સુદ્ધં પરમં અરોગં, દિટ્ઠેન સંસુદ્ધિ નરસ્સ હોતિ;
Passāmi suddhaṃ paramaṃ arogaṃ, diṭṭhena saṃsuddhi narassa hoti;
એવાભિજાનં 1 પરમન્તિ ઞત્વા, સુદ્ધાનુપસ્સીતિ પચ્ચેતિ ઞાણં.
Evābhijānaṃ 2 paramanti ñatvā, suddhānupassīti pacceti ñāṇaṃ.
૭૯૫.
795.
દિટ્ઠેન ચે સુદ્ધિ નરસ્સ હોતિ, ઞાણેન વા સો પજહાતિ દુક્ખં;
Diṭṭhena ce suddhi narassa hoti, ñāṇena vā so pajahāti dukkhaṃ;
અઞ્ઞેન સો સુજ્ઝતિ સોપધીકો, દિટ્ઠી હિ નં પાવ તથા વદાનં.
Aññena so sujjhati sopadhīko, diṭṭhī hi naṃ pāva tathā vadānaṃ.
૭૯૬.
796.
ન બ્રાહ્મણો અઞ્ઞતો સુદ્ધિમાહ, દિટ્ઠે સુતે સીલવતે મુતે વા;
Na brāhmaṇo aññato suddhimāha, diṭṭhe sute sīlavate mute vā;
પુઞ્ઞે ચ પાપે ચ અનૂપલિત્તો, અત્તઞ્જહો નયિધ પકુબ્બમાનો.
Puññe ca pāpe ca anūpalitto, attañjaho nayidha pakubbamāno.
૭૯૭.
797.
પુરિમં પહાય અપરં સિતાસે, એજાનુગા તે ન તરન્તિ સઙ્ગં;
Purimaṃ pahāya aparaṃ sitāse, ejānugā te na taranti saṅgaṃ;
તે ઉગ્ગહાયન્તિ નિરસ્સજન્તિ, કપીવ સાખં પમુઞ્ચં ગહાયં 3.
Te uggahāyanti nirassajanti, kapīva sākhaṃ pamuñcaṃ gahāyaṃ 4.
૭૯૮.
798.
સયં સમાદાય વતાનિ જન્તુ, ઉચ્ચાવચં ગચ્છતિ સઞ્ઞસત્તો;
Sayaṃ samādāya vatāni jantu, uccāvacaṃ gacchati saññasatto;
વિદ્વા ચ વેદેહિ સમેચ્ચ ધમ્મં, ન ઉચ્ચાવચં ગચ્છતિ ભૂરિપઞ્ઞો.
Vidvā ca vedehi samecca dhammaṃ, na uccāvacaṃ gacchati bhūripañño.
૭૯૯.
799.
સ સબ્બધમ્મેસુ વિસેનિભૂતો, યં કિઞ્ચિ દિટ્ઠં વ સુતં મુતં વા;
Sa sabbadhammesu visenibhūto, yaṃ kiñci diṭṭhaṃ va sutaṃ mutaṃ vā;
તમેવ દસ્સિં વિવટં ચરન્તં, કેનીધ લોકસ્મિ વિકપ્પયેય્ય.
Tameva dassiṃ vivaṭaṃ carantaṃ, kenīdha lokasmi vikappayeyya.
૮૦૦.
800.
ન કપ્પયન્તિ ન પુરેક્ખરોન્તિ, અચ્ચન્તસુદ્ધીતિ ન તે વદન્તિ;
Na kappayanti na purekkharonti, accantasuddhīti na te vadanti;
આદાનગન્થં ગથિતં વિસજ્જ, આસં ન કુબ્બન્તિ કુહિઞ્ચિ લોકે.
Ādānaganthaṃ gathitaṃ visajja, āsaṃ na kubbanti kuhiñci loke.
૮૦૧.
801.
સીમાતિગો બ્રાહ્મણો તસ્સ નત્થિ, ઞત્વા વ દિસ્વા વ 5 સમુગ્ગહીતં;
Sīmātigo brāhmaṇo tassa natthi, ñatvā va disvā va 6 samuggahītaṃ;
ન રાગરાગી ન વિરાગરત્તો, તસ્સીધ નત્થી પરમુગ્ગહીતન્તિ.
Na rāgarāgī na virāgaratto, tassīdha natthī paramuggahītanti.
સુદ્ધટ્ઠકસુત્તં ચતુત્થં નિટ્ઠિતં.
Suddhaṭṭhakasuttaṃ catutthaṃ niṭṭhitaṃ.
Footnotes:
Related texts:
અટ્ઠકથા • Aṭṭhakathā / સુત્તપિટક (અટ્ઠકથા) • Suttapiṭaka (aṭṭhakathā) / ખુદ્દકનિકાય (અટ્ઠકથા) • Khuddakanikāya (aṭṭhakathā) / સુત્તનિપાત-અટ્ઠકથા • Suttanipāta-aṭṭhakathā / ૪. સુદ્ધટ્ઠકસુત્તવણ્ણના • 4. Suddhaṭṭhakasuttavaṇṇanā
