| Library / Tipiṭaka / तिपिटक • Tipiṭaka / सुत्तनिपातपाळि • Suttanipātapāḷi |
४. सुद्धट्ठकसुत्तं
4. Suddhaṭṭhakasuttaṃ
७९४.
794.
पस्सामि सुद्धं परमं अरोगं, दिट्ठेन संसुद्धि नरस्स होति।
Passāmi suddhaṃ paramaṃ arogaṃ, diṭṭhena saṃsuddhi narassa hoti;
एवाभिजानं 1 परमन्ति ञत्वा, सुद्धानुपस्सीति पच्चेति ञाणं॥
Evābhijānaṃ 2 paramanti ñatvā, suddhānupassīti pacceti ñāṇaṃ.
७९५.
795.
दिट्ठेन चे सुद्धि नरस्स होति, ञाणेन वा सो पजहाति दुक्खं।
Diṭṭhena ce suddhi narassa hoti, ñāṇena vā so pajahāti dukkhaṃ;
अञ्ञेन सो सुज्झति सोपधीको, दिट्ठी हि नं पाव तथा वदानं॥
Aññena so sujjhati sopadhīko, diṭṭhī hi naṃ pāva tathā vadānaṃ.
७९६.
796.
न ब्राह्मणो अञ्ञतो सुद्धिमाह, दिट्ठे सुते सीलवते मुते वा।
Na brāhmaṇo aññato suddhimāha, diṭṭhe sute sīlavate mute vā;
पुञ्ञे च पापे च अनूपलित्तो, अत्तञ्जहो नयिध पकुब्बमानो॥
Puññe ca pāpe ca anūpalitto, attañjaho nayidha pakubbamāno.
७९७.
797.
पुरिमं पहाय अपरं सितासे, एजानुगा ते न तरन्ति सङ्गं।
Purimaṃ pahāya aparaṃ sitāse, ejānugā te na taranti saṅgaṃ;
ते उग्गहायन्ति निरस्सजन्ति, कपीव साखं पमुञ्चं गहायं 3॥
Te uggahāyanti nirassajanti, kapīva sākhaṃ pamuñcaṃ gahāyaṃ 4.
७९८.
798.
सयं समादाय वतानि जन्तु, उच्चावचं गच्छति सञ्ञसत्तो।
Sayaṃ samādāya vatāni jantu, uccāvacaṃ gacchati saññasatto;
विद्वा च वेदेहि समेच्च धम्मं, न उच्चावचं गच्छति भूरिपञ्ञो॥
Vidvā ca vedehi samecca dhammaṃ, na uccāvacaṃ gacchati bhūripañño.
७९९.
799.
स सब्बधम्मेसु विसेनिभूतो, यं किञ्चि दिट्ठं व सुतं मुतं वा।
Sa sabbadhammesu visenibhūto, yaṃ kiñci diṭṭhaṃ va sutaṃ mutaṃ vā;
तमेव दस्सिं विवटं चरन्तं, केनीध लोकस्मि विकप्पयेय्य॥
Tameva dassiṃ vivaṭaṃ carantaṃ, kenīdha lokasmi vikappayeyya.
८००.
800.
न कप्पयन्ति न पुरेक्खरोन्ति, अच्चन्तसुद्धीति न ते वदन्ति।
Na kappayanti na purekkharonti, accantasuddhīti na te vadanti;
आदानगन्थं गथितं विसज्ज, आसं न कुब्बन्ति कुहिञ्चि लोके॥
Ādānaganthaṃ gathitaṃ visajja, āsaṃ na kubbanti kuhiñci loke.
८०१.
801.
सीमातिगो ब्राह्मणो तस्स नत्थि, ञत्वा व दिस्वा व 5 समुग्गहीतं।
Sīmātigo brāhmaṇo tassa natthi, ñatvā va disvā va 6 samuggahītaṃ;
न रागरागी न विरागरत्तो, तस्सीध नत्थी परमुग्गहीतन्ति॥
Na rāgarāgī na virāgaratto, tassīdha natthī paramuggahītanti.
सुद्धट्ठकसुत्तं चतुत्थं निट्ठितं।
Suddhaṭṭhakasuttaṃ catutthaṃ niṭṭhitaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / सुत्तनिपात-अट्ठकथा • Suttanipāta-aṭṭhakathā / ४. सुद्धट्ठकसुत्तवण्णना • 4. Suddhaṭṭhakasuttavaṇṇanā
