| Library / Tipiṭaka / तिपिटक • Tipiṭaka / कङ्खावितरणी-अभिनव-टीका • Kaṅkhāvitaraṇī-abhinava-ṭīkā |
२. सुद्धकाळकसिक्खापदवण्णना
2. Suddhakāḷakasikkhāpadavaṇṇanā
काळकानन्ति सभावेन वा रजनेन वा काळकानं। यथाह ‘‘काळकं नाम द्वे काळकानि जातिया काळकं वा रजनकाळकं वा’’ति। अञ्ञेहि अमिस्सितानन्ति अञ्ञेहि अमिस्सितकाळकानन्ति अत्थो। ‘‘यथा पठमे ‘एकेनापि कोसियंसुना’ति (कङ्खा॰ अट्ठ॰ कोसियसिक्खापदवण्णना) वुत्तं, तथा इधापि ‘एकेनापि अञ्ञेन अमिस्सेत्वा’ति अवुत्तत्ता अञ्ञेन पन मिस्सकभोगेपि अपञ्ञायमानरूपकं चे ‘सुद्धकाळक’मिच्चेव वुच्चती’’ति (वजिर॰ टी॰ पाराजिक ५४७) वदन्ति।
Kāḷakānanti sabhāvena vā rajanena vā kāḷakānaṃ. Yathāha ‘‘kāḷakaṃ nāma dve kāḷakāni jātiyā kāḷakaṃ vā rajanakāḷakaṃ vā’’ti. Aññehi amissitānanti aññehi amissitakāḷakānanti attho. ‘‘Yathā paṭhame ‘ekenāpi kosiyaṃsunā’ti (kaṅkhā. aṭṭha. kosiyasikkhāpadavaṇṇanā) vuttaṃ, tathā idhāpi ‘ekenāpi aññena amissetvā’ti avuttattā aññena pana missakabhogepi apaññāyamānarūpakaṃ ce ‘suddhakāḷaka’micceva vuccatī’’ti (vajira. ṭī. pārājika 547) vadanti.
एत्थ च ‘‘इदं मे, भन्ते, सुद्धकाळकानं एळकलोमानं सन्थत’’न्तिआदिना (पारा॰ ५४९) निस्सज्जनविधानं वेदितब्बं। सेसन्ति पुब्बपयोगदुक्कटचतुक्कपाचित्तियादिकं। अङ्गेसु पन ‘‘सुद्धकाळकभावो’’ति अयं विसेसो।
Ettha ca ‘‘idaṃ me, bhante, suddhakāḷakānaṃ eḷakalomānaṃ santhata’’ntiādinā (pārā. 549) nissajjanavidhānaṃ veditabbaṃ. Sesanti pubbapayogadukkaṭacatukkapācittiyādikaṃ. Aṅgesu pana ‘‘suddhakāḷakabhāvo’’ti ayaṃ viseso.
सुद्धकाळकसिक्खापदवण्णना निट्ठिता।
Suddhakāḷakasikkhāpadavaṇṇanā niṭṭhitā.
