| Library / Tipiṭaka / തിപിടക • Tipiṭaka / അങ്ഗുത്തരനികായ • Aṅguttaranikāya |
(൨൦) ൫. ബ്രാഹ്മണവഗ്ഗോ
(20) 5. Brāhmaṇavaggo
൧. സോണസുത്തം
1. Soṇasuttaṃ
൧൯൧. ‘‘പഞ്ചിമേ , ഭിക്ഖവേ, പോരാണാ ബ്രാഹ്മണധമ്മാ ഏതരഹി സുനഖേസു സന്ദിസ്സന്തി, നോ ബ്രാഹ്മണേസു. കതമേ പഞ്ച? പുബ്ബേ സുദം 1, ഭിക്ഖവേ, ബ്രാഹ്മണാ ബ്രാഹ്മണിംയേവ ഗച്ഛന്തി, നോ അബ്രാഹ്മണിം. ഏതരഹി, ഭിക്ഖവേ, ബ്രാഹ്മണാ ബ്രാഹ്മണിമ്പി ഗച്ഛന്തി, അബ്രാഹ്മണിമ്പി ഗച്ഛന്തി. ഏതരഹി, ഭിക്ഖവേ, സുനഖാ സുനഖിംയേവ ഗച്ഛന്തി, നോ അസുനഖിം. അയം, ഭിക്ഖവേ, പഠമോ പോരാണോ ബ്രാഹ്മണധമ്മോ ഏതരഹി സുനഖേസു സന്ദിസ്സതി, നോ ബ്രാഹ്മണേസു.
191. ‘‘Pañcime , bhikkhave, porāṇā brāhmaṇadhammā etarahi sunakhesu sandissanti, no brāhmaṇesu. Katame pañca? Pubbe sudaṃ 2, bhikkhave, brāhmaṇā brāhmaṇiṃyeva gacchanti, no abrāhmaṇiṃ. Etarahi, bhikkhave, brāhmaṇā brāhmaṇimpi gacchanti, abrāhmaṇimpi gacchanti. Etarahi, bhikkhave, sunakhā sunakhiṃyeva gacchanti, no asunakhiṃ. Ayaṃ, bhikkhave, paṭhamo porāṇo brāhmaṇadhammo etarahi sunakhesu sandissati, no brāhmaṇesu.
‘‘പുബ്ബേ സുദം, ഭിക്ഖവേ, ബ്രാഹ്മണാ ബ്രാഹ്മണിം ഉതുനിംയേവ ഗച്ഛന്തി, നോ അനുതുനിം. ഏതരഹി, ഭിക്ഖവേ, ബ്രാഹ്മണാ ബ്രാഹ്മണിം ഉതുനിമ്പി ഗച്ഛന്തി, അനുതുനിമ്പി ഗച്ഛന്തി . ഏതരഹി, ഭിക്ഖവേ, സുനഖാ സുനഖിം ഉതുനിംയേവ ഗച്ഛന്തി, നോ അനുതുനിം. അയം, ഭിക്ഖവേ, ദുതിയോ പോരാണോ ബ്രാഹ്മണധമ്മോ ഏതരഹി സുനഖേസു സന്ദിസ്സതി, നോ ബ്രാഹ്മണേസു.
‘‘Pubbe sudaṃ, bhikkhave, brāhmaṇā brāhmaṇiṃ utuniṃyeva gacchanti, no anutuniṃ. Etarahi, bhikkhave, brāhmaṇā brāhmaṇiṃ utunimpi gacchanti, anutunimpi gacchanti . Etarahi, bhikkhave, sunakhā sunakhiṃ utuniṃyeva gacchanti, no anutuniṃ. Ayaṃ, bhikkhave, dutiyo porāṇo brāhmaṇadhammo etarahi sunakhesu sandissati, no brāhmaṇesu.
‘‘പുബ്ബേ സുദം, ഭിക്ഖവേ, ബ്രാഹ്മണാ ബ്രാഹ്മണിം നേവ കിണന്തി നോ വിക്കിണന്തി, സമ്പിയേനേവ സംവാസം സംബന്ധായ 3 സംപവത്തേന്തി. ഏതരഹി, ഭിക്ഖവേ, ബ്രാഹ്മണാ ബ്രാഹ്മണിം കിണന്തിപി വിക്കിണന്തിപി, സമ്പിയേനപി സംവാസം സംബന്ധായ സംപവത്തേന്തി. ഏതരഹി, ഭിക്ഖവേ, സുനഖാ സുനഖിം നേവ കിണന്തി നോ വിക്കിണന്തി, സമ്പിയേനേവ സംവാസം സംബന്ധായ സംപവത്തേന്തി. അയം, ഭിക്ഖവേ, തതിയോ പോരാണോ ബ്രാഹ്മണധമ്മോ ഏതരഹി സുനഖേസു സന്ദിസ്സതി, നോ ബ്രാഹ്മണേസു.
‘‘Pubbe sudaṃ, bhikkhave, brāhmaṇā brāhmaṇiṃ neva kiṇanti no vikkiṇanti, sampiyeneva saṃvāsaṃ saṃbandhāya 4 saṃpavattenti. Etarahi, bhikkhave, brāhmaṇā brāhmaṇiṃ kiṇantipi vikkiṇantipi, sampiyenapi saṃvāsaṃ saṃbandhāya saṃpavattenti. Etarahi, bhikkhave, sunakhā sunakhiṃ neva kiṇanti no vikkiṇanti, sampiyeneva saṃvāsaṃ saṃbandhāya saṃpavattenti. Ayaṃ, bhikkhave, tatiyo porāṇo brāhmaṇadhammo etarahi sunakhesu sandissati, no brāhmaṇesu.
‘‘പുബ്ബേ സുദം, ഭിക്ഖവേ, ബ്രാഹ്മണാ ന സന്നിധിം കരോന്തി ധനസ്സപി ധഞ്ഞസ്സപി രജതസ്സപി ജാതരൂപസ്സപി. ഏതരഹി, ഭിക്ഖവേ, ബ്രാഹ്മണാ സന്നിധിം കരോന്തി ധനസ്സപി ധഞ്ഞസ്സപി രജതസ്സപി ജാതരൂപസ്സപി. ഏതരഹി, ഭിക്ഖവേ, സുനഖാ ന സന്നിധിം കരോന്തി ധനസ്സപി ധഞ്ഞസ്സപി രജതസ്സപി ജാതരൂപസ്സപി. അയം, ഭിക്ഖവേ, ചതുത്ഥോ പോരാണോ ബ്രാഹ്മണധമ്മോ ഏതരഹി സുനഖേസു സന്ദിസ്സതി, നോ ബ്രാഹ്മണേസു.
‘‘Pubbe sudaṃ, bhikkhave, brāhmaṇā na sannidhiṃ karonti dhanassapi dhaññassapi rajatassapi jātarūpassapi. Etarahi, bhikkhave, brāhmaṇā sannidhiṃ karonti dhanassapi dhaññassapi rajatassapi jātarūpassapi. Etarahi, bhikkhave, sunakhā na sannidhiṃ karonti dhanassapi dhaññassapi rajatassapi jātarūpassapi. Ayaṃ, bhikkhave, catuttho porāṇo brāhmaṇadhammo etarahi sunakhesu sandissati, no brāhmaṇesu.
‘‘പുബ്ബേ സുദം, ഭിക്ഖവേ, ബ്രാഹ്മണാ സായം സായമാസായ പാതോ പാതരാസായ ഭിക്ഖം പരിയേസന്തി. ഏതരഹി, ഭിക്ഖവേ, ബ്രാഹ്മണാ യാവദത്ഥം ഉദരാവദേഹകം ഭുഞ്ജിത്വാ അവസേസം ആദായ പക്കമന്തി. ഏതരഹി, ഭിക്ഖവേ, സുനഖാ സായം സായമാസായ പാതോ പാതരാസായ ഭിക്ഖം പരിയേസന്തി. അയം, ഭിക്ഖവേ, പഞ്ചമോ പോരാണോ ബ്രാഹ്മണധമ്മോ ഏതരഹി സുനഖേസു സന്ദിസ്സതി, നോ ബ്രാഹ്മണേസു. ഇമേ ഖോ, ഭിക്ഖവേ, പഞ്ച പോരാണാ ബ്രാഹ്മണധമ്മാ ഏതരഹി സുനഖേസു സന്ദിസ്സന്തി, നോ ബ്രാഹ്മണേസൂ’’തി. പഠമം.
‘‘Pubbe sudaṃ, bhikkhave, brāhmaṇā sāyaṃ sāyamāsāya pāto pātarāsāya bhikkhaṃ pariyesanti. Etarahi, bhikkhave, brāhmaṇā yāvadatthaṃ udarāvadehakaṃ bhuñjitvā avasesaṃ ādāya pakkamanti. Etarahi, bhikkhave, sunakhā sāyaṃ sāyamāsāya pāto pātarāsāya bhikkhaṃ pariyesanti. Ayaṃ, bhikkhave, pañcamo porāṇo brāhmaṇadhammo etarahi sunakhesu sandissati, no brāhmaṇesu. Ime kho, bhikkhave, pañca porāṇā brāhmaṇadhammā etarahi sunakhesu sandissanti, no brāhmaṇesū’’ti. Paṭhamaṃ.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) / ൧. സോണസുത്തവണ്ണനാ • 1. Soṇasuttavaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / അങ്ഗുത്തരനികായ (ടീകാ) • Aṅguttaranikāya (ṭīkā) / ൧. സോണസുത്തവണ്ണനാ • 1. Soṇasuttavaṇṇanā
