| Library / Tipiṭaka / திபிடக • Tipiṭaka / அபதா³னபாளி • Apadānapāḷi |
9. ஸோணகோடிவீஸத்தே²ரஅபதா³னங்
9. Soṇakoṭivīsattheraapadānaṃ
49.
49.
‘‘விபஸ்ஸினோ பாவசனே, ஏகங் லேணங் மயா கதங்;
‘‘Vipassino pāvacane, ekaṃ leṇaṃ mayā kataṃ;
சாதுத்³தி³ஸஸ்ஸ ஸங்க⁴ஸ்ஸ, ப³ந்து⁴மாராஜதா⁴னியா.
Cātuddisassa saṅghassa, bandhumārājadhāniyā.
50.
50.
‘‘து³ஸ்ஸேஹி பூ⁴மிங் லேணஸ்ஸ, ஸந்த²ரித்வா பரிச்சஜிங்;
‘‘Dussehi bhūmiṃ leṇassa, santharitvā pariccajiṃ;
உத³க்³க³சித்தோ ஸுமனோ, அகாஸிங் பணிதி⁴ங் ததா³.
Udaggacitto sumano, akāsiṃ paṇidhiṃ tadā.
51.
51.
‘‘ஆராத⁴யெய்யங் ஸம்பு³த்³த⁴ங், பப்³ப³ஜ்ஜஞ்ச லபெ⁴ய்யஹங்;
‘‘Ārādhayeyyaṃ sambuddhaṃ, pabbajjañca labheyyahaṃ;
அனுத்தரஞ்ச நிப்³பா³னங், பு²ஸெய்யங் ஸந்திமுத்தமங்.
Anuttarañca nibbānaṃ, phuseyyaṃ santimuttamaṃ.
52.
52.
தே³வபூ⁴தோ மனுஸ்ஸோ ச, கதபுஞ்ஞோ விரோசஹங்.
Devabhūto manusso ca, katapuñño virocahaṃ.
53.
53.
‘‘ததோ கம்மாவஸேஸேன, இத⁴ பச்சி²மகே ப⁴வே;
‘‘Tato kammāvasesena, idha pacchimake bhave;
சம்பாயங் அக்³க³ஸெட்டி²ஸ்ஸ, ஜாதொம்ஹி ஏகபுத்தகோ.
Campāyaṃ aggaseṭṭhissa, jātomhi ekaputtako.
54.
54.
‘‘ஜாதமத்தஸ்ஸ மே ஸுத்வா, பிது ச²ந்தோ³ அயங் அஹு;
‘‘Jātamattassa me sutvā, pitu chando ayaṃ ahu;
த³தா³மஹங் குமாரஸ்ஸ, வீஸகோடீ அனூனகா.
Dadāmahaṃ kumārassa, vīsakoṭī anūnakā.
55.
55.
‘‘சதுரங்கு³லா ச மே லோமா, ஜாதா பாத³தலே உபோ⁴;
‘‘Caturaṅgulā ca me lomā, jātā pādatale ubho;
ஸுகு²மா முது³ஸம்ப²ஸ்ஸா, தூலாபிசுஸமா ஸுபா⁴.
Sukhumā mudusamphassā, tūlāpicusamā subhā.
56.
56.
‘‘அதீதா நவுதி கப்பா, அயங் ஏகோ ச உத்தரி;
‘‘Atītā navuti kappā, ayaṃ eko ca uttari;
நாபி⁴ஜானாமி நிக்கி²த்தே, பாதே³ பூ⁴ம்யா அஸந்த²தே.
Nābhijānāmi nikkhitte, pāde bhūmyā asanthate.
57.
57.
‘‘ஆராதி⁴தோ மே ஸம்பு³த்³தோ⁴, பப்³ப³ஜிங் அனகா³ரியங்;
‘‘Ārādhito me sambuddho, pabbajiṃ anagāriyaṃ;
அரஹத்தஞ்ச மே பத்தங், ஸீதிபூ⁴தொம்ஹி நிப்³பு³தோ.
Arahattañca me pattaṃ, sītibhūtomhi nibbuto.
58.
58.
‘‘அக்³கோ³ ஆரத்³த⁴வீரியானங், நித்³தி³ட்டோ² ஸப்³ப³த³ஸ்ஸினா;
‘‘Aggo āraddhavīriyānaṃ, niddiṭṭho sabbadassinā;
கீ²ணாஸவொம்ஹி அரஹா, ச²ளபி⁴ஞ்ஞோ மஹித்³தி⁴கோ.
Khīṇāsavomhi arahā, chaḷabhiñño mahiddhiko.
59.
59.
‘‘ஏகனவுதிதோ கப்பே, யங் தா³னமத³தி³ங் ததா³;
‘‘Ekanavutito kappe, yaṃ dānamadadiṃ tadā;
து³க்³க³திங் நாபி⁴ஜானாமி, லேணதா³னஸ்ஸித³ங் ப²லங்.
Duggatiṃ nābhijānāmi, leṇadānassidaṃ phalaṃ.
60.
60.
‘‘கிலேஸா ஜா²பிதா மய்ஹங்…பே॰… விஹராமி அனாஸவோ.
‘‘Kilesā jhāpitā mayhaṃ…pe… viharāmi anāsavo.
61.
61.
‘‘ஸ்வாக³தங் வத மே ஆஸி…பே॰… கதங் பு³த்³த⁴ஸ்ஸ ஸாஸனங்.
‘‘Svāgataṃ vata me āsi…pe… kataṃ buddhassa sāsanaṃ.
62.
62.
‘‘படிஸம்பி⁴தா³ சதஸ்ஸோ…பே॰… கதங் பு³த்³த⁴ஸ்ஸ ஸாஸனங்’’.
‘‘Paṭisambhidā catasso…pe… kataṃ buddhassa sāsanaṃ’’.
63.
63.
‘‘தே²ரோ கோடிவீஸோ 3 ஸோணோ, பி⁴க்கு²ஸங்க⁴ஸ்ஸ அக்³க³தோ;
‘‘Thero koṭivīso 4 soṇo, bhikkhusaṅghassa aggato;
பஞ்ஹங் புட்டோ² வியாகாஸி, அனோதத்தே மஹாஸரே’’தி.
Pañhaṃ puṭṭho viyākāsi, anotatte mahāsare’’ti.
இத்த²ங் ஸுத³ங் ஆயஸ்மா ஸோணோ கோடிவீஸோ தே²ரோ இமா கா³தா²யோ அபா⁴ஸித்தா²தி.
Itthaṃ sudaṃ āyasmā soṇo koṭivīso thero imā gāthāyo abhāsitthāti.
ஸோணகோடிவீஸத்தே²ரஸ்ஸாபதா³னங் நவமங்.
Soṇakoṭivīsattherassāpadānaṃ navamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / அபதா³ன-அட்ட²கதா² • Apadāna-aṭṭhakathā / 9. ஸோணகோடிவீஸத்தே²ரஅபதா³னவண்ணனா • 9. Soṇakoṭivīsattheraapadānavaṇṇanā
