| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೬. ಸೋಖುಮ್ಮಸುತ್ತಂ
6. Sokhummasuttaṃ
೧೬. ‘‘ಚತ್ತಾರಿಮಾನಿ, ಭಿಕ್ಖವೇ, ಸೋಖುಮ್ಮಾನಿ। ಕತಮಾನಿ ಚತ್ತಾರಿ? ಇಧ, ಭಿಕ್ಖವೇ, ಭಿಕ್ಖು ರೂಪಸೋಖುಮ್ಮೇನ ಸಮನ್ನಾಗತೋ ಹೋತಿ ಪರಮೇನ; ತೇನ ಚ ರೂಪಸೋಖುಮ್ಮೇನ ಅಞ್ಞಂ ರೂಪಸೋಖುಮ್ಮಂ ಉತ್ತರಿತರಂ ವಾ ಪಣೀತತರಂ ವಾ ನ ಸಮನುಪಸ್ಸತಿ; ತೇನ ಚ ರೂಪಸೋಖುಮ್ಮೇನ ಅಞ್ಞಂ ರೂಪಸೋಖುಮ್ಮಂ ಉತ್ತರಿತರಂ ವಾ ಪಣೀತತರಂ ವಾ ನ ಪತ್ಥೇತಿ। ವೇದನಾಸೋಖುಮ್ಮೇನ ಸಮನ್ನಾಗತೋ ಹೋತಿ ಪರಮೇನ; ತೇನ ಚ ವೇದನಾಸೋಖುಮ್ಮೇನ ಅಞ್ಞಂ ವೇದನಾಸೋಖುಮ್ಮಂ ಉತ್ತರಿತರಂ ವಾ ಪಣೀತತರಂ ವಾ ನ ಸಮನುಪಸ್ಸತಿ; ತೇನ ಚ ವೇದನಾಸೋಖುಮ್ಮೇನ ಅಞ್ಞಂ ವೇದನಾಸೋಖುಮ್ಮಂ ಉತ್ತರಿತರಂ ವಾ ಪಣೀತತರಂ ವಾ ನ ಪತ್ಥೇತಿ। ಸಞ್ಞಾಸೋಖುಮ್ಮೇನ ಸಮನ್ನಾಗತೋ ಹೋತಿ ಪರಮೇನ; ತೇನ ಚ ಸಞ್ಞಾಸೋಖುಮ್ಮೇನ ಅಞ್ಞಂ ಸಞ್ಞಾಸೋಖುಮ್ಮಂ ಉತ್ತರಿತರಂ ವಾ ಪಣೀತತರಂ ವಾ ನ ಸಮನುಪಸ್ಸತಿ; ತೇನ ಚ ಸಞ್ಞಾಸೋಖುಮ್ಮೇನ ಅಞ್ಞಂ ಸಞ್ಞಾಸೋಖುಮ್ಮಂ ಉತ್ತರಿತರಂ ವಾ ಪಣೀತತರಂ ವಾ ನ ಪತ್ಥೇತಿ। ಸಙ್ಖಾರಸೋಖುಮ್ಮೇನ ಸಮನ್ನಾಗತೋ ಹೋತಿ ಪರಮೇನ; ತೇನ ಚ ಸಙ್ಖಾರಸೋಖುಮ್ಮೇನ ಅಞ್ಞಂ ಸಙ್ಖಾರಸೋಖುಮ್ಮಂ ಉತ್ತರಿತರಂ ವಾ ಪಣೀತತರಂ ವಾ ನ ಸಮನುಪಸ್ಸತಿ; ತೇನ ಚ ಸಙ್ಖಾರಸೋಖುಮ್ಮೇನ ಅಞ್ಞಂ ಸಙ್ಖಾರಸೋಖುಮ್ಮಂ ಉತ್ತರಿತರಂ ವಾ ಪಣೀತತರಂ ವಾ ನ ಪತ್ಥೇತಿ। ಇಮಾನಿ ಖೋ, ಭಿಕ್ಖವೇ, ಚತ್ತಾರಿ ಸೋಖುಮ್ಮಾನೀ’’ತಿ।
16. ‘‘Cattārimāni, bhikkhave, sokhummāni. Katamāni cattāri? Idha, bhikkhave, bhikkhu rūpasokhummena samannāgato hoti paramena; tena ca rūpasokhummena aññaṃ rūpasokhummaṃ uttaritaraṃ vā paṇītataraṃ vā na samanupassati; tena ca rūpasokhummena aññaṃ rūpasokhummaṃ uttaritaraṃ vā paṇītataraṃ vā na pattheti. Vedanāsokhummena samannāgato hoti paramena; tena ca vedanāsokhummena aññaṃ vedanāsokhummaṃ uttaritaraṃ vā paṇītataraṃ vā na samanupassati; tena ca vedanāsokhummena aññaṃ vedanāsokhummaṃ uttaritaraṃ vā paṇītataraṃ vā na pattheti. Saññāsokhummena samannāgato hoti paramena; tena ca saññāsokhummena aññaṃ saññāsokhummaṃ uttaritaraṃ vā paṇītataraṃ vā na samanupassati; tena ca saññāsokhummena aññaṃ saññāsokhummaṃ uttaritaraṃ vā paṇītataraṃ vā na pattheti. Saṅkhārasokhummena samannāgato hoti paramena; tena ca saṅkhārasokhummena aññaṃ saṅkhārasokhummaṃ uttaritaraṃ vā paṇītataraṃ vā na samanupassati; tena ca saṅkhārasokhummena aññaṃ saṅkhārasokhummaṃ uttaritaraṃ vā paṇītataraṃ vā na pattheti. Imāni kho, bhikkhave, cattāri sokhummānī’’ti.
‘‘ರೂಪಸೋಖುಮ್ಮತಂ ಞತ್ವಾ, ವೇದನಾನಞ್ಚ ಸಮ್ಭವಂ।
‘‘Rūpasokhummataṃ ñatvā, vedanānañca sambhavaṃ;
ಸಞ್ಞಾ ಯತೋ ಸಮುದೇತಿ, ಅತ್ಥಂ ಗಚ್ಛತಿ ಯತ್ಥ ಚ।
Saññā yato samudeti, atthaṃ gacchati yattha ca;
ಸಙ್ಖಾರೇ ಪರತೋ ಞತ್ವಾ, ದುಕ್ಖತೋ ನೋ ಚ ಅತ್ತತೋ॥
Saṅkhāre parato ñatvā, dukkhato no ca attato.
‘‘ಸ ವೇ ಸಮ್ಮದ್ದಸೋ ಭಿಕ್ಖು, ಸನ್ತೋ ಸನ್ತಿಪದೇ ರತೋ।
‘‘Sa ve sammaddaso bhikkhu, santo santipade rato;
ಧಾರೇತಿ ಅನ್ತಿಮಂ ದೇಹಂ, ಜೇತ್ವಾ ಮಾರಂ ಸವಾಹಿನಿ’’ನ್ತಿ॥ ಛಟ್ಠಂ।
Dhāreti antimaṃ dehaṃ, jetvā māraṃ savāhini’’nti. chaṭṭhaṃ;
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೬. ಸೋಖುಮ್ಮಸುತ್ತವಣ್ಣನಾ • 6. Sokhummasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೬. ಸೋಖುಮ್ಮಸುತ್ತವಣ್ಣನಾ • 6. Sokhummasuttavaṇṇanā
