| / Sankaracharya |
आदि शङ्कर
Adi Shankaracharya
शिवपंचाक्षरस्तोत्र
Śivapaṃcākṣarastotra
नागेन्द्रहाराय त्रिलोचनाय भस्माङ्गरागाय महेश्वराय ।
नित्याय शुद्धाय दिगम्बराय तस्मै नकाराय नमः शिवाय ॥ १॥
nāgendrahārāya trilocanāya bhasmāṅgarāgāya maheśvarāya ।
nityāya śuddhāya digambarāya tasmai nakārāya namaḥ śivāya ॥ 1॥
मन्दाकिनि-सलिलचन्दन-चर्चिताय नन्दीश्वर-प्रमथनाथ- महेश्वराय ।
मन्दारपुष्प-बहुपुष्प-सुपूजिताय तस्मै मकाराय नमः शिवाय ॥ २॥
mandākini-salilacandana-carcitāya nandīśvara-pramathanātha- maheśvarāya ।
mandārapuṣpa-bahupuṣpa-supūjitāya tasmai makārāya namaḥ śivāya ॥ 2॥
शिवाय गौरीवदनाब्ज-वृन्द-सूर्याय दक्षाध्वरनाशकाय ।
श्रीनीलकण्ठाय वृषध्वजाय तस्मै शिकाराय नमः शिवाय ॥ ३॥
śivāya gaurīvadanābja-vṛnda-sūryāya dakṣādhvaranāśakāya ।
śrīnīlakaṇṭhāya vṛṣadhvajāya tasmai śikārāya namaḥ śivāya ॥ 3॥
वसिष्ठ-कुम्भोद्भव-गौतमार्यमुनीन्द्र-देवार्चितशेखराय ।
चन्द्रार्क-वैश्वानरलोचनाय तस्मै वकाराय नमः शिवाय ॥ ४॥
vasiṣṭha-kumbhodbhava-gautamāryamunīndra-devārcitaśekharāya ।
candrārka-vaiśvānaralocanāya tasmai vakārāya namaḥ śivāya ॥ 4॥
यक्षस्वरूपाय जटाधराय पिनाकहस्ताय सनातनाय ।
दिव्याय देवाय दिगम्बराय तस्मै यकाराय नमः शिवाय ॥ ५॥
yakṣasvarūpāya jaṭādharāya pinākahastāya sanātanāya ।
divyāya devāya digambarāya tasmai yakārāya namaḥ śivāya ॥ 5॥
पंचाक्षरमिदं पुण्यं यः पठेच्छिवसन्निधौ ।
शिवलोकमवाप्नोति शिवेन सह मोदते ॥
paṃcākṣaramidaṃ puṇyaṃ yaḥ paṭhecchivasannidhau ।
śivalokamavāpnoti śivena saha modate ॥
