| Library / Tipiṭaka / တိပိဋက • Tipiṭaka / ပာစိတ္ယာဒိယောဇနာပာဠိ • Pācityādiyojanāpāḷi |
၁၀၀. သီမောက္ကန္တိကပေယ္ယာလကထာ
100. Sīmokkantikapeyyālakathā
၁၇၇. အာဝာသိကေနအာဂန္တုကပေယ္ယာလေ သဗ္ဗံ ဝေဒိတဗ္ဗန္တိ သမ္ဗန္ဓော။ ဝေဒိတဗ္ဗာကာရံ သဟ ဥပမာယ ဒသ္သေန္တော အာဟ ‘‘ယထာ’’တိအာဒိ။ အာဂန္တုကေနအာဝာသိကပေယ္ယာလေ ပန အာနေတဗ္ဗန္တိ သမ္ဗန္ဓော။ ပုရိမပေယ္ယာလေတိ အာဝာသိကေနအာဂန္တုကပေယ္ယာလေ။ အာဂန္တုကေနအာဂန္တုကပေယ္ယာလေ ပန ယောဇေတဗ္ဗောတိ သမ္ဗန္ဓော။ ဧတ္ထ စ ပေယ္ယာလန္တိ သဒိသနယသ္သ စ တံဇာနနဉာဏသ္သ စ ပာတဗ္ဗံ ရက္ခနံ ပေယ္ယံ, ပေယ္ယံ, ပေယ္ယေ ဝာ, ပေယ္ယာယ ဝာ အလတိ သမတ္ထေတီတိ ပေယ္ယာလန္တိ ဝစနတ္ထော ကာတဗ္ဗော။
177. Āvāsikenaāgantukapeyyāle sabbaṃ veditabbanti sambandho. Veditabbākāraṃ saha upamāya dassento āha ‘‘yathā’’tiādi. Āgantukenaāvāsikapeyyāle pana ānetabbanti sambandho. Purimapeyyāleti āvāsikenaāgantukapeyyāle. Āgantukenaāgantukapeyyāle pana yojetabboti sambandho. Ettha ca peyyālanti sadisanayassa ca taṃjānanañāṇassa ca pātabbaṃ rakkhanaṃ peyyaṃ, peyyaṃ, peyye vā, peyyāya vā alati samatthetīti peyyālanti vacanattho kātabbo.
၁၇၈. အာဝာသိကာနံ စာတုဒ္ဒသော ဟုတ္ဝာ ကသ္မာ အာဂန္တုကာနံ ပန္နရသောတိ အာဟ ‘‘ယေသ’’န္တိအာဒိ ။ တတ္ထ ယေသန္တိ အာဂန္တုကာနံ။ တိရောရဋ္ဌတောတိ အာဝာသိကာနံ ရဋ္ဌသ္သ အညရဋ္ဌတော။ တိရောဇနပဒတောတိ ဧကရဋ္ဌေပိ အညဇနပဒတော။ စာတုဒ္ဒသိကံ အကံသူတိ သညာနာနတ္တဝသေန စာတုဒ္ဒသိကံ အကံသု။ အနုဝတ္တိတဗ္ဗန္တိ အနုမတိံ ဝတ္တိတဗ္ဗံ။ န ပဋိက္ကောသိတဗ္ဗန္တိ ‘‘န စာတုဒ္ဒသော’’တိ ဝတ္ဝာ န ဝာရိတဗ္ဗံ။ န အကာမာတိ ဧတ္ထ ကမုဓာတု ဣစ္ဆတ္ထော, ကရဏတ္ထေ စ နိသ္သက္ကဝစနန္တိ အာဟ ‘‘န အနိစ္ဆာယ ဒာတဗ္ဗာ’’တိ။
178. Āvāsikānaṃ cātuddaso hutvā kasmā āgantukānaṃ pannarasoti āha ‘‘yesa’’ntiādi . Tattha yesanti āgantukānaṃ. Tiroraṭṭhatoti āvāsikānaṃ raṭṭhassa aññaraṭṭhato. Tirojanapadatoti ekaraṭṭhepi aññajanapadato. Cātuddasikaṃ akaṃsūti saññānānattavasena cātuddasikaṃ akaṃsu. Anuvattitabbanti anumatiṃ vattitabbaṃ. Na paṭikkositabbanti ‘‘na cātuddaso’’ti vatvā na vāritabbaṃ. Na akāmāti ettha kamudhātu icchattho, karaṇatthe ca nissakkavacananti āha ‘‘na anicchāya dātabbā’’ti.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝဂ္ဂပာဠိ • Mahāvaggapāḷi / ၁၀၀. သီမောက္ကန္တိကပေယ္ယာလံ • 100. Sīmokkantikapeyyālaṃ
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝဂ္ဂ-အဋ္ဌကထာ • Mahāvagga-aṭṭhakathā / သီမောက္ကန္တိကပေယ္ယာလကထာ • Sīmokkantikapeyyālakathā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝဇိရဗုဒ္ဓိ-ဋီကာ • Vajirabuddhi-ṭīkā / သီမောက္ကန္တိကပေယ္ယာလကထာဝဏ္ဏနာ • Sīmokkantikapeyyālakathāvaṇṇanā
