| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
៥. សីហវគ្គោ
5. Sīhavaggo
១. សីហង្គបញ្ហោ
1. Sīhaṅgapañho
១. ‘‘ភន្តេ នាគសេន, ‘សីហស្ស សត្ត អង្គានិ គហេតព្ពានី’តិ យំ វទេសិ, កតមានិ តានិ សត្ត អង្គានិ គហេតព្ពានី’’តិ? ‘‘យថា, មហារាជ, សីហោ នាម សេតវិមលបរិសុទ្ធបណ្ឌរោ, ឯវមេវ ខោ, មហារាជ, យោគិនា យោគាវចរេន សេតវិមលបរិសុទ្ធបណ្ឌរចិត្តេន ព្យបគតកុក្កុច្ចេន ភវិតព្ពំ។ ឥទំ, មហារាជ, សីហស្ស បឋមំ អង្គំ គហេតព្ពំ។
1. ‘‘Bhante nāgasena, ‘sīhassa satta aṅgāni gahetabbānī’ti yaṃ vadesi, katamāni tāni satta aṅgāni gahetabbānī’’ti? ‘‘Yathā, mahārāja, sīho nāma setavimalaparisuddhapaṇḍaro, evameva kho, mahārāja, yoginā yogāvacarena setavimalaparisuddhapaṇḍaracittena byapagatakukkuccena bhavitabbaṃ. Idaṃ, mahārāja, sīhassa paṭhamaṃ aṅgaṃ gahetabbaṃ.
‘‘បុន ចបរំ, មហារាជ, សីហោ ចតុចរណោ វិក្កន្តចារី, ឯវមេវ ខោ, មហារាជ, យោគិនា យោគាវចរេន ចតុរិទ្ធិបាទចរណេន ភវិតព្ពំ។ ឥទំ, មហារាជ, សីហស្ស ទុតិយំ អង្គំ គហេតព្ពំ។
‘‘Puna caparaṃ, mahārāja, sīho catucaraṇo vikkantacārī, evameva kho, mahārāja, yoginā yogāvacarena caturiddhipādacaraṇena bhavitabbaṃ. Idaṃ, mahārāja, sīhassa dutiyaṃ aṅgaṃ gahetabbaṃ.
‘‘បុន ចបរំ, មហារាជ, សីហោ អភិរូបរុចិរកេសរី, ឯវមេវ ខោ, មហារាជ, យោគិនា យោគាវចរេន អភិរូបរុចិរសីលកេសរិនា ភវិតព្ពំ។ ឥទំ, មហារាជ, សីហស្ស តតិយំ អង្គំ គហេតព្ពំ។
‘‘Puna caparaṃ, mahārāja, sīho abhirūparucirakesarī, evameva kho, mahārāja, yoginā yogāvacarena abhirūparucirasīlakesarinā bhavitabbaṃ. Idaṃ, mahārāja, sīhassa tatiyaṃ aṅgaṃ gahetabbaṃ.
‘‘បុន ចបរំ, មហារាជ, សីហោ ជីវិតបរិយាទានេបិ ន កស្សចិ ឱនមតិ, ឯវមេវ ខោ, មហារាជ, យោគិនា យោគាវចរេន ចីវរបិណ្ឌបាតសេនាសនគិលានបច្ចយភេសជ្ជបរិក្ខារបរិយាទានេបិ ន កស្សចិ ឱនមិតព្ពំ។ ឥទំ, មហារាជ, សីហស្ស ចតុត្ថំ អង្គំ គហេតព្ពំ។
‘‘Puna caparaṃ, mahārāja, sīho jīvitapariyādānepi na kassaci onamati, evameva kho, mahārāja, yoginā yogāvacarena cīvarapiṇḍapātasenāsanagilānapaccayabhesajjaparikkhārapariyādānepi na kassaci onamitabbaṃ. Idaṃ, mahārāja, sīhassa catutthaṃ aṅgaṃ gahetabbaṃ.
‘‘បុន ចបរំ, មហារាជ, សីហោ សបទានភក្ខោ យស្មិំ ឱកាសេ និបតតិ, តត្ថេវ យាវទត្ថំ ភក្ខយតិ, ន វរមំសំ វិចិនាតិ, ឯវមេវ ខោ, មហារាជ, យោគិនា យោគាវចរេន សបទានភក្ខេន ភវិតព្ពំ, ន កុលានិ វិចិនិតព្ពានិ, ន បុព្ពគេហំ ហិត្វា កុលានិ ឧបសង្កមិតព្ពានិ, ន ភោជនំ វិចិនិតព្ពំ, យស្មិំ ឱកាសេ កពឡំ អាទីយតិ, តស្មិំ យេវ ឱកាសេ ភុញ្ជិតព្ពំ សរីរយាបនត្ថំ 1, ន វរភោជនំ វិចិនិតព្ពំ។ ឥទំ, មហារាជ, សីហស្ស បញ្ចមំ អង្គំ គហេតព្ពំ។
‘‘Puna caparaṃ, mahārāja, sīho sapadānabhakkho yasmiṃ okāse nipatati, tattheva yāvadatthaṃ bhakkhayati, na varamaṃsaṃ vicināti, evameva kho, mahārāja, yoginā yogāvacarena sapadānabhakkhena bhavitabbaṃ, na kulāni vicinitabbāni, na pubbagehaṃ hitvā kulāni upasaṅkamitabbāni, na bhojanaṃ vicinitabbaṃ, yasmiṃ okāse kabaḷaṃ ādīyati, tasmiṃ yeva okāse bhuñjitabbaṃ sarīrayāpanatthaṃ 2, na varabhojanaṃ vicinitabbaṃ. Idaṃ, mahārāja, sīhassa pañcamaṃ aṅgaṃ gahetabbaṃ.
‘‘បុន ចបរំ, មហារាជ, សីហោ អសន្និធិភក្ខោ, សកិំ គោចរំ ភក្ខយិត្វា ន បុន តំ ឧបគច្ឆតិ, ឯវមេវ ខោ, មហារាជ, យោគិនា យោគាវចរេន អសន្និធិការបរិភោគិនា ភវិតព្ពំ។ ឥទំ, មហារាជ, សីហស្ស ឆដ្ឋំ អង្គំ គហេតព្ពំ។
‘‘Puna caparaṃ, mahārāja, sīho asannidhibhakkho, sakiṃ gocaraṃ bhakkhayitvā na puna taṃ upagacchati, evameva kho, mahārāja, yoginā yogāvacarena asannidhikāraparibhoginā bhavitabbaṃ. Idaṃ, mahārāja, sīhassa chaṭṭhaṃ aṅgaṃ gahetabbaṃ.
‘‘បុន ចបរំ , មហារាជ, សីហោ ភោជនំ អលទ្ធា ន បរិតស្សតិ, លទ្ធាបិ ភោជនំ អគធិតោ 3 អមុច្ឆិតោ អនជ្ឈោសន្នោ បរិភុញ្ជតិ, ឯវមេវ ខោ, មហារាជ, យោគិនា យោគាវចរេន ភោជនំ អលទ្ធា ន បរិតស្សិតព្ពំ, លទ្ធាបិ ភោជនំ អគធិតេន អមុច្ឆិតេន អនជ្ឈោសន្នេន អាទីនវទស្សាវិនា និស្សរណបញ្ញេន បរិភុញ្ជិតព្ពំ។ ឥទំ, មហារាជ, សីហស្ស សត្តមំ អង្គំ គហេតព្ពំ។ ភាសិតម្បេតំ, មហារាជ, ភគវតា ទេវាតិទេវេន សំយុត្តនិកាយវរេ ថេរំ មហាកស្សបំ បរិកិត្តយមានេន –
‘‘Puna caparaṃ , mahārāja, sīho bhojanaṃ aladdhā na paritassati, laddhāpi bhojanaṃ agadhito 4 amucchito anajjhosanno paribhuñjati, evameva kho, mahārāja, yoginā yogāvacarena bhojanaṃ aladdhā na paritassitabbaṃ, laddhāpi bhojanaṃ agadhitena amucchitena anajjhosannena ādīnavadassāvinā nissaraṇapaññena paribhuñjitabbaṃ. Idaṃ, mahārāja, sīhassa sattamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena saṃyuttanikāyavare theraṃ mahākassapaṃ parikittayamānena –
‘សន្តុដ្ឋោយំ, ភិក្ខវេ, កស្សបោ ឥតរីតរេន បិណ្ឌបាតេន, ឥតរីតរបិណ្ឌបាតសន្តុដ្ឋិយា ច វណ្ណវាទី, ន ច បិណ្ឌបាតហេតុ អនេសនំ អប្បតិរូបំ អាបជ្ជតិ, អលទ្ធា ច បិណ្ឌបាតំ ន បរិតស្សតិ, លទ្ធា ច បិណ្ឌបាតំ អគធិតោ អមុច្ឆិតោ អនជ្ឈោសន្នោ អាទីនវទស្សាវី និស្សរណបញ្ញោ បរិភុញ្ជតី’’’តិ។
‘Santuṭṭhoyaṃ, bhikkhave, kassapo itarītarena piṇḍapātena, itarītarapiṇḍapātasantuṭṭhiyā ca vaṇṇavādī, na ca piṇḍapātahetu anesanaṃ appatirūpaṃ āpajjati, aladdhā ca piṇḍapātaṃ na paritassati, laddhā ca piṇḍapātaṃ agadhito amucchito anajjhosanno ādīnavadassāvī nissaraṇapañño paribhuñjatī’’’ti.
សីហង្គបញ្ហោ បឋមោ។
Sīhaṅgapañho paṭhamo.
Footnotes:
