| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
5. ஸீஹவக்³கோ³
5. Sīhavaggo
1. ஸீஹங்க³பஞ்ஹோ
1. Sīhaṅgapañho
1. ‘‘ப⁴ந்தே நாக³ஸேன, ‘ஸீஹஸ்ஸ ஸத்த அங்கா³னி க³ஹேதப்³பா³னீ’தி யங் வதே³ஸி, கதமானி தானி ஸத்த அங்கா³னி க³ஹேதப்³பா³னீ’’தி? ‘‘யதா², மஹாராஜ, ஸீஹோ நாம ஸேதவிமலபரிஸுத்³த⁴பண்ட³ரோ, ஏவமேவ கோ², மஹாராஜ, யோகி³னா யோகா³வசரேன ஸேதவிமலபரிஸுத்³த⁴பண்ட³ரசித்தேன ப்³யபக³தகுக்குச்சேன ப⁴விதப்³ப³ங். இத³ங், மஹாராஜ, ஸீஹஸ்ஸ பட²மங் அங்க³ங் க³ஹேதப்³ப³ங்.
1. ‘‘Bhante nāgasena, ‘sīhassa satta aṅgāni gahetabbānī’ti yaṃ vadesi, katamāni tāni satta aṅgāni gahetabbānī’’ti? ‘‘Yathā, mahārāja, sīho nāma setavimalaparisuddhapaṇḍaro, evameva kho, mahārāja, yoginā yogāvacarena setavimalaparisuddhapaṇḍaracittena byapagatakukkuccena bhavitabbaṃ. Idaṃ, mahārāja, sīhassa paṭhamaṃ aṅgaṃ gahetabbaṃ.
‘‘புன சபரங், மஹாராஜ, ஸீஹோ சதுசரணோ விக்கந்தசாரீ, ஏவமேவ கோ², மஹாராஜ, யோகி³னா யோகா³வசரேன சதுரித்³தி⁴பாத³சரணேன ப⁴விதப்³ப³ங். இத³ங், மஹாராஜ, ஸீஹஸ்ஸ து³தியங் அங்க³ங் க³ஹேதப்³ப³ங்.
‘‘Puna caparaṃ, mahārāja, sīho catucaraṇo vikkantacārī, evameva kho, mahārāja, yoginā yogāvacarena caturiddhipādacaraṇena bhavitabbaṃ. Idaṃ, mahārāja, sīhassa dutiyaṃ aṅgaṃ gahetabbaṃ.
‘‘புன சபரங், மஹாராஜ, ஸீஹோ அபி⁴ரூபருசிரகேஸரீ, ஏவமேவ கோ², மஹாராஜ, யோகி³னா யோகா³வசரேன அபி⁴ரூபருசிரஸீலகேஸரினா ப⁴விதப்³ப³ங். இத³ங், மஹாராஜ, ஸீஹஸ்ஸ ததியங் அங்க³ங் க³ஹேதப்³ப³ங்.
‘‘Puna caparaṃ, mahārāja, sīho abhirūparucirakesarī, evameva kho, mahārāja, yoginā yogāvacarena abhirūparucirasīlakesarinā bhavitabbaṃ. Idaṃ, mahārāja, sīhassa tatiyaṃ aṅgaṃ gahetabbaṃ.
‘‘புன சபரங், மஹாராஜ, ஸீஹோ ஜீவிதபரியாதா³னேபி ந கஸ்ஸசி ஓனமதி, ஏவமேவ கோ², மஹாராஜ, யோகி³னா யோகா³வசரேன சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரபரியாதா³னேபி ந கஸ்ஸசி ஓனமிதப்³ப³ங். இத³ங், மஹாராஜ, ஸீஹஸ்ஸ சதுத்த²ங் அங்க³ங் க³ஹேதப்³ப³ங்.
‘‘Puna caparaṃ, mahārāja, sīho jīvitapariyādānepi na kassaci onamati, evameva kho, mahārāja, yoginā yogāvacarena cīvarapiṇḍapātasenāsanagilānapaccayabhesajjaparikkhārapariyādānepi na kassaci onamitabbaṃ. Idaṃ, mahārāja, sīhassa catutthaṃ aṅgaṃ gahetabbaṃ.
‘‘புன சபரங், மஹாராஜ, ஸீஹோ ஸபதா³னப⁴க்கோ² யஸ்மிங் ஓகாஸே நிபததி, தத்தே²வ யாவத³த்த²ங் ப⁴க்க²யதி, ந வரமங்ஸங் விசினாதி, ஏவமேவ கோ², மஹாராஜ, யோகி³னா யோகா³வசரேன ஸபதா³னப⁴க்கே²ன ப⁴விதப்³ப³ங், ந குலானி விசினிதப்³பா³னி, ந புப்³ப³கே³ஹங் ஹித்வா குலானி உபஸங்கமிதப்³பா³னி, ந போ⁴ஜனங் விசினிதப்³ப³ங், யஸ்மிங் ஓகாஸே கப³ளங் ஆதீ³யதி, தஸ்மிங் யேவ ஓகாஸே பு⁴ஞ்ஜிதப்³ப³ங் ஸரீரயாபனத்த²ங் 1, ந வரபோ⁴ஜனங் விசினிதப்³ப³ங். இத³ங், மஹாராஜ, ஸீஹஸ்ஸ பஞ்சமங் அங்க³ங் க³ஹேதப்³ப³ங்.
‘‘Puna caparaṃ, mahārāja, sīho sapadānabhakkho yasmiṃ okāse nipatati, tattheva yāvadatthaṃ bhakkhayati, na varamaṃsaṃ vicināti, evameva kho, mahārāja, yoginā yogāvacarena sapadānabhakkhena bhavitabbaṃ, na kulāni vicinitabbāni, na pubbagehaṃ hitvā kulāni upasaṅkamitabbāni, na bhojanaṃ vicinitabbaṃ, yasmiṃ okāse kabaḷaṃ ādīyati, tasmiṃ yeva okāse bhuñjitabbaṃ sarīrayāpanatthaṃ 2, na varabhojanaṃ vicinitabbaṃ. Idaṃ, mahārāja, sīhassa pañcamaṃ aṅgaṃ gahetabbaṃ.
‘‘புன சபரங், மஹாராஜ, ஸீஹோ அஸன்னிதி⁴ப⁴க்கோ², ஸகிங் கோ³சரங் ப⁴க்க²யித்வா ந புன தங் உபக³ச்ச²தி, ஏவமேவ கோ², மஹாராஜ, யோகி³னா யோகா³வசரேன அஸன்னிதி⁴காரபரிபோ⁴கி³னா ப⁴விதப்³ப³ங். இத³ங், மஹாராஜ, ஸீஹஸ்ஸ ச²ட்ட²ங் அங்க³ங் க³ஹேதப்³ப³ங்.
‘‘Puna caparaṃ, mahārāja, sīho asannidhibhakkho, sakiṃ gocaraṃ bhakkhayitvā na puna taṃ upagacchati, evameva kho, mahārāja, yoginā yogāvacarena asannidhikāraparibhoginā bhavitabbaṃ. Idaṃ, mahārāja, sīhassa chaṭṭhaṃ aṅgaṃ gahetabbaṃ.
‘‘புன சபரங் , மஹாராஜ, ஸீஹோ போ⁴ஜனங் அலத்³தா⁴ ந பரிதஸ்ஸதி, லத்³தா⁴பி போ⁴ஜனங் அக³தி⁴தோ 3 அமுச்சி²தோ அனஜ்ஜோ²ஸன்னோ பரிபு⁴ஞ்ஜதி, ஏவமேவ கோ², மஹாராஜ, யோகி³னா யோகா³வசரேன போ⁴ஜனங் அலத்³தா⁴ ந பரிதஸ்ஸிதப்³ப³ங், லத்³தா⁴பி போ⁴ஜனங் அக³தி⁴தேன அமுச்சி²தேன அனஜ்ஜோ²ஸன்னேன ஆதீ³னவத³ஸ்ஸாவினா நிஸ்ஸரணபஞ்ஞேன பரிபு⁴ஞ்ஜிதப்³ப³ங். இத³ங், மஹாராஜ, ஸீஹஸ்ஸ ஸத்தமங் அங்க³ங் க³ஹேதப்³ப³ங். பா⁴ஸிதம்பேதங், மஹாராஜ, ப⁴க³வதா தே³வாதிதே³வேன ஸங்யுத்தனிகாயவரே தே²ரங் மஹாகஸ்ஸபங் பரிகித்தயமானேன –
‘‘Puna caparaṃ , mahārāja, sīho bhojanaṃ aladdhā na paritassati, laddhāpi bhojanaṃ agadhito 4 amucchito anajjhosanno paribhuñjati, evameva kho, mahārāja, yoginā yogāvacarena bhojanaṃ aladdhā na paritassitabbaṃ, laddhāpi bhojanaṃ agadhitena amucchitena anajjhosannena ādīnavadassāvinā nissaraṇapaññena paribhuñjitabbaṃ. Idaṃ, mahārāja, sīhassa sattamaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena saṃyuttanikāyavare theraṃ mahākassapaṃ parikittayamānena –
‘ஸந்துட்டோ²யங், பி⁴க்க²வே, கஸ்ஸபோ இதரீதரேன பிண்ட³பாதேன, இதரீதரபிண்ட³பாதஸந்துட்டி²யா ச வண்ணவாதீ³, ந ச பிண்ட³பாதஹேது அனேஸனங் அப்பதிரூபங் ஆபஜ்ஜதி, அலத்³தா⁴ ச பிண்ட³பாதங் ந பரிதஸ்ஸதி, லத்³தா⁴ ச பிண்ட³பாதங் அக³தி⁴தோ அமுச்சி²தோ அனஜ்ஜோ²ஸன்னோ ஆதீ³னவத³ஸ்ஸாவீ நிஸ்ஸரணபஞ்ஞோ பரிபு⁴ஞ்ஜதீ’’’தி.
‘Santuṭṭhoyaṃ, bhikkhave, kassapo itarītarena piṇḍapātena, itarītarapiṇḍapātasantuṭṭhiyā ca vaṇṇavādī, na ca piṇḍapātahetu anesanaṃ appatirūpaṃ āpajjati, aladdhā ca piṇḍapātaṃ na paritassati, laddhā ca piṇḍapātaṃ agadhito amucchito anajjhosanno ādīnavadassāvī nissaraṇapañño paribhuñjatī’’’ti.
ஸீஹங்க³பஞ்ஹோ பட²மோ.
Sīhaṅgapañho paṭhamo.
Footnotes:
