| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၂. သီဟနာဒဝဂ္ဂော
2. Sīhanādavaggo
၁. သီဟနာဒသုတ္တဝဏ္ဏနာ
1. Sīhanādasuttavaṇṇanā
၁၁. ဒုတိယသ္သ ပဌမေ အဝာပုရေန္တိ ဝိဝရန္တိ ဒ္ဝာရံ ဧတေနာတိ အဝာပုရဏံ။ ရဇံ ဟရန္တိ ဧတေနာတိ ရဇောဟရဏံ။ ကဠောပိဟတ္ထောတိ ဝိလီဝမယဘာဇနဟတ္ထော, ‘‘စမ္မမယဘာဇနဟတ္ထော’’တိ စ ဝဒန္တိ။ ဆိန္နာနိ ဝိသာဏာနိ ဧတသ္သာတိ ဆိန္နဝိသာဏော, ဥသဘော စ သော ဆိန္နဝိသာဏော စာတိ ဥသဘဆိန္နဝိသာဏော။ ဝိသေသနပရောယံ သမာသော။ အဟိကုဏပေန ဝာတိအာဒိ အတိဇေဂုစ္ဆပ္ပဋိကူလကုဏပဒသ္သနတ္ထံ ဝုတ္တံ။ ကဏ္ဌေ အာသတ္တေနာတိ ကေနစိဒေဝ ပစ္စတ္ထိကေန အာနေတ္ဝာ ကဏ္ဌေ ဗဒ္ဓေန, ဩမုက္ကေနာတိ အတ္ထော။ အဋ္ဋော အာတုရော ဒုဂ္ဂန္ဓပီဠာယ ပီဠိတော။ အစ္စယသ္သ ပဋိဂ္ဂဏ္ဟနံ ဝာ အဓိဝာသနံ။ ဧဝဉ္ဟိ သော ကာရဏေ ဒေသိယမာနေ တတော ဝိဂတော နာမ ဟောတိ။ တေနာဟ ‘‘ပဋိဂ္ဂဏ္ဟတူတိ ခမတူ’’တိ။ သေသမေတ္ထ သုဝိညေယ္ယမေဝ။
11. Dutiyassa paṭhame avāpurenti vivaranti dvāraṃ etenāti avāpuraṇaṃ. Rajaṃ haranti etenāti rajoharaṇaṃ. Kaḷopihatthoti vilīvamayabhājanahattho, ‘‘cammamayabhājanahattho’’ti ca vadanti. Chinnāni visāṇāni etassāti chinnavisāṇo, usabho ca so chinnavisāṇo cāti usabhachinnavisāṇo. Visesanaparoyaṃ samāso. Ahikuṇapena vātiādi atijegucchappaṭikūlakuṇapadassanatthaṃ vuttaṃ. Kaṇṭhe āsattenāti kenacideva paccatthikena ānetvā kaṇṭhe baddhena, omukkenāti attho. Aṭṭo āturo duggandhapīḷāya pīḷito. Accayassa paṭiggaṇhanaṃ vā adhivāsanaṃ. Evañhi so kāraṇe desiyamāne tato vigato nāma hoti. Tenāha ‘‘paṭiggaṇhatūti khamatū’’ti. Sesamettha suviññeyyameva.
သီဟနာဒသုတ္တဝဏ္ဏနာ နိဋ္ဌိတာ။
Sīhanādasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁. သီဟနာဒသုတ္တံ • 1. Sīhanādasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁. သီဟနာဒသုတ္တဝဏ္ဏနာ • 1. Sīhanādasuttavaṇṇanā
