| Library / Tipiṭaka / তিপিটক • Tipiṭaka / পেতৰত্থুপাল়ি • Petavatthupāḷi |
১৬. সট্ঠিকূটপেতৰত্থু
16. Saṭṭhikūṭapetavatthu
৮০৬.
806.
‘‘কিং নু উম্মত্তরূপোৰ, মিগো ভন্তোৰ ধাৰসি।
‘‘Kiṃ nu ummattarūpova, migo bhantova dhāvasi;
নিস্সংসযং পাপকম্মন্তো 1, কিং নু সদ্দাযসে তুৰ’’ন্তি॥
Nissaṃsayaṃ pāpakammanto 2, kiṃ nu saddāyase tuva’’nti.
৮০৭.
807.
‘‘অহং ভদন্তে পেতোম্হি, দুগ্গতো যমলোকিকো।
‘‘Ahaṃ bhadante petomhi, duggato yamalokiko;
পাপকম্মং করিত্ৰান, পেতলোকং ইতো গতো॥
Pāpakammaṃ karitvāna, petalokaṃ ito gato.
৮০৮.
808.
‘‘সট্ঠি কূটসহস্সানি, পরিপুণ্ণানি সব্বসো।
‘‘Saṭṭhi kūṭasahassāni, paripuṇṇāni sabbaso;
সীসে ময্হং নিপতন্তি, তে ভিন্দন্তি চ মত্থক’’ন্তি॥
Sīse mayhaṃ nipatanti, te bhindanti ca matthaka’’nti.
৮০৯.
809.
‘‘কিং নু কাযেন ৰাচায, মনসা দুক্কটং কতং।
‘‘Kiṃ nu kāyena vācāya, manasā dukkaṭaṃ kataṃ;
কিস্স কম্মৰিপাকেন, ইদং দুক্খং নিগচ্ছসি॥
Kissa kammavipākena, idaṃ dukkhaṃ nigacchasi.
৮১০.
810.
‘‘সট্ঠি কূটসহস্সানি, পরিপুণ্ণানি সব্বসো।
‘‘Saṭṭhi kūṭasahassāni, paripuṇṇāni sabbaso;
সীসে তুয্হং নিপতন্তি, তে ভিন্দন্তি চ মত্থক’’ন্তি॥
Sīse tuyhaṃ nipatanti, te bhindanti ca matthaka’’nti.
৮১১.
811.
‘‘অথদ্দসাসিং সম্বুদ্ধং, সুনেত্তং ভাৰিতিন্দ্রিযং।
‘‘Athaddasāsiṃ sambuddhaṃ, sunettaṃ bhāvitindriyaṃ;
নিসিন্নং রুক্খমূলস্মিং, ঝাযন্তং অকুতোভযং॥
Nisinnaṃ rukkhamūlasmiṃ, jhāyantaṃ akutobhayaṃ.
৮১২.
812.
‘‘সালিত্তকপ্পহারেন, ভিন্দিস্সং তস্স মত্থকং।
‘‘Sālittakappahārena, bhindissaṃ tassa matthakaṃ;
তস্স কম্মৰিপাকেন, ইদং দুক্খং নিগচ্ছিসং॥
Tassa kammavipākena, idaṃ dukkhaṃ nigacchisaṃ.
৮১৩.
813.
‘‘সট্ঠি কূটসহস্সানি, পরিপুণ্ণানি সব্বসো।
‘‘Saṭṭhi kūṭasahassāni, paripuṇṇāni sabbaso;
সীসে ময্হং নিপতন্তি, তে ভিন্দন্তি চ 3 মত্থক’’ন্তি॥
Sīse mayhaṃ nipatanti, te bhindanti ca 4 matthaka’’nti.
৮১৪.
814.
‘‘ধম্মেন তে কাপুরিস, সট্ঠিকূটসহস্সানি, পরিপুণ্ণানি সব্বসো।
‘‘Dhammena te kāpurisa, saṭṭhikūṭasahassāni, paripuṇṇāni sabbaso;
সীসে তুয্হং নিপতন্তি, তে ভিন্দন্তি চ মত্থক’’ন্তি॥
Sīse tuyhaṃ nipatanti, te bhindanti ca matthaka’’nti.
সট্ঠিকূটপেতৰত্থু সোল়সমং।
Saṭṭhikūṭapetavatthu soḷasamaṃ.
মহাৰগ্গো চতুত্থো নিট্ঠিতো।
Mahāvaggo catuttho niṭṭhito.
তস্সুদ্দানং –
Tassuddānaṃ –
অম্বসক্করো সেরীসকো, পিঙ্গলো রেৰতি উচ্ছু।
Ambasakkaro serīsako, piṅgalo revati ucchu;
দ্ৰে কুমারা দুৰে গূথা, গণপাটলিঅম্বৰনং॥
Dve kumārā duve gūthā, gaṇapāṭaliambavanaṃ.
অক্খরুক্খভোগসংহরা, সেট্ঠিপুত্তসট্ঠিকূটা।
Akkharukkhabhogasaṃharā, seṭṭhiputtasaṭṭhikūṭā;
ইতি সোল়সৰত্থূনি, ৰগ্গো তেন পৰুচ্চতি॥
Iti soḷasavatthūni, vaggo tena pavuccati.
অথ ৰগ্গুদ্দানং –
Atha vagguddānaṃ –
উরগো উপরিৰগ্গো, চূল়মহাতি চতুধা।
Urago uparivaggo, cūḷamahāti catudhā;
ৰত্থূনি একপঞ্ঞাসং, চতুধা ভাণৰারতো॥
Vatthūni ekapaññāsaṃ, catudhā bhāṇavārato.
পেতৰত্থুপাল়ি নিট্ঠিতা।
Petavatthupāḷi niṭṭhitā.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পেতৰত্থু-অট্ঠকথা • Petavatthu-aṭṭhakathā / ১৬. সট্ঠিকূটপেতৰত্থুৰণ্ণনা • 16. Saṭṭhikūṭapetavatthuvaṇṇanā
