| Library / Tipiṭaka / तिपिटक • Tipiṭaka / संयुत्तनिकाय (टीका) • Saṃyuttanikāya (ṭīkā) |
४. सत्तवस्सानुबन्धसुत्तवण्णना
4. Sattavassānubandhasuttavaṇṇanā
१६०. यस्मा कपिलवत्थुतो निक्खन्तकालतो पट्ठाय मारो ओतारापेक्खो लोकनाथं अनुबन्धितुं आरद्धो, तस्मा वुत्तं ‘‘पुरे बोधिया छब्बस्सानी’’ति। अतिगहेत्वाति अनुगन्त्वा तस्स यथारुचि पटिपत्तिं अनुवत्तो विय हुत्वा।
160. Yasmā kapilavatthuto nikkhantakālato paṭṭhāya māro otārāpekkho lokanāthaṃ anubandhituṃ āraddho, tasmā vuttaṃ ‘‘pure bodhiyā chabbassānī’’ti. Atigahetvāti anugantvā tassa yathāruci paṭipattiṃ anuvatto viya hutvā.
अवज्झायन्तोति पज्झायन्तो। जितो वित्तपराजितो असि नु। पमाणातिक्कन्तन्ति गरुतरं।
Avajjhāyantoti pajjhāyanto. Jito vittaparājito asi nu. Pamāṇātikkantanti garutaraṃ.
खनित्वा उम्मूलेत्वा। कामासवादीनि पजहन्तो अनासवो।
Khanitvā ummūletvā. Kāmāsavādīni pajahanto anāsavo.
पेहीति अपेहि। पारगामिनोति पारङ्गमनसीला। तेकालिको अयं गामि-सद्दोति आह ‘‘येपी’’तिआदि।
Pehīti apehi. Pāragāminoti pāraṅgamanasīlā. Tekāliko ayaṃ gāmi-saddoti āha ‘‘yepī’’tiādi.
मारविसूकानीति मारकण्टकानि कण्टकसदिसानि मारस्स दुराचारानि। विरुद्धसेवितानि विरोधवसेन तासंयेव वेवचनानि। तानि सरूपतो दस्सेतुं ‘‘अप्पमायू’’तिआदि वुत्तं। निब्बेजनीयाति निब्बेददायिका। उक्कण्ठनीयाति उक्कण्ठवहा।
Māravisūkānīti mārakaṇṭakāni kaṇṭakasadisāni mārassa durācārāni. Viruddhasevitāni virodhavasena tāsaṃyeva vevacanāni. Tāni sarūpato dassetuṃ ‘‘appamāyū’’tiādi vuttaṃ. Nibbejanīyāti nibbedadāyikā. Ukkaṇṭhanīyāti ukkaṇṭhavahā.
विकप्पवसेन वेदितब्बो ओपम्मपरिकप्पविसयत्ता तस्स किरियापदस्स। तेनाह ‘‘अनुपरिगच्छेय्या’’ति। एत्थाति एतस्मिं मेदवण्णवत्थुस्मिं। मुदुन्ति मुदुमधुरसं विन्देय्याम पटिलभेय्याम। अस्सादोति अस्सादेतब्बो।
Vikappavasenaveditabbo opammaparikappavisayattā tassa kiriyāpadassa. Tenāha ‘‘anuparigaccheyyā’’ti. Etthāti etasmiṃ medavaṇṇavatthusmiṃ. Mudunti mudumadhurasaṃ vindeyyāma paṭilabheyyāma. Assādoti assādetabbo.
सत्तवस्सानुबन्धसुत्तवण्णना निट्ठिता।
Sattavassānubandhasuttavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / ४. सत्तवस्सानुबन्धसुत्तं • 4. Sattavassānubandhasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ४. सत्तवस्सानुबन्धसुत्तवण्णना • 4. Sattavassānubandhasuttavaṇṇanā
