| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၅. သတ္တဋ္ဌာနသုတ္တဝဏ္ဏနာ
5. Sattaṭṭhānasuttavaṇṇanā
၅၇. သတ္တသု ဩကာသေသူတိ ရူပပဇာနနာဒီသု သတ္တသု ဩကာသေသု။ ဝုသိတဝာသောတိ ဝုသိတအရိယဝာသော။ ဧတ္ထာတိ ဣမသ္မိံ ဥဒ္ဒေသေ။ သေသံ နာမ ဣဓ ဝုတ္တာဝသေသံ။ ဝုတ္တနယေနာတိ ဟေဋ္ဌာ ဝုတ္တနယေန ဝေဒိတဗ္ဗံ။ ဥသ္သဒနန္ဒိယန္တိ ဥသ္သန္နဂုဏဝတော တောသနံ သမ္မောဒာပနံ။ ဂုဏကိတ္တနေန ပလောဘနီယံ သေက္ခကလ္ယာဏပုထုဇ္ဇနာနံ ပသာဒုပ္ပာဒနေန။ ဣဒာနိ ဝုတ္တမေဝ အတ္ထံ ပာကဋံ ကာတုံ ‘‘ယထာ ဟီ’’တိအာဒိ ဝုတ္တံ။
57.Sattasuokāsesūti rūpapajānanādīsu sattasu okāsesu. Vusitavāsoti vusitaariyavāso. Etthāti imasmiṃ uddese. Sesaṃ nāma idha vuttāvasesaṃ. Vuttanayenāti heṭṭhā vuttanayena veditabbaṃ. Ussadanandiyanti ussannaguṇavato tosanaṃ sammodāpanaṃ. Guṇakittanena palobhanīyaṃ sekkhakalyāṇaputhujjanānaṃ pasāduppādanena. Idāni vuttameva atthaṃ pākaṭaṃ kātuṃ ‘‘yathā hī’’tiādi vuttaṃ.
ဧတ္တာဝတာတိ ပဉ္စန္နံ ခန္ဓာနံ ဝသေန သတ္တသု ဌာနေသု ကောသလ္လဒီပနေန ဧတ္တကေန ဒေသနာက္ကမေန။ တန္တိ အာရမ္မဏံ။ ဓာတုအာဒိမတ္တမေဝာတိ ဓာတာယတနပဋိစ္စသမုပ္ပာဒမတ္တမေဝ။ ဣမေသု ဓမ္မေသူတိ ဣမေသု ဇာတာဒီသု။ ကမ္မံ ကတ္ဝာတိ သမ္မသနကမ္မံ နိဋ္ဌပေတ္ဝာတိ အတ္ထော။ ဧဝမေတ္ထ ပဉ္စန္နံ ခန္ဓာနံ ဝသေန သတ္တဋ္ဌာနကောသလ္လပဝတ္တိယာ ပဘေဒေန ဝိဘဇိတ္ဝာ ‘‘တိဝိဓူပပရိက္ခီ’’တိ ဒသ္သေတိ ဓမ္မရာဇာ။
Ettāvatāti pañcannaṃ khandhānaṃ vasena sattasu ṭhānesu kosalladīpanena ettakena desanākkamena. Tanti ārammaṇaṃ. Dhātuādimattamevāti dhātāyatanapaṭiccasamuppādamattameva. Imesu dhammesūti imesu jātādīsu. Kammaṃ katvāti sammasanakammaṃ niṭṭhapetvāti attho. Evamettha pañcannaṃ khandhānaṃ vasena sattaṭṭhānakosallapavattiyā pabhedena vibhajitvā ‘‘tividhūpaparikkhī’’ti dasseti dhammarājā.
သတ္တဋ္ဌာနသုတ္တဝဏ္ဏနာ နိဋ္ဌိတာ။
Sattaṭṭhānasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၅. သတ္တဋ္ဌာနသုတ္တံ • 5. Sattaṭṭhānasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၅. သတ္တဋ္ဌာနသုတ္တဝဏ္ဏနာ • 5. Sattaṭṭhānasuttavaṇṇanā
