| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၁၁၁. သတ္တန္နံ အပ္ပဟိတေပိ အနုဇာနနာ
111. Sattannaṃ appahitepi anujānanā
၁၉၈. တေန ခော ပန သမယေန အညတရသ္သ ဘိက္ခုနော မာတာ ဂိလာနာ ဟောတိ။ သာ ပုတ္တသ္သ သန္တိကေ ဒူတံ ပာဟေသိ – ‘‘အဟဉ္ဟိ ဂိလာနာ, အာဂစ္ဆတု မေ ပုတ္တော, ဣစ္ဆာမိ ပုတ္တသ္သ အာဂတ’’န္တိ။ အထ ခော တသ္သ ဘိက္ခုနော ဧတဒဟောသိ – ‘‘ဘဂဝတာ ပညတ္တံ သတ္တန္နံ သတ္တာဟကရဏီယေန ပဟိတေ ဂန္တုံ, န တ္ဝေဝ အပ္ပဟိတေ; ပဉ္စန္နံ သတ္တာဟကရဏီယေန အပ္ပဟိတေပိ ဂန္တုံ, ပဂေဝ ပဟိတေတိ။ အယဉ္စ မေ မာတာ ဂိလာနာ, သာ စ အနုပာသိကာ, ကထံ နု ခော မယာ ပဋိပဇ္ဇိတဗ္ဗ’’န္တိ? ဘဂဝတော ဧတမတ္ထံ အာရောစေသုံ။ အနုဇာနာမိ, ဘိက္ခဝေ, သတ္တန္နံ သတ္တာဟကရဏီယေန အပ္ပဟိတေပိ ဂန္တုံ, ပဂေဝ ပဟိတေ။ ဘိက္ခုသ္သ, ဘိက္ခုနိယာ, သိက္ခမာနာယ, သာမဏေရသ္သ, သာမဏေရိယာ, မာတုယာ စ ပိတုသ္သ စ – အနုဇာနာမိ, ဘိက္ခဝေ, ဣမေသံ သတ္တန္နံ သတ္တာဟကရဏီယေန အပ္ပဟိတေပိ ဂန္တုံ, ပဂေဝ ပဟိတေ။ သတ္တာဟံ သန္နိဝတ္တော ကာတဗ္ဗော။
198. Tena kho pana samayena aññatarassa bhikkhuno mātā gilānā hoti. Sā puttassa santike dūtaṃ pāhesi – ‘‘ahañhi gilānā, āgacchatu me putto, icchāmi puttassa āgata’’nti. Atha kho tassa bhikkhuno etadahosi – ‘‘bhagavatā paññattaṃ sattannaṃ sattāhakaraṇīyena pahite gantuṃ, na tveva appahite; pañcannaṃ sattāhakaraṇīyena appahitepi gantuṃ, pageva pahiteti. Ayañca me mātā gilānā, sā ca anupāsikā, kathaṃ nu kho mayā paṭipajjitabba’’nti? Bhagavato etamatthaṃ ārocesuṃ. Anujānāmi, bhikkhave, sattannaṃ sattāhakaraṇīyena appahitepi gantuṃ, pageva pahite. Bhikkhussa, bhikkhuniyā, sikkhamānāya, sāmaṇerassa, sāmaṇeriyā, mātuyā ca pitussa ca – anujānāmi, bhikkhave, imesaṃ sattannaṃ sattāhakaraṇīyena appahitepi gantuṃ, pageva pahite. Sattāhaṃ sannivatto kātabbo.
ဣဓ ပန, ဘိက္ခဝေ, ဘိက္ခုသ္သ မာတာ ဂိလာနာ ဟောတိ။ သာ စေ ပုတ္တသ္သ သန္တိကေ ဒူတံ ပဟိဏေယ္ယ – ‘‘အဟဉ္ဟိ ဂိလာနာ, အာဂစ္ဆတု မေ ပုတ္တော, ဣစ္ဆာမိ ပုတ္တသ္သ အာဂတ’’န္တိ, ဂန္တဗ္ဗံ, ဘိက္ခဝေ, သတ္တာဟကရဏီယေန, အပ္ပဟိတေပိ, ပဂေဝ ပဟိတေ – ‘‘ဂိလာနဘတ္တံ ဝာ ပရိယေသိသ္သာမိ, ဂိလာနုပဋ္ဌာကဘတ္တံ ဝာ ပရိယေသိသ္သာမိ, ဂိလာနဘေသဇ္ဇံ ဝာ ပရိယေသိသ္သာမိ, ပုစ္ဆိသ္သာမိ ဝာ, ဥပဋ္ဌဟိသ္သာမိ ဝာ’’တိ။ သတ္တာဟံ သန္နိဝတ္တော ကာတဗ္ဗော။
Idha pana, bhikkhave, bhikkhussa mātā gilānā hoti. Sā ce puttassa santike dūtaṃ pahiṇeyya – ‘‘ahañhi gilānā, āgacchatu me putto, icchāmi puttassa āgata’’nti, gantabbaṃ, bhikkhave, sattāhakaraṇīyena, appahitepi, pageva pahite – ‘‘gilānabhattaṃ vā pariyesissāmi, gilānupaṭṭhākabhattaṃ vā pariyesissāmi, gilānabhesajjaṃ vā pariyesissāmi, pucchissāmi vā, upaṭṭhahissāmi vā’’ti. Sattāhaṃ sannivatto kātabbo.
ဣဓ ပန, ဘိက္ခဝေ, ဘိက္ခုသ္သ ပိတာ ဂိလာနော ဟောတိ။ သော စေ ပုတ္တသ္သ သန္တိကေ ဒူတံ ပဟိဏေယ္ယ – ‘‘အဟဉ္ဟိ ဂိလာနော, အာဂစ္ဆတု မေ ပုတ္တော, ဣစ္ဆာမိ ပုတ္တသ္သ အာဂတ’’န္တိ, ဂန္တဗ္ဗံ, ဘိက္ခဝေ, သတ္တာဟကရဏီယေန, အပ္ပဟိတေပိ, ပဂေဝ ပဟိတေ – ‘‘ဂိလာနဘတ္တံ ဝာ ပရိယေသိသ္သာမိ, ဂိလာနုပဋ္ဌာကဘတ္တံ ဝာ ပရိယေသိသ္သာမိ, ဂိလာနဘေသဇ္ဇံ ဝာ ပရိယေသိသ္သာမိ, ပုစ္ဆိသ္သာမိ ဝာ, ဥပဋ္ဌဟိသ္သာမိ ဝာ’’တိ။ သတ္တာဟံ သန္နိဝတ္တော ကာတဗ္ဗော။
Idha pana, bhikkhave, bhikkhussa pitā gilāno hoti. So ce puttassa santike dūtaṃ pahiṇeyya – ‘‘ahañhi gilāno, āgacchatu me putto, icchāmi puttassa āgata’’nti, gantabbaṃ, bhikkhave, sattāhakaraṇīyena, appahitepi, pageva pahite – ‘‘gilānabhattaṃ vā pariyesissāmi, gilānupaṭṭhākabhattaṃ vā pariyesissāmi, gilānabhesajjaṃ vā pariyesissāmi, pucchissāmi vā, upaṭṭhahissāmi vā’’ti. Sattāhaṃ sannivatto kātabbo.
သတ္တန္နံ အပ္ပဟိတေပိ အနုဇာနနာ နိဋ္ဌိတာ။
Sattannaṃ appahitepi anujānanā niṭṭhitā.
