| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၂. ဒုတိယဝဂ္ဂော
2. Dutiyavaggo
၁. သတ္တဓာတုသုတ္တဝဏ္ဏနာ
1. Sattadhātusuttavaṇṇanā
၉၅. ဒုတိယဝဂ္ဂသ္သ ပဌမေ အာဘာဓာတူတိ အာလောကဓာတု။ အာလောကသ္သပိ အာလောကကသိဏေ ပရိကမ္မံ ကတ္ဝာ ဥပ္ပန္နဇ္ဈာနသ္သာပီတိ သဟာရမ္မဏသ္သ ဈာနသ္သ ဧတံ နာမံ။ သုဘဓာတူတိ သုဘကသိဏေ ဥပ္ပန္နဇ္ဈာနဝသေန သဟာရမ္မဏဇ္ဈာနမေဝ ။ အာကာသာနဉ္စာယတနမေဝ အာကာသာနဉ္စာယတနဓာတု။ သညာဝေဒယိတနိရောဓောဝ သညာဝေဒယိတနိရောဓဓာတု။ ဣတိ ဘဂဝာ အနုသန္ဓိကုသလသ္သ ဘိက္ခုနော တတ္ထ နိသီဒိတ္ဝာ ပဉ္ဟံ ပုစ္ဆိတုကာမသ္သ ဩကာသံ ဒေန္တော ဒေသနံ နိဋ္ဌာပေသိ။
95. Dutiyavaggassa paṭhame ābhādhātūti ālokadhātu. Ālokassapi ālokakasiṇe parikammaṃ katvā uppannajjhānassāpīti sahārammaṇassa jhānassa etaṃ nāmaṃ. Subhadhātūti subhakasiṇe uppannajjhānavasena sahārammaṇajjhānameva . Ākāsānañcāyatanameva ākāsānañcāyatanadhātu. Saññāvedayitanirodhova saññāvedayitanirodhadhātu. Iti bhagavā anusandhikusalassa bhikkhuno tattha nisīditvā pañhaṃ pucchitukāmassa okāsaṃ dento desanaṃ niṭṭhāpesi.
အန္ဓကာရံ ပဋိစ္စာတိ အန္ဓကာရော ဟိ အာလောကေန ပရိစ္ဆိန္နော, အာလောကောပိ အန္ဓကာရေန။ အန္ဓကာရေန ဟိ သော ပာကဋော ဟောတိ။ တသ္မာ ‘‘အန္ဓကာရံ ပဋိစ္စ ပညာယတီ’’တိ အာဟ။ အသုဘံ ပဋိစ္စာတိ ဧတ္ထာပိ ဧသေဝ နယော။ အသုဘဉ္ဟိ သုဘေန, သုဘဉ္စ အသုဘေန ပရိစ္ဆိန္နံ, အသုဘေ သတိ သုဘံ ပညာယတိ, တသ္မာ ဧဝမာဟ။ ရူပံ ပဋိစ္စာတိ ရူပာဝစရသမာပတ္တိံ ပဋိစ္စ။ ရူပာဝစရသမာပတ္တိယာ ဟိ သတိ အာကာသာနဉ္စာယတနသမာပတ္တိ နာမ ဟောတိ ရူပသမတိက္ကမော ဝာ, တသ္မာ ဧဝမာဟ။ ဝိညာဏဉ္စာယတနဓာတုအာဒီသုပိ ဧသေဝ နယော။ နိရောဓံ ပဋိစ္စာတိ စတုန္နံ ခန္ဓာနံ ပဋိသင္ခာအပ္ပဝတ္တိံ ပဋိစ္စ။ ခန္ဓနိရောဓဉ္ဟိ ပဋိစ္စ နိရောဓသမာပတ္တိ နာမ ပညာယတိ, န ခန္ဓပဝတ္တိံ, တသ္မာ ဧဝမာဟ။ ဧတ္ထ စ စတုန္နံ ခန္ဓာနံ နိရောဓောဝ နိရောဓသမာပတ္တီတိ ဝေဒိတဗ္ဗော။
Andhakāraṃpaṭiccāti andhakāro hi ālokena paricchinno, ālokopi andhakārena. Andhakārena hi so pākaṭo hoti. Tasmā ‘‘andhakāraṃ paṭicca paññāyatī’’ti āha. Asubhaṃ paṭiccāti etthāpi eseva nayo. Asubhañhi subhena, subhañca asubhena paricchinnaṃ, asubhe sati subhaṃ paññāyati, tasmā evamāha. Rūpaṃ paṭiccāti rūpāvacarasamāpattiṃ paṭicca. Rūpāvacarasamāpattiyā hi sati ākāsānañcāyatanasamāpatti nāma hoti rūpasamatikkamo vā, tasmā evamāha. Viññāṇañcāyatanadhātuādīsupi eseva nayo. Nirodhaṃ paṭiccāti catunnaṃ khandhānaṃ paṭisaṅkhāappavattiṃ paṭicca. Khandhanirodhañhi paṭicca nirodhasamāpatti nāma paññāyati, na khandhapavattiṃ, tasmā evamāha. Ettha ca catunnaṃ khandhānaṃ nirodhova nirodhasamāpattīti veditabbo.
ကထံ သမာပတ္တိ ပတ္တဗ္ဗာတိ ကထံ သမာပတ္တိယော ကီဒိသာ သမာပတ္တိယော နာမ ဟုတ္ဝာ ပတ္တဗ္ဗာတိ? သညာသမာပတ္တိ ပတ္တဗ္ဗာတိ သညာယ အတ္ထိဘာဝေန သညာသမာပတ္တိယော သညာသမာပတ္တိယော နာမ ဟုတ္ဝာ ပတ္တဗ္ဗာ။ သင္ခာရာဝသေသသမာပတ္တိ ပတ္တဗ္ဗာတိ သုခုမသင္ခာရာနံ အဝသိဋ္ဌတာယ သင္ခာရာဝသေသသမာပတ္တိ နာမ ဟုတ္ဝာ ပတ္တဗ္ဗာ။ နိရောဓသမာပတ္တိ ပတ္တဗ္ဗာတိ နိရောဓောဝ နိရောဓသမာပတ္တိ နိရောဓသမာပတ္တိ နာမ ဟုတ္ဝာ ပတ္တဗ္ဗာတိ အတ္ထော။ ပဌမံ။
Kathaṃ samāpatti pattabbāti kathaṃ samāpattiyo kīdisā samāpattiyo nāma hutvā pattabbāti? Saññāsamāpatti pattabbāti saññāya atthibhāvena saññāsamāpattiyo saññāsamāpattiyo nāma hutvā pattabbā. Saṅkhārāvasesasamāpatti pattabbāti sukhumasaṅkhārānaṃ avasiṭṭhatāya saṅkhārāvasesasamāpatti nāma hutvā pattabbā. Nirodhasamāpatti pattabbāti nirodhova nirodhasamāpatti nirodhasamāpatti nāma hutvā pattabbāti attho. Paṭhamaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. သတ္တဓာတုသုတ္တံ • 1. Sattadhātusuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၁. သတ္တဓာတုသုတ္တဝဏ္ဏနာ • 1. Sattadhātusuttavaṇṇanā
