| Library / Tipiṭaka / തിപിടക • Tipiṭaka / സംയുത്തനികായ • Saṃyuttanikāya |
൨. ദുതിയവഗ്ഗോ
2. Dutiyavaggo
൧. സത്തധാതുസുത്തം
1. Sattadhātusuttaṃ
൯൫. സാവത്ഥിയം വിഹരതി…പേ॰… ‘‘സത്തിമാ , ഭിക്ഖവേ, ധാതുയോ. കതമാ സത്ത? ആഭാധാതു, സുഭധാതു, ആകാസാനഞ്ചായതനധാതു, വിഞ്ഞാണഞ്ചായതനധാതു, ആകിഞ്ചഞ്ഞായതനധാതു, നേവസഞ്ഞാനാസഞ്ഞായതനധാതു, സഞ്ഞാവേദയിതനിരോധധാതു – ഇമാ ഖോ, ഭിക്ഖവേ, സത്ത ധാതുയോ’’തി.
95. Sāvatthiyaṃ viharati…pe… ‘‘sattimā , bhikkhave, dhātuyo. Katamā satta? Ābhādhātu, subhadhātu, ākāsānañcāyatanadhātu, viññāṇañcāyatanadhātu, ākiñcaññāyatanadhātu, nevasaññānāsaññāyatanadhātu, saññāvedayitanirodhadhātu – imā kho, bhikkhave, satta dhātuyo’’ti.
ഏവം വുത്തേ, അഞ്ഞതരോ ഭിക്ഖു ഭഗവന്തം ഏതദവോച – ‘‘യാ ചായം, ഭന്തേ, ആഭാധാതു യാ ച സുഭധാതു യാ ച ആകാസാനഞ്ചായതനധാതു യാ ച വിഞ്ഞാണഞ്ചായതനധാതു യാ ച ആകിഞ്ചഞ്ഞായതനധാതു യാ ച നേവസഞ്ഞാനാസഞ്ഞായതനധാതു യാ ച സഞ്ഞാവേദയിതനിരോധധാതു – ഇമാ നു ഖോ, ഭന്തേ, ധാതുയോ കിം പടിച്ച പഞ്ഞായന്തീ’’തി?
Evaṃ vutte, aññataro bhikkhu bhagavantaṃ etadavoca – ‘‘yā cāyaṃ, bhante, ābhādhātu yā ca subhadhātu yā ca ākāsānañcāyatanadhātu yā ca viññāṇañcāyatanadhātu yā ca ākiñcaññāyatanadhātu yā ca nevasaññānāsaññāyatanadhātu yā ca saññāvedayitanirodhadhātu – imā nu kho, bhante, dhātuyo kiṃ paṭicca paññāyantī’’ti?
‘‘യായം, ഭിക്ഖു, ആഭാധാതു – അയം ധാതു അന്ധകാരം പടിച്ച പഞ്ഞായതി. യായം, ഭിക്ഖു, സുഭധാതു – അയം ധാതു അസുഭം പടിച്ച പഞ്ഞായതി. യായം, ഭിക്ഖു, ആകാസാനഞ്ചായതനധാതു – അയം ധാതു രൂപം പടിച്ച പഞ്ഞായതി. യായം, ഭിക്ഖു, വിഞ്ഞാണഞ്ചായതനധാതു – അയം ധാതു ആകാസാനഞ്ചായതനം പടിച്ച പഞ്ഞായതി. യായം, ഭിക്ഖു, ആകിഞ്ചഞ്ഞായതനധാതു – അയം ധാതു വിഞ്ഞാണഞ്ചായതനം പടിച്ച പഞ്ഞായതി. യായം, ഭിക്ഖു, നേവസഞ്ഞാനാസഞ്ഞായതനധാതു – അയം ധാതു ആകിഞ്ചഞ്ഞായതനം പടിച്ച പഞ്ഞായതി. യായം, ഭിക്ഖു, സഞ്ഞാവേദയിതനിരോധധാതു – അയം ധാതു നിരോധം പടിച്ച പഞ്ഞായതീ’’തി.
‘‘Yāyaṃ, bhikkhu, ābhādhātu – ayaṃ dhātu andhakāraṃ paṭicca paññāyati. Yāyaṃ, bhikkhu, subhadhātu – ayaṃ dhātu asubhaṃ paṭicca paññāyati. Yāyaṃ, bhikkhu, ākāsānañcāyatanadhātu – ayaṃ dhātu rūpaṃ paṭicca paññāyati. Yāyaṃ, bhikkhu, viññāṇañcāyatanadhātu – ayaṃ dhātu ākāsānañcāyatanaṃ paṭicca paññāyati. Yāyaṃ, bhikkhu, ākiñcaññāyatanadhātu – ayaṃ dhātu viññāṇañcāyatanaṃ paṭicca paññāyati. Yāyaṃ, bhikkhu, nevasaññānāsaññāyatanadhātu – ayaṃ dhātu ākiñcaññāyatanaṃ paṭicca paññāyati. Yāyaṃ, bhikkhu, saññāvedayitanirodhadhātu – ayaṃ dhātu nirodhaṃ paṭicca paññāyatī’’ti.
‘‘യാ ചായം , ഭന്തേ, ആഭാധാതു യാ ച സുഭധാതു യാ ച ആകാസാനഞ്ചായതനധാതു യാ ച വിഞ്ഞാണഞ്ചായതനധാതു യാ ച ആകിഞ്ചഞ്ഞായതനധാതു യാ ച നേവസഞ്ഞാനാസഞ്ഞായതനധാതു യാ ച സഞ്ഞാവേദയിതനിരോധധാതു – ഇമാ നു ഖോ, ഭന്തേ, ധാതുയോ കഥം സമാപത്തി പത്തബ്ബാ’’തി?
‘‘Yā cāyaṃ , bhante, ābhādhātu yā ca subhadhātu yā ca ākāsānañcāyatanadhātu yā ca viññāṇañcāyatanadhātu yā ca ākiñcaññāyatanadhātu yā ca nevasaññānāsaññāyatanadhātu yā ca saññāvedayitanirodhadhātu – imā nu kho, bhante, dhātuyo kathaṃ samāpatti pattabbā’’ti?
‘‘യാ ചായം, ഭിക്ഖു, ആഭാധാതു യാ ച സുഭധാതു യാ ച ആകാസാനഞ്ചായതനധാതു യാ ച വിഞ്ഞാണഞ്ചായതനധാതു യാ ച ആകിഞ്ചഞ്ഞായതനധാതു – ഇമാ ധാതുയോ സഞ്ഞാസമാപത്തി പത്തബ്ബാ. യായം, ഭിക്ഖു, നേവസഞ്ഞാനാസഞ്ഞായതനധാതു – അയം ധാതു സങ്ഖാരാവസേസസമാപത്തി പത്തബ്ബാ . യായം, ഭിക്ഖു, സഞ്ഞാവേദയിതനിരോധധാതു – അയം ധാതു നിരോധസമാപത്തി പത്തബ്ബാ’’തി. പഠമം.
‘‘Yā cāyaṃ, bhikkhu, ābhādhātu yā ca subhadhātu yā ca ākāsānañcāyatanadhātu yā ca viññāṇañcāyatanadhātu yā ca ākiñcaññāyatanadhātu – imā dhātuyo saññāsamāpatti pattabbā. Yāyaṃ, bhikkhu, nevasaññānāsaññāyatanadhātu – ayaṃ dhātu saṅkhārāvasesasamāpatti pattabbā . Yāyaṃ, bhikkhu, saññāvedayitanirodhadhātu – ayaṃ dhātu nirodhasamāpatti pattabbā’’ti. Paṭhamaṃ.
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൧. സത്തധാതുസുത്തവണ്ണനാ • 1. Sattadhātusuttavaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / സംയുത്തനികായ (ടീകാ) • Saṃyuttanikāya (ṭīkā) / ൧. സത്തധാതുസുത്തവണ്ണനാ • 1. Sattadhātusuttavaṇṇanā
