| Library / Tipiṭaka / តិបិដក • Tipiṭaka / សំយុត្តនិកាយ • Saṃyuttanikāya |
២. ទុតិយវគ្គោ
2. Dutiyavaggo
១. សត្តធាតុសុត្តំ
1. Sattadhātusuttaṃ
៩៥. សាវត្ថិយំ វិហរតិ…បេ.… ‘‘សត្តិមា , ភិក្ខវេ, ធាតុយោ។ កតមា សត្ត? អាភាធាតុ, សុភធាតុ, អាកាសានញ្ចាយតនធាតុ, វិញ្ញាណញ្ចាយតនធាតុ, អាកិញ្ចញ្ញាយតនធាតុ, នេវសញ្ញានាសញ្ញាយតនធាតុ, សញ្ញាវេទយិតនិរោធធាតុ – ឥមា ខោ, ភិក្ខវេ, សត្ត ធាតុយោ’’តិ។
95. Sāvatthiyaṃ viharati…pe… ‘‘sattimā , bhikkhave, dhātuyo. Katamā satta? Ābhādhātu, subhadhātu, ākāsānañcāyatanadhātu, viññāṇañcāyatanadhātu, ākiñcaññāyatanadhātu, nevasaññānāsaññāyatanadhātu, saññāvedayitanirodhadhātu – imā kho, bhikkhave, satta dhātuyo’’ti.
ឯវំ វុត្តេ, អញ្ញតរោ ភិក្ខុ ភគវន្តំ ឯតទវោច – ‘‘យា ចាយំ, ភន្តេ, អាភាធាតុ យា ច សុភធាតុ យា ច អាកាសានញ្ចាយតនធាតុ យា ច វិញ្ញាណញ្ចាយតនធាតុ យា ច អាកិញ្ចញ្ញាយតនធាតុ យា ច នេវសញ្ញានាសញ្ញាយតនធាតុ យា ច សញ្ញាវេទយិតនិរោធធាតុ – ឥមា នុ ខោ, ភន្តេ, ធាតុយោ កិំ បដិច្ច បញ្ញាយន្តី’’តិ?
Evaṃ vutte, aññataro bhikkhu bhagavantaṃ etadavoca – ‘‘yā cāyaṃ, bhante, ābhādhātu yā ca subhadhātu yā ca ākāsānañcāyatanadhātu yā ca viññāṇañcāyatanadhātu yā ca ākiñcaññāyatanadhātu yā ca nevasaññānāsaññāyatanadhātu yā ca saññāvedayitanirodhadhātu – imā nu kho, bhante, dhātuyo kiṃ paṭicca paññāyantī’’ti?
‘‘យាយំ, ភិក្ខុ, អាភាធាតុ – អយំ ធាតុ អន្ធការំ បដិច្ច បញ្ញាយតិ។ យាយំ, ភិក្ខុ, សុភធាតុ – អយំ ធាតុ អសុភំ បដិច្ច បញ្ញាយតិ។ យាយំ, ភិក្ខុ, អាកាសានញ្ចាយតនធាតុ – អយំ ធាតុ រូបំ បដិច្ច បញ្ញាយតិ។ យាយំ, ភិក្ខុ, វិញ្ញាណញ្ចាយតនធាតុ – អយំ ធាតុ អាកាសានញ្ចាយតនំ បដិច្ច បញ្ញាយតិ។ យាយំ, ភិក្ខុ, អាកិញ្ចញ្ញាយតនធាតុ – អយំ ធាតុ វិញ្ញាណញ្ចាយតនំ បដិច្ច បញ្ញាយតិ។ យាយំ, ភិក្ខុ, នេវសញ្ញានាសញ្ញាយតនធាតុ – អយំ ធាតុ អាកិញ្ចញ្ញាយតនំ បដិច្ច បញ្ញាយតិ។ យាយំ, ភិក្ខុ, សញ្ញាវេទយិតនិរោធធាតុ – អយំ ធាតុ និរោធំ បដិច្ច បញ្ញាយតី’’តិ។
‘‘Yāyaṃ, bhikkhu, ābhādhātu – ayaṃ dhātu andhakāraṃ paṭicca paññāyati. Yāyaṃ, bhikkhu, subhadhātu – ayaṃ dhātu asubhaṃ paṭicca paññāyati. Yāyaṃ, bhikkhu, ākāsānañcāyatanadhātu – ayaṃ dhātu rūpaṃ paṭicca paññāyati. Yāyaṃ, bhikkhu, viññāṇañcāyatanadhātu – ayaṃ dhātu ākāsānañcāyatanaṃ paṭicca paññāyati. Yāyaṃ, bhikkhu, ākiñcaññāyatanadhātu – ayaṃ dhātu viññāṇañcāyatanaṃ paṭicca paññāyati. Yāyaṃ, bhikkhu, nevasaññānāsaññāyatanadhātu – ayaṃ dhātu ākiñcaññāyatanaṃ paṭicca paññāyati. Yāyaṃ, bhikkhu, saññāvedayitanirodhadhātu – ayaṃ dhātu nirodhaṃ paṭicca paññāyatī’’ti.
‘‘យា ចាយំ , ភន្តេ, អាភាធាតុ យា ច សុភធាតុ យា ច អាកាសានញ្ចាយតនធាតុ យា ច វិញ្ញាណញ្ចាយតនធាតុ យា ច អាកិញ្ចញ្ញាយតនធាតុ យា ច នេវសញ្ញានាសញ្ញាយតនធាតុ យា ច សញ្ញាវេទយិតនិរោធធាតុ – ឥមា នុ ខោ, ភន្តេ, ធាតុយោ កថំ សមាបត្តិ បត្តព្ពា’’តិ?
‘‘Yā cāyaṃ , bhante, ābhādhātu yā ca subhadhātu yā ca ākāsānañcāyatanadhātu yā ca viññāṇañcāyatanadhātu yā ca ākiñcaññāyatanadhātu yā ca nevasaññānāsaññāyatanadhātu yā ca saññāvedayitanirodhadhātu – imā nu kho, bhante, dhātuyo kathaṃ samāpatti pattabbā’’ti?
‘‘យា ចាយំ, ភិក្ខុ, អាភាធាតុ យា ច សុភធាតុ យា ច អាកាសានញ្ចាយតនធាតុ យា ច វិញ្ញាណញ្ចាយតនធាតុ យា ច អាកិញ្ចញ្ញាយតនធាតុ – ឥមា ធាតុយោ សញ្ញាសមាបត្តិ បត្តព្ពា។ យាយំ, ភិក្ខុ, នេវសញ្ញានាសញ្ញាយតនធាតុ – អយំ ធាតុ សង្ខារាវសេសសមាបត្តិ បត្តព្ពា ។ យាយំ, ភិក្ខុ, សញ្ញាវេទយិតនិរោធធាតុ – អយំ ធាតុ និរោធសមាបត្តិ បត្តព្ពា’’តិ។ បឋមំ។
‘‘Yā cāyaṃ, bhikkhu, ābhādhātu yā ca subhadhātu yā ca ākāsānañcāyatanadhātu yā ca viññāṇañcāyatanadhātu yā ca ākiñcaññāyatanadhātu – imā dhātuyo saññāsamāpatti pattabbā. Yāyaṃ, bhikkhu, nevasaññānāsaññāyatanadhātu – ayaṃ dhātu saṅkhārāvasesasamāpatti pattabbā . Yāyaṃ, bhikkhu, saññāvedayitanirodhadhātu – ayaṃ dhātu nirodhasamāpatti pattabbā’’ti. Paṭhamaṃ.
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១. សត្តធាតុសុត្តវណ្ណនា • 1. Sattadhātusuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / សំយុត្តនិកាយ (ដីកា) • Saṃyuttanikāya (ṭīkā) / ១. សត្តធាតុសុត្តវណ្ណនា • 1. Sattadhātusuttavaṇṇanā
