| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
৪. সমথক্খন্ধকো
4. Samathakkhandhako
সতিৰিনযকথাদিৰণ্ণনা
Sativinayakathādivaṇṇanā
১৯৫. সমথক্খন্ধকে খীণাসৰস্স ৰিপুলসতিং নিস্সায দাতব্বো ৰিনযো চোদনাদিঅসারুপ্পানং ৰিনযনুপাযো সতিৰিনযো।
195. Samathakkhandhake khīṇāsavassa vipulasatiṃ nissāya dātabbo vinayo codanādiasāruppānaṃ vinayanupāyo sativinayo.
১৯৬. চিত্তৰিপরিযাসকতোতি কতচিত্তৰিপরিযাসো। গগ্গং ভিক্খুং…পে॰… চোদেন্তীতি এত্থ পন উম্মত্তকস্স ইদং উম্মত্তকং, অজ্ঝাচিণ্ণং। তদেৰ চিত্তৰিপরিযাসেন কতন্তি চিত্তৰিপরিযাসকতং। তেন উম্মত্তকেন চিত্তৰিপরিযাসকতেন অজ্ঝাচিণ্ণেন অনাচারেন আপন্নায আপত্তিযা গগ্গং ভিক্খুং চোদেন্তীতি এৰমত্থো দট্ঠব্বো। পঠমং মূল়্হো হুত্ৰা পচ্ছা অমূল়্হভাৰং উপগতস্স দাতব্বো ৰিনযো অমূল়্হৰিনযো।
196.Cittavipariyāsakatoti katacittavipariyāso. Gaggaṃ bhikkhuṃ…pe… codentīti ettha pana ummattakassa idaṃ ummattakaṃ, ajjhāciṇṇaṃ. Tadeva cittavipariyāsena katanti cittavipariyāsakataṃ. Tena ummattakena cittavipariyāsakatena ajjhāciṇṇena anācārena āpannāya āpattiyā gaggaṃ bhikkhuṃ codentīti evamattho daṭṭhabbo. Paṭhamaṃ mūḷho hutvā pacchā amūḷhabhāvaṃ upagatassa dātabbo vinayo amūḷhavinayo.
২০২. ধম্মৰাদীনং যেভুয্যভাৰসম্পাদিকা কিরিযা যেভুয্যসিকাতি ইমস্মিং অত্থে স-কারাগমসহিতো ইক-পচ্চযন্তোযং সদ্দোতি দস্সেতুং আহ ‘‘যস্সা’’তিআদি। তত্থ যস্সা কিরিযাযাতি গূল়্হকৰিৰট্টকাদিনা সলাকগ্গাহাপককিরিযায। যেভুয্যভাৰং নিস্সিতসমথকিরিযা যেভুয্যসিকাতি এৰং যেভুয্যসিকাসদ্দস্স অত্থো গহেতব্বো। এৰঞ্হি অযং অধিকরণসমথো নাম হোতি। যথাৰুত্তসলাকগ্গাহেন হি ধম্মৰাদীনং যেভুয্যভাৰে সিদ্ধে পচ্ছা তং যেভুয্যভাৰং নিস্সাযেৰ অধিকরণৰূপসমো হোতি, ন ধম্মৰাদীনং বহুতরভাৰসাধককিরিযামত্তেন।
202. Dhammavādīnaṃ yebhuyyabhāvasampādikā kiriyā yebhuyyasikāti imasmiṃ atthe sa-kārāgamasahito ika-paccayantoyaṃ saddoti dassetuṃ āha ‘‘yassā’’tiādi. Tattha yassā kiriyāyāti gūḷhakavivaṭṭakādinā salākaggāhāpakakiriyāya. Yebhuyyabhāvaṃ nissitasamathakiriyā yebhuyyasikāti evaṃ yebhuyyasikāsaddassa attho gahetabbo. Evañhi ayaṃ adhikaraṇasamatho nāma hoti. Yathāvuttasalākaggāhena hi dhammavādīnaṃ yebhuyyabhāve siddhe pacchā taṃ yebhuyyabhāvaṃ nissāyeva adhikaraṇavūpasamo hoti, na dhammavādīnaṃ bahutarabhāvasādhakakiriyāmattena.
২০৭. ‘‘সেসমেত্থ তজ্জনীযাদীসু ৰুত্তনযমেৰা’’তি এতেন তজ্জনীযাদিসত্তকম্মানি ৰিয ইদম্পি তস্সপাপিযসিকাকম্মং অসুচিভাৰাদিদোসযুত্তস্স, সঙ্ঘস্স চ ৰিনিচ্ছযে অতিট্ঠমানস্স কত্তব্বং ৰিসুং একং নিগ্গহকম্মন্তি দস্সেতি। এতস্মিঞ্হি নিগ্গহকম্মে কতে সো পুগ্গলো ‘‘অহং সুদ্ধো’’তি অত্তনো সুদ্ধিযা সাধনত্থং সঙ্ঘমজ্ঝং ওতরিতুং, সঙ্ঘো চস্স ৰিনিচ্ছযং দাতুং ন লভতি, তং কম্মকরণমত্তেনেৰ চ তং অধিকরণং ৰূপসন্তং হোতি।
207.‘‘Sesamettha tajjanīyādīsu vuttanayamevā’’ti etena tajjanīyādisattakammāni viya idampi tassapāpiyasikākammaṃ asucibhāvādidosayuttassa, saṅghassa ca vinicchaye atiṭṭhamānassa kattabbaṃ visuṃ ekaṃ niggahakammanti dasseti. Etasmiñhi niggahakamme kate so puggalo ‘‘ahaṃ suddho’’ti attano suddhiyā sādhanatthaṃ saṅghamajjhaṃ otarituṃ, saṅgho cassa vinicchayaṃ dātuṃ na labhati, taṃ kammakaraṇamatteneva ca taṃ adhikaraṇaṃ vūpasantaṃ hoti.
কথং পনেতং কম্মং পটিপ্পস্সম্ভতীতি? কেচি পনেত্থ ‘‘সো তথা নিগ্গহিতো নিগ্গহিতোৰ হোতি, ওসারণং ন লভতি। তেনেৰ পাল়িযং ওসারণা ন ৰুত্তা’’তি ৰদন্তি। অঞ্ঞে পন ‘‘পাল়িযং ন উপসম্পাদেতব্বন্তিআদিনা সম্মাৰত্তনস্স ৰুত্তত্তা সম্মাৰত্তিত্ৰা লজ্জিধম্মে ওক্কন্তস্স ওসারণা অৰুত্তাপি তজ্জনীযাদীসু ৰিয নযতো কম্মৰাচং যোজেত্ৰা ওসারণা কাতব্বা এৰা’’তি ৰদন্তি, ইদং যুত্তং। তেনেৰ অট্ঠকথাযং ৰক্খতি ‘‘সচে সীলৰা ভৰিস্সতি, ৰত্তং পরিপূরেত্ৰা পটিপ্পস্সদ্ধিং লভিস্সতি। নো চে, তথানাসিতকোৰ ভৰিস্সতী’’তি (চূল়ৰ॰ অট্ঠ॰ ২৩৮)। তস্সপাপিযসিকাকম্মন্তি চ অলুত্তসমাসোযেৰ। তেনাহ ‘‘ইদং হী’’তি আদি।
Kathaṃ panetaṃ kammaṃ paṭippassambhatīti? Keci panettha ‘‘so tathā niggahito niggahitova hoti, osāraṇaṃ na labhati. Teneva pāḷiyaṃ osāraṇā na vuttā’’ti vadanti. Aññe pana ‘‘pāḷiyaṃ na upasampādetabbantiādinā sammāvattanassa vuttattā sammāvattitvā lajjidhamme okkantassa osāraṇā avuttāpi tajjanīyādīsu viya nayato kammavācaṃ yojetvā osāraṇā kātabbā evā’’ti vadanti, idaṃ yuttaṃ. Teneva aṭṭhakathāyaṃ vakkhati ‘‘sace sīlavā bhavissati, vattaṃ paripūretvā paṭippassaddhiṃ labhissati. No ce, tathānāsitakova bhavissatī’’ti (cūḷava. aṭṭha. 238). Tassapāpiyasikākammanti ca aluttasamāsoyeva. Tenāha ‘‘idaṃ hī’’ti ādi.
সতিৰিনযকথাদিৰণ্ণনা নিট্ঠিতা।
Sativinayakathādivaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi
২. সতিৰিনযো • 2. Sativinayo
৩. অমূল়্হৰিনযো • 3. Amūḷhavinayo
৫. যেভুয্যসিকা • 5. Yebhuyyasikā
৬. তস্সপাপিযসিকা • 6. Tassapāpiyasikā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā
সতিৰিনযকথা • Sativinayakathā
অমূল়্হৰিনযকথা • Amūḷhavinayakathā
যেভুয্যসিকাকথা • Yebhuyyasikākathā
তস্সপাপিযসিকাকথা • Tassapāpiyasikākathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / সতিৰিনযাদিকথাৰণ্ণনা • Sativinayādikathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā
সতিৰিনযকথাৰণ্ণনা • Sativinayakathāvaṇṇanā
অমূল়্হৰিনযকথাৰণ্ণনা • Amūḷhavinayakathāvaṇṇanā
তস্সপাপিযসিকাকথাৰণ্ণনা • Tassapāpiyasikākathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi
২. সতিৰিনযকথা • 2. Sativinayakathā
৩. অমূল়্হৰিনযকথা • 3. Amūḷhavinayakathā
৫. যেভুয্যসিকাকথা • 5. Yebhuyyasikākathā
৬. তস্সপাপিযসিকাকথা • 6. Tassapāpiyasikākathā
