| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
8. ஸதிபட்டா²னகதா²
8. Satipaṭṭhānakathā
ஸதிபட்டா²னகதா²வண்ணனா
Satipaṭṭhānakathāvaṇṇanā
34. இதா³னி ஸமஸீஸகதா²னந்தரங் அத்தனா வுத்தஸ்ஸ இத்³தி⁴பாடிஹாரியஸ்ஸ ஸாத⁴கே ஸத்த அனுபஸ்ஸனாவிஸேஸே த³ஸ்ஸெந்தேன கதி²தாய ஸுத்தந்தபுப்³ப³ங்க³மாய ஸதிபட்டா²னகதா²ய அபுப்³ப³த்தா²னுவண்ணனா. தத்த² ஸுத்தந்தே தாவ சத்தாரோதி க³ணனபரிச்சே²தோ³, தேன ந ததோ ஹெட்டா², ந உத்³த⁴ந்தி ஸதிபட்டா²னபரிச்சே²த³ங் தீ³பேதி. இமேதி நித்³தி³ஸிதப்³ப³னித³ஸ்ஸனங். பி⁴க்க²வேதி த⁴ம்மபடிக்³கா³ஹகபுக்³க³லாலபனங். ஸதிபட்டா²னாதி தயோ ஸதிபட்டா²னா ஸதிகோ³சரோபி, திதா⁴ படிபன்னேஸு ஸாவகேஸு ஸத்து²னோ படிகா⁴னுனயவீதிவத்ததாபி, ஸதிபி. ‘‘சதுன்னங், பி⁴க்க²வே, ஸதிபட்டா²னானங் ஸமுத³யஞ்ச அத்த²ங்க³மஞ்ச தே³ஸெஸ்ஸாமீ’’திஆதீ³ஸு (ஸங்॰ நி॰ 5.408) ஹி ஸதிகோ³சரோ ‘‘ஸதிபட்டா²ன’’ந்தி வுத்தோ. தஸ்ஸத்தோ² – பதிட்டா²தி தஸ்மிந்தி பட்டா²னங். கா பதிட்டா²தி? ஸதி. ஸதியா பட்டா²னங் ஸதிபட்டா²னந்தி.
34. Idāni samasīsakathānantaraṃ attanā vuttassa iddhipāṭihāriyassa sādhake satta anupassanāvisese dassentena kathitāya suttantapubbaṅgamāya satipaṭṭhānakathāya apubbatthānuvaṇṇanā. Tattha suttante tāva cattāroti gaṇanaparicchedo, tena na tato heṭṭhā, na uddhanti satipaṭṭhānaparicchedaṃ dīpeti. Imeti niddisitabbanidassanaṃ. Bhikkhaveti dhammapaṭiggāhakapuggalālapanaṃ. Satipaṭṭhānāti tayo satipaṭṭhānā satigocaropi, tidhā paṭipannesu sāvakesu satthuno paṭighānunayavītivattatāpi, satipi. ‘‘Catunnaṃ, bhikkhave, satipaṭṭhānānaṃ samudayañca atthaṅgamañca desessāmī’’tiādīsu (saṃ. ni. 5.408) hi satigocaro ‘‘satipaṭṭhāna’’nti vutto. Tassattho – patiṭṭhāti tasminti paṭṭhānaṃ. Kā patiṭṭhāti? Sati. Satiyā paṭṭhānaṃ satipaṭṭhānanti.
‘‘தயோ ஸதிபட்டா²னா யத³ரியோ ஸேவதி, யத³ரியோ ஸேவமானோ ஸத்தா² க³ணமனுஸாஸிதுமரஹதீ’’தி (ம॰ நி॰ 3.304, 311) எத்த² திதா⁴ படிபன்னேஸு ஸாவகேஸு ஸத்து²னோ படிகா⁴னுனயவீதிவத்ததா ‘‘ஸதிபட்டா²ன’’ந்தி வுத்தா. தஸ்ஸத்தோ² – பட்ட²பேதப்³ப³தோ பட்டா²னங், பவத்தயிதப்³ப³தோதி அத்தோ². கேன பட்ட²பேதப்³ப³தோதி? ஸதியா. ஸதியா பட்டா²னங் ஸதிபட்டா²னந்தி. ‘‘சத்தாரோ ஸதிபட்டா²னா பா⁴விதா ப³ஹுலீகதா ஸத்த பொ³ஜ்ஜ²ங்கே³ பரிபூரெந்தீ’’திஆதீ³ஸு (ம॰ நி॰ 3.147) பன ஸதியேவ ‘‘ஸதிபட்டா²ன’’ந்தி வுத்தா. தஸ்ஸத்தோ² – பதிட்டா²தீதி பட்டா²னங், உபட்டா²தி ஓக்கந்தி³த்வா பக்க²ந்தி³த்வா வத்ததீதி அத்தோ². ஸதியேவ பட்டா²னங் ஸதிபட்டா²னங். அத² வா ஸரணட்டே²ன ஸதி, உபட்டா²னட்டே²ன உபட்டா²னங். இதி ஸதி ச ஸா உபட்டா²னஞ்சாதிபி ஸதிபட்டா²னங். இத³மித⁴ அதி⁴ப்பேதங். யதி³ ஏவங் கஸ்மா ஸதிபட்டா²னாதி ப³ஹுவசனங் கதந்தி? ஸதிப³ஹுத்தா. ஆரம்மணபே⁴தே³ன ஹி ப³ஹுகா தா ஸதியோதி.
‘‘Tayo satipaṭṭhānā yadariyo sevati, yadariyo sevamāno satthā gaṇamanusāsitumarahatī’’ti (ma. ni. 3.304, 311) ettha tidhā paṭipannesu sāvakesu satthuno paṭighānunayavītivattatā ‘‘satipaṭṭhāna’’nti vuttā. Tassattho – paṭṭhapetabbato paṭṭhānaṃ, pavattayitabbatoti attho. Kena paṭṭhapetabbatoti? Satiyā. Satiyā paṭṭhānaṃ satipaṭṭhānanti. ‘‘Cattāro satipaṭṭhānā bhāvitā bahulīkatā satta bojjhaṅge paripūrentī’’tiādīsu (ma. ni. 3.147) pana satiyeva ‘‘satipaṭṭhāna’’nti vuttā. Tassattho – patiṭṭhātīti paṭṭhānaṃ, upaṭṭhāti okkanditvā pakkhanditvā vattatīti attho. Satiyeva paṭṭhānaṃ satipaṭṭhānaṃ. Atha vā saraṇaṭṭhena sati, upaṭṭhānaṭṭhena upaṭṭhānaṃ. Iti sati ca sā upaṭṭhānañcātipi satipaṭṭhānaṃ. Idamidha adhippetaṃ. Yadi evaṃ kasmā satipaṭṭhānāti bahuvacanaṃ katanti? Satibahuttā. Ārammaṇabhedena hi bahukā tā satiyoti.
கதமே சத்தாரோதி கதே²துகம்யதாபுச்சா². இதா⁴தி இமஸ்மிங் ஸாஸனே. பி⁴க்கூ²தி ஸங்ஸாரே ப⁴யங் இக்க²தீதி பி⁴க்கு². ஸேஸபதா³னங் அத்த²வண்ணனா பனெத்த² ஸுதமயஞாணகதா²ய மக்³க³ஸச்சனித்³தே³ஸவண்ணனாயங் வுத்தாயேவாதி.
Katame cattāroti kathetukamyatāpucchā. Idhāti imasmiṃ sāsane. Bhikkhūti saṃsāre bhayaṃ ikkhatīti bhikkhu. Sesapadānaṃ atthavaṇṇanā panettha sutamayañāṇakathāya maggasaccaniddesavaṇṇanāyaṃ vuttāyevāti.
கஸ்மா பன ப⁴க³வதா சத்தாரோவ ஸதிபட்டா²னா வுத்தா அனூனா அனதி⁴காதி? வேனெய்யஹிதத்தா. தண்ஹாசரிததி³ட்டி²சரிதஸமத²யானிகவிபஸ்ஸனாயானிகேஸு ஹி மந்த³திக்க²வஸேன த்³வேதா⁴ த்³வேதா⁴ பவத்தேஸு மந்த³ஸ்ஸ தண்ஹாசரிதஸ்ஸ ஓளாரிகங் காயானுபஸ்ஸனாஸதிபட்டா²னங் விஸுத்³தி⁴மக்³கோ³, திக்க²ஸ்ஸ ஸுகு²மங் வேத³னானுபஸ்ஸனாஸதிபட்டா²னங். தி³ட்டி²சரிதஸ்ஸாபி மந்த³ஸ்ஸ நாதிப்பபே⁴த³க³தங் சித்தானுபஸ்ஸனாஸதிபட்டா²னங் விஸுத்³தி⁴மக்³கோ³, திக்க²ஸ்ஸ அதிப்பபே⁴த³க³தங் த⁴ம்மானுபஸ்ஸனாஸதிபட்டா²னங். ஸமத²யானிகஸ்ஸ ச மந்த³ஸ்ஸ அகிச்சே²ன அதி⁴க³ந்தப்³ப³னிமித்தங் பட²மங் ஸதிபட்டா²னங் விஸுத்³தி⁴மக்³கோ³, திக்க²ஸ்ஸ ஓளாரிகாரம்மணே அஸண்ட²ஹனதோ து³தியங். விபஸ்ஸனாயானிகஸ்ஸபி மந்த³ஸ்ஸ நாதிப்பபே⁴த³க³தாரம்மணங் ததியங், திக்க²ஸ்ஸ அதிப்பபே⁴த³க³தாரம்மணங் சதுத்த²ங். இதி சத்தாரோவ வுத்தா அனூனா அனதி⁴காதி.
Kasmā pana bhagavatā cattārova satipaṭṭhānā vuttā anūnā anadhikāti? Veneyyahitattā. Taṇhācaritadiṭṭhicaritasamathayānikavipassanāyānikesu hi mandatikkhavasena dvedhā dvedhā pavattesu mandassa taṇhācaritassa oḷārikaṃ kāyānupassanāsatipaṭṭhānaṃ visuddhimaggo, tikkhassa sukhumaṃ vedanānupassanāsatipaṭṭhānaṃ. Diṭṭhicaritassāpi mandassa nātippabhedagataṃ cittānupassanāsatipaṭṭhānaṃ visuddhimaggo, tikkhassa atippabhedagataṃ dhammānupassanāsatipaṭṭhānaṃ. Samathayānikassa ca mandassa akicchena adhigantabbanimittaṃ paṭhamaṃ satipaṭṭhānaṃ visuddhimaggo, tikkhassa oḷārikārammaṇe asaṇṭhahanato dutiyaṃ. Vipassanāyānikassapi mandassa nātippabhedagatārammaṇaṃ tatiyaṃ, tikkhassa atippabhedagatārammaṇaṃ catutthaṃ. Iti cattārova vuttā anūnā anadhikāti.
ஸுப⁴ஸுக²னிச்சஅத்தவிபல்லாஸப்பஹானத்த²ங் வா. காயோ ஹி அஸுபோ⁴, தத்த² ச ஸுப⁴விபல்லாஸவிபல்லத்தா² ஸத்தா. தேஸங் தத்த² அஸுப⁴பா⁴வத³ஸ்ஸனேன தஸ்ஸ விபல்லாஸஸ்ஸ பஹானத்த²ங் பட²மங் ஸதிபட்டா²னங் வுத்தங். ஸுக²ங் நிச்சங் அத்தாதி க³ஹிதேஸுபி ச வேத³னாதீ³ஸு வேத³னா து³க்கா², சித்தங் அனிச்சங், த⁴ம்மா அனத்தா, தேஸு ச ஸுக²னிச்சஅத்தவிபல்லாஸவிபல்லத்தா² ஸத்தா. தேஸங் தத்த² து³க்கா²தி³பா⁴வத³ஸ்ஸனேன தேஸங் விபல்லாஸானங் பஹானத்த²ங் ஸேஸானி தீணி வுத்தானீதி ஏவங் ஸுப⁴ஸுக²னிச்சஅத்தவிபல்லாஸப்பஹானத்த²ங் வா சத்தாரோவ வுத்தா. ந கேவலஞ்ச விபல்லாஸப்பஹானத்த²மேவ, சதுரோக⁴யோகா³ஸவக³ந்த²உபாதா³னஅக³திப்பஹானத்த²ம்பி சதுப்³பி³தா⁴ஹாரபரிஞ்ஞத்த²ம்பி சத்தாரோவ வுத்தாதி வேதி³தப்³ப³ங்.
Subhasukhaniccaattavipallāsappahānatthaṃ vā. Kāyo hi asubho, tattha ca subhavipallāsavipallatthā sattā. Tesaṃ tattha asubhabhāvadassanena tassa vipallāsassa pahānatthaṃ paṭhamaṃ satipaṭṭhānaṃ vuttaṃ. Sukhaṃ niccaṃ attāti gahitesupi ca vedanādīsu vedanā dukkhā, cittaṃ aniccaṃ, dhammā anattā, tesu ca sukhaniccaattavipallāsavipallatthā sattā. Tesaṃ tattha dukkhādibhāvadassanena tesaṃ vipallāsānaṃ pahānatthaṃ sesāni tīṇi vuttānīti evaṃ subhasukhaniccaattavipallāsappahānatthaṃ vā cattārova vuttā. Na kevalañca vipallāsappahānatthameva, caturoghayogāsavaganthaupādānaagatippahānatthampi catubbidhāhārapariññatthampi cattārova vuttāti veditabbaṃ.
35. (க) ஸுத்தந்தனித்³தே³ஸே பத²வீகாயந்தி இமஸ்மிங் ரூபகாயே பத²வீதா⁴து. ஸகலஸரீரே பன பத²வீதா⁴தூனங் ப³ஹுகத்தா ஸப்³ப³பத²வீதா⁴துஸங்க³ஹத்த²ங் ஸமூஹத்தே²ன காயக்³க³ஹணங் கதங். ஆபோகாயாதீ³ஸுபி ஏஸேவ நயோ. கேஸகாயாதீ³னம்பி ப³ஹுகத்தா கேஸகாயாதி³க³ஹணங் கதங். வக்காதீ³னி பன பரிச்சி²ன்னத்தா காயக்³க³ஹணங் நாரஹந்தீதி தேஸங் க³ஹணங் ந கதந்தி வேதி³தப்³ப³ங்.
35. (Ka) suttantaniddese pathavīkāyanti imasmiṃ rūpakāye pathavīdhātu. Sakalasarīre pana pathavīdhātūnaṃ bahukattā sabbapathavīdhātusaṅgahatthaṃ samūhatthena kāyaggahaṇaṃ kataṃ. Āpokāyādīsupi eseva nayo. Kesakāyādīnampi bahukattā kesakāyādigahaṇaṃ kataṃ. Vakkādīni pana paricchinnattā kāyaggahaṇaṃ nārahantīti tesaṃ gahaṇaṃ na katanti veditabbaṃ.
(க²) ஸுக²ங் வேத³னந்திஆதீ³ஸு ஸுக²ங் வேத³னந்தி காயிகங் வா சேதஸிகங் வா ஸுக²ங் வேத³னங். ததா² து³க்க²ங் வேத³னங். அது³க்க²மஸுக²ங் வேத³னந்தி பன சேதஸிகமேவ உபெக்கா²வேத³னங். ஸாமிஸங் ஸுக²ங் வேத³னந்தி ச² கே³ஹஸிதஸோமனஸ்ஸவேத³னா. நிராமிஸங் ஸுக²ங் வேத³னந்தி ச² நெக்க²ம்மஸிதஸோமனஸ்ஸவேத³னா . ஸாமிஸங் து³க்க²ங் வேத³னந்தி ச² கே³ஹஸிததோ³மனஸ்ஸவேத³னா. நிராமிஸங் து³க்க²ங் வேத³னந்தி ச² நெக்க²ம்மஸிததோ³மனஸ்ஸவேத³னா. ஸாமிஸங் அது³க்க²மஸுக²ங் வேத³னந்தி ச² கே³ஹஸிதஉபெக்கா²வேத³னா. நிராமிஸங் அது³க்க²மஸுக²ங் வேத³னந்தி ச² நெக்க²ம்மஸிதஉபெக்கா²வேத³னா.
(Kha) sukhaṃvedanantiādīsu sukhaṃ vedananti kāyikaṃ vā cetasikaṃ vā sukhaṃ vedanaṃ. Tathā dukkhaṃ vedanaṃ. Adukkhamasukhaṃ vedananti pana cetasikameva upekkhāvedanaṃ. Sāmisaṃ sukhaṃ vedananti cha gehasitasomanassavedanā. Nirāmisaṃ sukhaṃ vedananti cha nekkhammasitasomanassavedanā . Sāmisaṃ dukkhaṃ vedananti cha gehasitadomanassavedanā. Nirāmisaṃ dukkhaṃ vedananti cha nekkhammasitadomanassavedanā. Sāmisaṃ adukkhamasukhaṃ vedananti cha gehasitaupekkhāvedanā. Nirāmisaṃ adukkhamasukhaṃ vedananti cha nekkhammasitaupekkhāvedanā.
(க³) ஸராக³ங் சித்தந்திஆதீ³னி ஞாணகதா²யங் வுத்தத்தா²னி.
(Ga) sarāgaṃ cittantiādīni ñāṇakathāyaṃ vuttatthāni.
(க⁴) தத³வஸேஸே த⁴ம்மேதி தேஹி காயவேத³னாசித்தேஹி அவஸேஸே தேபூ⁴மகத⁴ம்மே. ஸப்³ப³த்த² தேன ஞாணேனாதி தேன ஸத்தவிதே⁴ன அனுபஸ்ஸனாஞாணேன. யானி பனெத்த² அந்தரந்தரா அவுத்தத்தா²னி, தானி ஹெட்டா² தத்த² தத்த² வுத்தத்தா²னேவாதி.
(Gha) tadavasese dhammeti tehi kāyavedanācittehi avasese tebhūmakadhamme. Sabbattha tena ñāṇenāti tena sattavidhena anupassanāñāṇena. Yāni panettha antarantarā avuttatthāni, tāni heṭṭhā tattha tattha vuttatthānevāti.
ஸதிபட்டா²னகதா²வண்ணனா நிட்டி²தா.
Satipaṭṭhānakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 8. ஸதிபட்டா²னகதா² • 8. Satipaṭṭhānakathā
