2. Sataraṃsittheraapadānaṃ

8.

‘‘Ubbiddhaṃ selamāruyha, nisīdi purisuttamo;

Pabbatassāvidūramhi, brāhmaṇo mantapāragū.

9.

‘‘Upaviṭṭhaṃ mahāvīraṃ, devadevaṃ narāsabhaṃ;

Añjaliṃ paggahetvāna, santhaviṃ lokanāyakaṃ.

10.

‘‘‘Esa buddho mahāvīro, varadhammappakāsako;

Jalati aggikhandhova, bhikkhusaṅghapurakkhato.

11.

‘‘‘Mahāsamuddova‘kkhubbho ², aṇṇavova duruttaro;

Migarājāvasambhīto ⁴, dhammaṃ deseti cakkhumā’.

12.

‘‘Mama saṅkappamaññāya, padumuttaranāyako;

Bhikkhusaṅghe ṭhito satthā, imā gāthā abhāsatha.

13.

‘‘‘Yenāyaṃ ⁶ añjalī dinno, buddhaseṭṭho ca thomito;

Tiṃsakappasahassāni, devarajjaṃ karissati.

14.

‘‘‘Kappasatasahassamhi, aṅgīrasasanāmako;

Vivaṭṭacchado ⁸ sambuddho, uppajjissati tāvade.

15.

‘‘‘Tassa dhammesu dāyādo, oraso dhammanimmito;

Sataraṃsīti nāmena, arahā so bhavissati’.

16.

‘‘Jātiyā sattavassohaṃ, pabbajiṃ anagāriyaṃ;

Sataraṃsimhi nāmena, pabhā niddhāvate mama.

17.

‘‘Maṇḍape rukkhamūle vā, jhāyī jhānarato ahaṃ;

Dhāremi antimaṃ dehaṃ, sammāsambuddhasāsane.

18.

‘‘Saṭṭhikappasahassamhi, caturo rāmanāmakā;

Sattaratanasampannā, cakkavattī mahabbalā.

19.

‘‘Paṭisambhidā catasso…pe… kataṃ buddhassa sāsanaṃ’’.

Itthaṃ sudaṃ āyasmā sataraṃsi thero imā gāthāyo abhāsitthāti.

Sataraṃsittherassāpadānaṃ dutiyaṃ.