| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၆. သတပတ္တင္ဂပဉ္ဟော
6. Satapattaṅgapañho
၆. ‘‘ဘန္တေ နာဂသေန, ‘သတပတ္တသ္သ ဧကံ အင္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, သတပတ္တော ရဝိတ္ဝာ ပရေသံ ခေမံ ဝာ ဘယံ ဝာ အာစိက္ခတိ, ဧဝမေဝ ခော, မဟာရာဇ, ယောဂိနာ ယောဂာဝစရေန ပရေသံ ဓမ္မံ ဒေသယမာနေန ဝိနိပာတံ ဘယတော ဒသ္သယိတဗ္ဗံ, နိဗ္ဗာနံ ခေမတော ဒသ္သယိတဗ္ဗံ။ ဣဒံ, မဟာရာဇ, သတပတ္တသ္သ ဧကံ အင္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ထေရေန ပိဏ္ဍောလဘာရဒ္ဝာဇေန –
6. ‘‘Bhante nāgasena, ‘satapattassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, satapatto ravitvā paresaṃ khemaṃ vā bhayaṃ vā ācikkhati, evameva kho, mahārāja, yoginā yogāvacarena paresaṃ dhammaṃ desayamānena vinipātaṃ bhayato dassayitabbaṃ, nibbānaṃ khemato dassayitabbaṃ. Idaṃ, mahārāja, satapattassa ekaṃ aṅgaṃ gahetabbaṃ. Bhāsitampetaṃ, mahārāja, therena piṇḍolabhāradvājena –
‘‘‘နိရယေ ဘယသန္တာသံ၊ နိဗ္ဗာနေ ဝိပုလံ သုခံ။
‘‘‘Niraye bhayasantāsaṃ, nibbāne vipulaṃ sukhaṃ;
ဥဘယာနေတာနတ္ထာနိ ဒသ္သေတဗ္ဗာနိ ယောဂိနာ’’’တိ။
Ubhayānetānatthāni dassetabbāni yoginā’’’ti.
သတပတ္တင္ဂပဉ္ဟော ဆဋ္ဌော။
Satapattaṅgapañho chaṭṭho.
