| Library / Tipiṭaka / திபிடக • Tipiṭaka / படிஸம்பி⁴தா³மக்³க³பாளி • Paṭisambhidāmaggapāḷi |
5. ஸஸ்ஸததி³ட்டி²னித்³தே³ஸோ
5. Sassatadiṭṭhiniddeso
138. ஸக்காயவத்து²காய ஸஸ்ஸததி³ட்டி²யா கதமேஹி பன்னரஸஹி ஆகாரேஹி அபி⁴னிவேஸோ ஹோதி? இத⁴ அஸ்ஸுதவா புது²ஜ்ஜனோ அரியானங் அத³ஸ்ஸாவீ அரியத⁴ம்மஸ்ஸ அகோவிதோ³ அரியத⁴ம்மே அவினீதோ ஸப்புரிஸானங் அத³ஸ்ஸாவீ ஸப்புரிஸத⁴ம்மஸ்ஸ அகோவிதோ³ ஸப்புரிஸத⁴ம்மே அவினீதோ ரூபவந்தங் வா அத்தானங் அத்தனி வா ரூபங் ரூபஸ்மிங் வா அத்தானங். வேத³னாவந்தங் வா அத்தானங்…பே॰… ஸஞ்ஞாவந்தங் வா அத்தானங்… ஸங்கா²ரவந்தங் வா அத்தானங்… விஞ்ஞாணவந்தங் வா அத்தானங் அத்தனி வா விஞ்ஞாணங் விஞ்ஞாணஸ்மிங் வா அத்தானங்.
138. Sakkāyavatthukāya sassatadiṭṭhiyā katamehi pannarasahi ākārehi abhiniveso hoti? Idha assutavā puthujjano ariyānaṃ adassāvī ariyadhammassa akovido ariyadhamme avinīto sappurisānaṃ adassāvī sappurisadhammassa akovido sappurisadhamme avinīto rūpavantaṃ vā attānaṃ attani vā rūpaṃ rūpasmiṃ vā attānaṃ. Vedanāvantaṃ vā attānaṃ…pe… saññāvantaṃ vā attānaṃ… saṅkhāravantaṃ vā attānaṃ… viññāṇavantaṃ vā attānaṃ attani vā viññāṇaṃ viññāṇasmiṃ vā attānaṃ.
கத²ங் ரூபவந்தங் அத்தானங் ஸமனுபஸ்ஸதி? இதே⁴கச்சோ வேத³னங்… ஸஞ்ஞங்… ஸங்கா²ரே… விஞ்ஞாணங் அத்ததோ ஸமனுபஸ்ஸதி. தஸ்ஸ ஏவங் ஹோதி – ‘‘அயங் கோ² மே அத்தா. ஸோ கோ² பன மே அயங் அத்தா இமினா ரூபேன ரூபவா’’தி. ரூபவந்தங் அத்தானங் ஸமனுபஸ்ஸதி. ஸெய்யதா²பி ருக்கோ² சா²யாஸம்பன்னோ அஸ்ஸ. தமேனங் புரிஸோ ஏவங் வதெ³ய்ய – ‘‘அயங் ருக்கோ², அயங் சா²யா; அஞ்ஞோ ருக்கோ², அஞ்ஞா சா²யா. ஸோ கோ² பனாயங் ருக்கோ² இமாய சா²யாய சா²யாவா’’தி. சா²யாவந்தங் ருக்க²ங் ஸமனுபஸ்ஸதி. ஏவமேவங் இதே⁴கச்சோ வேத³னங்…பே॰… அயங் பட²மா ஸக்காயவத்து²கா ஸஸ்ஸததி³ட்டி². ஸஸ்ஸததி³ட்டி² மிச்சா²தி³ட்டி²…பே॰… இமானி ஸஞ்ஞோஜனானி, ந ச தி³ட்டி²யோ. ஏவங் ரூபவந்தங் அத்தானங் ஸமனுபஸ்ஸதி…பே॰… ஸக்காயவத்து²காய ஸஸ்ஸததி³ட்டி²யா இமேஹி பன்னரஸஹி ஆகாரேஹி அபி⁴னிவேஸோ ஹோதி.
Kathaṃ rūpavantaṃ attānaṃ samanupassati? Idhekacco vedanaṃ… saññaṃ… saṅkhāre… viññāṇaṃ attato samanupassati. Tassa evaṃ hoti – ‘‘ayaṃ kho me attā. So kho pana me ayaṃ attā iminā rūpena rūpavā’’ti. Rūpavantaṃ attānaṃ samanupassati. Seyyathāpi rukkho chāyāsampanno assa. Tamenaṃ puriso evaṃ vadeyya – ‘‘ayaṃ rukkho, ayaṃ chāyā; añño rukkho, aññā chāyā. So kho panāyaṃ rukkho imāya chāyāya chāyāvā’’ti. Chāyāvantaṃ rukkhaṃ samanupassati. Evamevaṃ idhekacco vedanaṃ…pe… ayaṃ paṭhamā sakkāyavatthukā sassatadiṭṭhi. Sassatadiṭṭhi micchādiṭṭhi…pe… imāni saññojanāni, na ca diṭṭhiyo. Evaṃ rūpavantaṃ attānaṃ samanupassati…pe… sakkāyavatthukāya sassatadiṭṭhiyā imehi pannarasahi ākārehi abhiniveso hoti.
ஸஸ்ஸததி³ட்டி²னித்³தே³ஸோ பஞ்சமோ.
Sassatadiṭṭhiniddeso pañcamo.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / கு²த்³த³கனிகாய (அட்ட²கதா²) • Khuddakanikāya (aṭṭhakathā) / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā / 5. ஸஸ்ஸததி³ட்டி²னித்³தே³ஸவண்ணனா • 5. Sassatadiṭṭhiniddesavaṇṇanā
