| Library / Tipiṭaka / ติปิฎก • Tipiṭaka / จริยาปิฎกปาฬิ • Cariyāpiṭakapāḷi |
๑๐. สสปณฺฑิตจริยา
10. Sasapaṇḍitacariyā
๑๒๕.
125.
‘‘ปุนาปรํ ยทา โหมิ, สสโก ปวนจารโก;
‘‘Punāparaṃ yadā homi, sasako pavanacārako;
ติณปณฺณสากผลภโกฺข, ปรเหฐนวิวชฺชิโตฯ
Tiṇapaṇṇasākaphalabhakkho, paraheṭhanavivajjito.
๑๒๖.
126.
‘‘มกฺกโฎ จ สิงฺคาโล จ, สุตฺตโปโต จหํ ตทา;
‘‘Makkaṭo ca siṅgālo ca, suttapoto cahaṃ tadā;
๑๒๗.
127.
‘‘อหํ เต อนุสาสามิ, กิริเย กลฺยาณปาปเก;
‘‘Ahaṃ te anusāsāmi, kiriye kalyāṇapāpake;
‘ปาปานิ ปริวเชฺชถ, กลฺยาเณ อภินิวิสฺสถ’ฯ
‘Pāpāni parivajjetha, kalyāṇe abhinivissatha’.
๑๒๘.
128.
‘‘อุโปสถมฺหิ ทิวเส, จนฺทํ ทิสฺวาน ปูริตํ;
‘‘Uposathamhi divase, candaṃ disvāna pūritaṃ;
เอเตสํ ตตฺถ อาจิกฺขิํ, ทิวโส อชฺชุโปสโถฯ
Etesaṃ tattha ācikkhiṃ, divaso ajjuposatho.
๑๒๙.
129.
‘‘ทานานิ ปฎิยาเทถ, ทกฺขิเณยฺยสฺส ทาตเว;
‘‘Dānāni paṭiyādetha, dakkhiṇeyyassa dātave;
ทตฺวา ทานํ ทกฺขิเณเยฺย, อุปวสฺสถุโปสถํฯ
Datvā dānaṃ dakkhiṇeyye, upavassathuposathaṃ.
๑๓๐.
130.
‘‘เต เม สาธูติ วตฺวาน, ยถาสตฺติ ยถาพลํ;
‘‘Te me sādhūti vatvāna, yathāsatti yathābalaṃ;
๑๓๑.
131.
‘‘อหํ นิสชฺช จิเนฺตสิํ, ทานํ ทกฺขิณนุจฺฉวํ;
‘‘Ahaṃ nisajja cintesiṃ, dānaṃ dakkhiṇanucchavaṃ;
‘ยทิหํ ลเภ ทกฺขิเณยฺยํ, กิํ เม ทานํ ภวิสฺสติฯ
‘Yadihaṃ labhe dakkhiṇeyyaṃ, kiṃ me dānaṃ bhavissati.
๑๓๒.
132.
‘‘‘น เม อตฺถิ ติลา มุคฺคา, มาสา วา ตณฺฑุลา ฆตํ;
‘‘‘Na me atthi tilā muggā, māsā vā taṇḍulā ghataṃ;
อหํ ติเณน ยาเปมิ, น สกฺกา ติณ ทาตเวฯ
Ahaṃ tiṇena yāpemi, na sakkā tiṇa dātave.
๑๓๓.
133.
‘‘‘ยทิ โกจิ เอติ ทกฺขิเณโยฺย, ภิกฺขาย มม สนฺติเก;
‘‘‘Yadi koci eti dakkhiṇeyyo, bhikkhāya mama santike;
ทชฺชาหํ สกมตฺตานํ, น โส ตุโจฺฉ คมิสฺสติ’ฯ
Dajjāhaṃ sakamattānaṃ, na so tuccho gamissati’.
๑๓๔.
134.
‘‘มม สงฺกปฺปมญฺญาย, สโกฺก พฺราหฺมณวณฺณินา;
‘‘Mama saṅkappamaññāya, sakko brāhmaṇavaṇṇinā;
อาสยํ เม อุปาคจฺฉิ, ทานวีมํสนาย เมฯ
Āsayaṃ me upāgacchi, dānavīmaṃsanāya me.
๑๓๕.
135.
‘‘ตมหํ ทิสฺวาน สนฺตุโฎฺฐ, อิทํ วจนมพฺรวิํ;
‘‘Tamahaṃ disvāna santuṭṭho, idaṃ vacanamabraviṃ;
‘สาธุ โขสิ อนุปฺปโตฺต, ฆาสเหตุ มมนฺติเกฯ
‘Sādhu khosi anuppatto, ghāsahetu mamantike.
๑๓๖.
136.
‘‘‘อทินฺนปุพฺพํ ทานวรํ, อชฺช ทสฺสามิ เต อหํ;
‘‘‘Adinnapubbaṃ dānavaraṃ, ajja dassāmi te ahaṃ;
ตุวํ สีลคุณูเปโต, อยุตฺตํ เต ปรเหฐนํฯ
Tuvaṃ sīlaguṇūpeto, ayuttaṃ te paraheṭhanaṃ.
๑๓๗.
137.
‘‘‘เอหิ อคฺคิํ ปทีเปหิ, นานากเฎฺฐ สมานย;
‘‘‘Ehi aggiṃ padīpehi, nānākaṭṭhe samānaya;
อหํ ปจิสฺสมตฺตานํ, ปกฺกํ ตฺวํ ภกฺขยิสฺสสิ’ฯ
Ahaṃ pacissamattānaṃ, pakkaṃ tvaṃ bhakkhayissasi’.
๑๓๘.
138.
‘‘‘สาธู’ติ โส หฎฺฐมโน, นานากเฎฺฐ สมานยิ;
‘‘‘Sādhū’ti so haṭṭhamano, nānākaṭṭhe samānayi;
มหนฺตํ อกาสิ จิตกํ, กตฺวา องฺคารคพฺภกํฯ
Mahantaṃ akāsi citakaṃ, katvā aṅgāragabbhakaṃ.
๑๓๙.
139.
‘‘อคฺคิํ ตตฺถ ปทีเปสิ, ยถา โส ขิปฺปํ มหา ภเว;
‘‘Aggiṃ tattha padīpesi, yathā so khippaṃ mahā bhave;
โผเฎตฺวา รชคเต คเตฺต, เอกมนฺตํ อุปาวิสิํฯ
Phoṭetvā rajagate gatte, ekamantaṃ upāvisiṃ.
๑๔๐.
140.
ตทุปฺปติตฺวา ปปติํ, มเชฺฌ ชาลสิขนฺตเรฯ
Taduppatitvā papatiṃ, majjhe jālasikhantare.
๑๔๑.
141.
‘‘ยถา สีโตทกํ นาม, ปวิฎฺฐํ ยสฺส กสฺสจิ;
‘‘Yathā sītodakaṃ nāma, paviṭṭhaṃ yassa kassaci;
สเมติ ทรถปริฬาหํ, อสฺสาทํ เทติ ปีติ จฯ
Sameti darathapariḷāhaṃ, assādaṃ deti pīti ca.
๑๔๒.
142.
‘‘ตเถว ชลิตํ อคฺคิํ, ปวิฎฺฐสฺส มมํ ตทา;
‘‘Tatheva jalitaṃ aggiṃ, paviṭṭhassa mamaṃ tadā;
สพฺพํ สเมติ ทรถํ, ยถา สีโตทกํ วิยฯ
Sabbaṃ sameti darathaṃ, yathā sītodakaṃ viya.
๑๔๓.
143.
‘‘ฉวิํ จมฺมํ มํสํ นฺหารุํ, อฎฺฐิํ หทยพนฺธนํ;
‘‘Chaviṃ cammaṃ maṃsaṃ nhāruṃ, aṭṭhiṃ hadayabandhanaṃ;
เกวลํ สกลํ กายํ, พฺราหฺมณสฺส อทาสห’’นฺติฯ
Kevalaṃ sakalaṃ kāyaṃ, brāhmaṇassa adāsaha’’nti.
สสปณฺฑิตจริยํ ทสมํฯ
Sasapaṇḍitacariyaṃ dasamaṃ.
อกิตฺติวโคฺค ปฐโมฯ
Akittivaggo paṭhamo.
ตสฺสุทฺทานํ –
Tassuddānaṃ –
อกิตฺติพฺราหฺมโณ สโงฺข, กุรุราชา ธนญฺจโย;
Akittibrāhmaṇo saṅkho, kururājā dhanañcayo;
มหาสุทสฺสโน ราชา, มหาโควินฺทพฺราหฺมโณฯ
Mahāsudassano rājā, mahāgovindabrāhmaṇo.
นิมิ จนฺทกุมาโร จ, สิวิ เวสฺสนฺตโร สโส;
Nimi candakumāro ca, sivi vessantaro saso;
อหเมว ตทา อาสิํ, โย เต ทานวเร อทาฯ
Ahameva tadā āsiṃ, yo te dānavare adā.
เอเต ทานปริกฺขารา, เอเต ทานสฺส ปารมี;
Ete dānaparikkhārā, ete dānassa pāramī;
ชีวิตํ ยาจเก ทตฺวา, อิมํ ปารมิ ปูรยิํฯ
Jīvitaṃ yācake datvā, imaṃ pārami pūrayiṃ.
ภิกฺขาย อุปคตํ ทิสฺวา, สกตฺตานํ ปริจฺจชิํ;
Bhikkhāya upagataṃ disvā, sakattānaṃ pariccajiṃ;
ทาเนน เม สโม นตฺถิ, เอสา เม ทานปารมีติฯ
Dānena me samo natthi, esā me dānapāramīti.
ทานปารมินิเทฺทโส นิฎฺฐิโตฯ
Dānapāraminiddeso niṭṭhito.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / จริยาปิฎก-อฎฺฐกถา • Cariyāpiṭaka-aṭṭhakathā / ๑๐. สสปณฺฑิตจริยาวณฺณนา • 10. Sasapaṇḍitacariyāvaṇṇanā
