| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၂၁. ဧကဝီသတိမဝဂ္ဂော
21. Ekavīsatimavaggo
၁. သာသနကထာဝဏ္ဏနာ
1. Sāsanakathāvaṇṇanā
၈၇၈. ဣဒာနိ သာသနကထာ နာမ ဟောတိ။ တတ္ထ တိသ္သော သင္ဂီတိယော သန္ဓာယ ‘‘သာသနံ နဝံ ကတ’’န္တိ စ ‘‘အတ္ထိ ကောစိ တထာဂတသ္သ သာသနံ နဝံ ကရောတီ’’တိ စ ‘‘လဗ္ဘာ တထာဂတသ္သ သာသနံ နဝံ ကာတု’’န္တိ စ ယေသံ လဒ္ဓိ, သေယ္ယထာပိ ဧကစ္စာနံ ဥတ္တရာပထကာနံ; တေ သန္ဓာယ တီသုပိ ကထာသု ပုစ္ဆာ သကဝာဒိသ္သ, ပဋိညာ ဣတရသ္သ။ သတိပဋ္ဌာနာတိအာဒိ သာသနံ နာမ သတိပဋ္ဌာနာဒယော စေဝ အရိယဓမ္မာ, ကုသလာဒီနဉ္စ ဒေသနာ။ တတ္ထ ယေသံ ဘဂဝတာ ဒေသိတာ သတိပဋ္ဌာနာဒယော, ဌပေတ္ဝာ တေ အညေသံ ဝာ သတိပဋ္ဌာနာဒီနံ ကရဏေန အကုသလာဒီနံ ဝာ ကုသလာဒိဘာဝကရဏေန သာသနံ နဝံကတံ နာမ ဘဝေယ္ယ, ကိံ တံ ဧဝံ ကတံ ကေနစိ, အတ္ထိ ဝာ ကောစိ ဧဝံ ကရောတိ, လဗ္ဘာ ဝာ ဧဝံ ကာတုန္တိ တီသုပိ ပုစ္ဆာသု စောဒနတ္ထံ ဝုတ္တံ။ သေသံ သဗ္ဗတ္ထ ယထာပာဠိမေဝ နိယ္ယာတီတိ။
878. Idāni sāsanakathā nāma hoti. Tattha tisso saṅgītiyo sandhāya ‘‘sāsanaṃ navaṃ kata’’nti ca ‘‘atthi koci tathāgatassa sāsanaṃ navaṃ karotī’’ti ca ‘‘labbhā tathāgatassa sāsanaṃ navaṃ kātu’’nti ca yesaṃ laddhi, seyyathāpi ekaccānaṃ uttarāpathakānaṃ; te sandhāya tīsupi kathāsu pucchā sakavādissa, paṭiññā itarassa. Satipaṭṭhānātiādi sāsanaṃ nāma satipaṭṭhānādayo ceva ariyadhammā, kusalādīnañca desanā. Tattha yesaṃ bhagavatā desitā satipaṭṭhānādayo, ṭhapetvā te aññesaṃ vā satipaṭṭhānādīnaṃ karaṇena akusalādīnaṃ vā kusalādibhāvakaraṇena sāsanaṃ navaṃkataṃ nāma bhaveyya, kiṃ taṃ evaṃ kataṃ kenaci, atthi vā koci evaṃ karoti, labbhā vā evaṃ kātunti tīsupi pucchāsu codanatthaṃ vuttaṃ. Sesaṃ sabbattha yathāpāḷimeva niyyātīti.
သာသနကထာဝဏ္ဏနာ။
Sāsanakathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၂၀၀) ၁. သာသနကထာ • (200) 1. Sāsanakathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၁. သာသနကထာဝဏ္ဏနာ • 1. Sāsanakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၁. သာသနကထာဝဏ္ဏနာ • 1. Sāsanakathāvaṇṇanā
