| Library / Tipiṭaka / ತಿಪಿಟಕ • Tipiṭaka / ಜಾತಕ-ಅಟ್ಠಕಥಾ • Jātaka-aṭṭhakathā |
[೮೮] ೮. ಸಾರಮ್ಭಜಾತಕವಣ್ಣನಾ
[88] 8. Sārambhajātakavaṇṇanā
ಕಲ್ಯಾಣಿಮೇವ ಮುಞ್ಚೇಯ್ಯಾತಿ ಇದಂ ಸತ್ಥಾ ಜೇತವನೇ ವಿಹರನ್ತೋ ಓಮಸವಾದಸಿಕ್ಖಾಪದಂ (ಪಾಚಿ॰ ೧೫) ಆರಬ್ಭ ಕಥೇಸಿ। ದ್ವೇಪಿ ವತ್ಥೂನಿ ಹೇಟ್ಠಾ ನನ್ದಿವಿಸಾಲಜಾತಕೇ ವುತ್ತಸದಿಸಾನೇವ। ಇಮಸ್ಮಿಂ ಪನ ಜಾತಕೇ ಬೋಧಿಸತ್ತೋ ಗನ್ಧಾರರಟ್ಠೇ ತಕ್ಕಸಿಲಾಯಂ ಅಞ್ಞತರಸ್ಸ ಬ್ರಾಹ್ಮಣಸ್ಸ ಸಾರಮ್ಭೋ ನಾಮ ಬಲಿಬದ್ದೋ ಅಹೋಸಿ। ಸತ್ಥಾ ಇದಂ ಅತೀತವತ್ಥುಂ ಕಥೇತ್ವಾ ಅಭಿಸಮ್ಬುದ್ಧೋ ಹುತ್ವಾ ಇಮಂ ಗಾಥಮಾಹ –
Kalyāṇimeva muñceyyāti idaṃ satthā jetavane viharanto omasavādasikkhāpadaṃ (pāci. 15) ārabbha kathesi. Dvepi vatthūni heṭṭhā nandivisālajātake vuttasadisāneva. Imasmiṃ pana jātake bodhisatto gandhāraraṭṭhe takkasilāyaṃ aññatarassa brāhmaṇassa sārambho nāma balibaddo ahosi. Satthā idaṃ atītavatthuṃ kathetvā abhisambuddho hutvā imaṃ gāthamāha –
೮೮.
88.
‘‘ಕಲ್ಯಾಣಿಮೇವ ಮುಞ್ಚೇಯ್ಯ, ನ ಹಿ ಮುಞ್ಚೇಯ್ಯ ಪಾಪಿಕಂ।
‘‘Kalyāṇimeva muñceyya, na hi muñceyya pāpikaṃ;
ಮೋಕ್ಖೋ ಕಲ್ಯಾಣಿಯಾ ಸಾಧು, ಮುತ್ವಾ ತಪ್ಪತಿ ಪಾಪಿಕ’’ನ್ತಿ॥
Mokkho kalyāṇiyā sādhu, mutvā tappati pāpika’’nti.
ತತ್ಥ ಕಲ್ಯಾಣಿಮೇವ ಮುಞ್ಚೇಯ್ಯಾತಿ ಚತುದೋಸವಿನಿಮುತ್ತಂ ಕಲ್ಯಾಣಿಂ ಸುನ್ದರಂ ಅನವಜ್ಜಂ ವಾಚಮೇವ ಮುಞ್ಚೇಯ್ಯ ವಿಸ್ಸಜ್ಜೇಯ್ಯ ಕಥೇಯ್ಯ। ನ ಹಿ ಮುಞ್ಚೇಯ್ಯ ಪಾಪಿಕನ್ತಿ ಪಾಪಿಕಂ ಲಾಮಿಕಂ ಪರೇಸಂ ಅಪ್ಪಿಯಂ ಅಮನಾಪಂ ನ ಮುಞ್ಚೇಯ್ಯ ನ ಕಥೇಯ್ಯ। ಮೋಕ್ಖೋ ಕಲ್ಯಾಣಿಯಾ ಸಾಧೂತಿ ಕಲ್ಯಾಣವಾಚಾಯ ವಿಸ್ಸಜ್ಜನಮೇವ ಇಮಸ್ಮಿಂ ಲೋಕೇ ಸಾಧು ಸುನ್ದರಂ ಭದ್ದಕಂ। ಮುತ್ವಾ ತಪ್ಪತಿ ಪಾಪಿಕನ್ತಿ ಪಾಪಿಕಂ ಫರುಸವಾಚಂ ಮುಞ್ಚಿತ್ವಾ ವಿಸ್ಸಜ್ಜೇತ್ವಾ ಕಥೇತ್ವಾ ಸೋ ಪುಗ್ಗಲೋ ತಪ್ಪತಿ ಸೋಚತಿ ಕಿಲಮತೀತಿ।
Tattha kalyāṇimeva muñceyyāti catudosavinimuttaṃ kalyāṇiṃ sundaraṃ anavajjaṃ vācameva muñceyya vissajjeyya katheyya. Na hi muñceyya pāpikanti pāpikaṃ lāmikaṃ paresaṃ appiyaṃ amanāpaṃ na muñceyya na katheyya. Mokkhokalyāṇiyā sādhūti kalyāṇavācāya vissajjanameva imasmiṃ loke sādhu sundaraṃ bhaddakaṃ. Mutvā tappati pāpikanti pāpikaṃ pharusavācaṃ muñcitvā vissajjetvā kathetvā so puggalo tappati socati kilamatīti.
ಏವಂ ಸತ್ಥಾ ಇಮಂ ಧಮ್ಮದೇಸನಂ ಆಹರಿತ್ವಾ ಜಾತಕಂ ಸಮೋಧಾನೇಸಿ – ‘‘ತದಾ ಬ್ರಾಹ್ಮಣೋ ಆನನ್ದೋ ಅಹೋಸಿ, ಬ್ರಾಹ್ಮಣೀ ಉಪ್ಪಲವಣ್ಣಾ, ಸಾರಮ್ಭೋ ಪನ ಅಹಮೇವ ಅಹೋಸಿ’’ನ್ತಿ।
Evaṃ satthā imaṃ dhammadesanaṃ āharitvā jātakaṃ samodhānesi – ‘‘tadā brāhmaṇo ānando ahosi, brāhmaṇī uppalavaṇṇā, sārambho pana ahameva ahosi’’nti.
ಸಾರಮ್ಭಜಾತಕವಣ್ಣನಾ ಅಟ್ಠಮಾ।
Sārambhajātakavaṇṇanā aṭṭhamā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಜಾತಕಪಾಳಿ • Jātakapāḷi / ೮೮. ಸಾರಮ್ಭಜಾತಕಂ • 88. Sārambhajātakaṃ
