| Library / Tipiṭaka / তিপিটক • Tipiṭaka / মিলিন্দপঞ্হপাল়ি • Milindapañhapāḷi |
৭. সরাগৰীতরাগনানাকরণপঞ্হো
7. Sarāgavītarāganānākaraṇapañho
৭. রাজা আহ ‘‘ভন্তে নাগসেন, কিং নানাকরণং সরাগস্স চ ৰীতরাগস্স চা’’তি? ‘‘একো খো, মহারাজ, অজ্ঝোসিতো, একো অনজ্ঝোসিতো’’তি। ‘‘কিং এতং, ভন্তে, অজ্ঝোসিতো অনজ্ঝোসিতো নামা’’তি? ‘‘একো খো, মহারাজ, অত্থিকো, একো অনত্থিকো’’তি। ‘‘পস্সামহং, ভন্তে, এৰরূপং যো চ সরাগো, যো চ ৰীতরাগো, সব্বোপেসো সোভনং যেৰ ইচ্ছতি খাদনীযং ৰা ভোজনীযং ৰা, ন কোচি পাপকং ইচ্ছতী’’তি। ‘‘অৰীতরাগো খো, মহারাজ, রসপটিসংৰেদী চ রসরাগপটিসংৰেদী চ ভোজনং ভুঞ্জতি, ৰীতরাগো পন রসপটিসংৰেদী ভোজনং ভুঞ্জতি, নো চ খো রসরাগপটিসংৰেদী’’তি।
7. Rājā āha ‘‘bhante nāgasena, kiṃ nānākaraṇaṃ sarāgassa ca vītarāgassa cā’’ti? ‘‘Eko kho, mahārāja, ajjhosito, eko anajjhosito’’ti. ‘‘Kiṃ etaṃ, bhante, ajjhosito anajjhosito nāmā’’ti? ‘‘Eko kho, mahārāja, atthiko, eko anatthiko’’ti. ‘‘Passāmahaṃ, bhante, evarūpaṃ yo ca sarāgo, yo ca vītarāgo, sabbopeso sobhanaṃ yeva icchati khādanīyaṃ vā bhojanīyaṃ vā, na koci pāpakaṃ icchatī’’ti. ‘‘Avītarāgo kho, mahārāja, rasapaṭisaṃvedī ca rasarāgapaṭisaṃvedī ca bhojanaṃ bhuñjati, vītarāgo pana rasapaṭisaṃvedī bhojanaṃ bhuñjati, no ca kho rasarāgapaṭisaṃvedī’’ti.
‘‘কল্লোসি , ভন্তে নাগসেনা’’তি।
‘‘Kallosi , bhante nāgasenā’’ti.
সরাগৰীতরাগনানাকরণপঞ্হো সত্তমো।
Sarāgavītarāganānākaraṇapañho sattamo.
