| Library / Tipiṭaka / ತಿಪಿಟಕ • Tipiṭaka / ಥೇರಗಾಥಾಪಾಳಿ • Theragāthāpāḷi |
೫. ಸರಭಙ್ಗತ್ಥೇರಗಾಥಾ
5. Sarabhaṅgattheragāthā
೪೮೭.
487.
‘‘ಸರೇ ಹತ್ಥೇಹಿ ಭಞ್ಜಿತ್ವಾ, ಕತ್ವಾನ ಕುಟಿಮಚ್ಛಿಸಂ।
‘‘Sare hatthehi bhañjitvā, katvāna kuṭimacchisaṃ;
ತೇನ ಮೇ ಸರಭಙ್ಗೋತಿ, ನಾಮಂ ಸಮ್ಮುತಿಯಾ ಅಹು॥
Tena me sarabhaṅgoti, nāmaṃ sammutiyā ahu.
೪೮೮.
488.
‘‘ನ ಮಯ್ಹಂ ಕಪ್ಪತೇ ಅಜ್ಜ, ಸರೇ ಹತ್ಥೇಹಿ ಭಞ್ಜಿತುಂ।
‘‘Na mayhaṃ kappate ajja, sare hatthehi bhañjituṃ;
ಸಿಕ್ಖಾಪದಾ ನೋ ಪಞ್ಞತ್ತಾ, ಗೋತಮೇನ ಯಸಸ್ಸಿನಾ॥
Sikkhāpadā no paññattā, gotamena yasassinā.
೪೮೯.
489.
‘‘ಸಕಲಂ ಸಮತ್ತಂ ರೋಗಂ, ಸರಭಙ್ಗೋ ನಾದ್ದಸಂ ಪುಬ್ಬೇ।
‘‘Sakalaṃ samattaṃ rogaṃ, sarabhaṅgo nāddasaṃ pubbe;
ಸೋಯಂ ರೋಗೋ ದಿಟ್ಠೋ, ವಚನಕರೇನಾತಿದೇವಸ್ಸ॥
Soyaṃ rogo diṭṭho, vacanakarenātidevassa.
೪೯೦.
490.
‘‘ಯೇನೇವ ಮಗ್ಗೇನ ಗತೋ ವಿಪಸ್ಸೀ, ಯೇನೇವ ಮಗ್ಗೇನ ಸಿಖೀ ಚ ವೇಸ್ಸಭೂ।
‘‘Yeneva maggena gato vipassī, yeneva maggena sikhī ca vessabhū;
ಕಕುಸನ್ಧಕೋಣಾಗಮನೋ ಚ ಕಸ್ಸಪೋ, ತೇನಞ್ಜಸೇನ ಅಗಮಾಸಿ ಗೋತಮೋ॥
Kakusandhakoṇāgamano ca kassapo, tenañjasena agamāsi gotamo.
೪೯೧.
491.
‘‘ವೀತತಣ್ಹಾ ಅನಾದಾನಾ, ಸತ್ತ ಬುದ್ಧಾ ಖಯೋಗಧಾ।
‘‘Vītataṇhā anādānā, satta buddhā khayogadhā;
ಯೇಹಾಯಂ ದೇಸಿತೋ ಧಮ್ಮೋ, ಧಮ್ಮಭೂತೇಹಿ ತಾದಿಭಿ॥
Yehāyaṃ desito dhammo, dhammabhūtehi tādibhi.
೪೯೨.
492.
‘‘ಚತ್ತಾರಿ ಅರಿಯಸಚ್ಚಾನಿ, ಅನುಕಮ್ಪಾಯ ಪಾಣಿನಂ।
‘‘Cattāri ariyasaccāni, anukampāya pāṇinaṃ;
ದುಕ್ಖಂ ಸಮುದಯೋ ಮಗ್ಗೋ, ನಿರೋಧೋ ದುಕ್ಖಸಙ್ಖಯೋ॥
Dukkhaṃ samudayo maggo, nirodho dukkhasaṅkhayo.
೪೯೩.
493.
‘‘ಯಸ್ಮಿಂ ನಿವತ್ತತೇ 1 ದುಕ್ಖಂ, ಸಂಸಾರಸ್ಮಿಂ ಅನನ್ತಕಂ।
‘‘Yasmiṃ nivattate 2 dukkhaṃ, saṃsārasmiṃ anantakaṃ;
ಭೇದಾ ಇಮಸ್ಸ ಕಾಯಸ್ಸ, ಜೀವಿತಸ್ಸ ಚ ಸಙ್ಖಯಾ।
Bhedā imassa kāyassa, jīvitassa ca saṅkhayā;
ಅಞ್ಞೋ ಪುನಬ್ಭವೋ ನತ್ಥಿ, ಸುವಿಮುತ್ತೋಮ್ಹಿ ಸಬ್ಬಧೀ’’ತಿ॥
Añño punabbhavo natthi, suvimuttomhi sabbadhī’’ti.
… ಸರಭಙ್ಗೋ ಥೇರೋ…।
… Sarabhaṅgo thero….
ಸತ್ತಕನಿಪಾತೋ ನಿಟ್ಠಿತೋ।
Sattakanipāto niṭṭhito.
ತತ್ರುದ್ದಾನಂ –
Tatruddānaṃ –
ಸುನ್ದರಸಮುದ್ದೋ ಥೇರೋ, ಥೇರೋ ಲಕುಣ್ಡಭದ್ದಿಯೋ।
Sundarasamuddo thero, thero lakuṇḍabhaddiyo;
ಭದ್ದೋ ಥೇರೋ ಚ ಸೋಪಾಕೋ, ಸರಭಙ್ಗೋ ಮಹಾಇಸಿ।
Bhaddo thero ca sopāko, sarabhaṅgo mahāisi;
ಸತ್ತಕೇ ಪಞ್ಚಕಾ ಥೇರಾ, ಗಾಥಾಯೋ ಪಞ್ಚತಿಂಸತೀತಿ॥
Sattake pañcakā therā, gāthāyo pañcatiṃsatīti.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಥೇರಗಾಥಾ-ಅಟ್ಠಕಥಾ • Theragāthā-aṭṭhakathā / ೫. ಸರಭಙ್ಗತ್ಥೇರಗಾಥಾವಣ್ಣನಾ • 5. Sarabhaṅgattheragāthāvaṇṇanā
