| Library / Tipiṭaka / ติปิฎก • Tipiṭaka / เถรคาถาปาฬิ • Theragāthāpāḷi |
๕. สรภงฺคเตฺถรคาถา
5. Sarabhaṅgattheragāthā
๔๘๗.
487.
‘‘สเร หเตฺถหิ ภญฺชิตฺวา, กตฺวาน กุฎิมจฺฉิสํ;
‘‘Sare hatthehi bhañjitvā, katvāna kuṭimacchisaṃ;
เตน เม สรภโงฺคติ, นามํ สมฺมุติยา อหุฯ
Tena me sarabhaṅgoti, nāmaṃ sammutiyā ahu.
๔๘๘.
488.
‘‘น มยฺหํ กปฺปเต อชฺช, สเร หเตฺถหิ ภญฺชิตุํ;
‘‘Na mayhaṃ kappate ajja, sare hatthehi bhañjituṃ;
สิกฺขาปทา โน ปญฺญตฺตา, โคตเมน ยสสฺสินาฯ
Sikkhāpadā no paññattā, gotamena yasassinā.
๔๘๙.
489.
‘‘สกลํ สมตฺตํ โรคํ, สรภโงฺค นาทฺทสํ ปุเพฺพ;
‘‘Sakalaṃ samattaṃ rogaṃ, sarabhaṅgo nāddasaṃ pubbe;
โสยํ โรโค ทิโฎฺฐ, วจนกเรนาติเทวสฺสฯ
Soyaṃ rogo diṭṭho, vacanakarenātidevassa.
๔๙๐.
490.
‘‘เยเนว มเคฺคน คโต วิปสฺสี, เยเนว มเคฺคน สิขี จ เวสฺสภู;
‘‘Yeneva maggena gato vipassī, yeneva maggena sikhī ca vessabhū;
กกุสนฺธโกณาคมโน จ กสฺสโป, เตนญฺชเสน อคมาสิ โคตโมฯ
Kakusandhakoṇāgamano ca kassapo, tenañjasena agamāsi gotamo.
๔๙๑.
491.
‘‘วีตตณฺหา อนาทานา, สตฺต พุทฺธา ขโยคธา;
‘‘Vītataṇhā anādānā, satta buddhā khayogadhā;
เยหายํ เทสิโต ธโมฺม, ธมฺมภูเตหิ ตาทิภิฯ
Yehāyaṃ desito dhammo, dhammabhūtehi tādibhi.
๔๙๒.
492.
‘‘จตฺตาริ อริยสจฺจานิ, อนุกมฺปาย ปาณินํ;
‘‘Cattāri ariyasaccāni, anukampāya pāṇinaṃ;
ทุกฺขํ สมุทโย มโคฺค, นิโรโธ ทุกฺขสงฺขโยฯ
Dukkhaṃ samudayo maggo, nirodho dukkhasaṅkhayo.
๔๙๓.
493.
‘‘ยสฺมิํ นิวตฺตเต 1 ทุกฺขํ, สํสารสฺมิํ อนนฺตกํ;
‘‘Yasmiṃ nivattate 2 dukkhaṃ, saṃsārasmiṃ anantakaṃ;
เภทา อิมสฺส กายสฺส, ชีวิตสฺส จ สงฺขยา;
Bhedā imassa kāyassa, jīvitassa ca saṅkhayā;
อโญฺญ ปุนพฺภโว นตฺถิ, สุวิมุโตฺตมฺหิ สพฺพธี’’ติฯ
Añño punabbhavo natthi, suvimuttomhi sabbadhī’’ti.
… สรภโงฺค เถโร…ฯ
… Sarabhaṅgo thero….
สตฺตกนิปาโต นิฎฺฐิโตฯ
Sattakanipāto niṭṭhito.
ตตฺรุทฺทานํ –
Tatruddānaṃ –
สุนฺทรสมุโทฺท เถโร, เถโร ลกุณฺฑภทฺทิโย;
Sundarasamuddo thero, thero lakuṇḍabhaddiyo;
ภโทฺท เถโร จ โสปาโก, สรภโงฺค มหาอิสิ;
Bhaddo thero ca sopāko, sarabhaṅgo mahāisi;
สตฺตเก ปญฺจกา เถรา, คาถาโย ปญฺจติํสตีติฯ
Sattake pañcakā therā, gāthāyo pañcatiṃsatīti.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / เถรคาถา-อฎฺฐกถา • Theragāthā-aṭṭhakathā / ๕. สรภงฺคเตฺถรคาถาวณฺณนา • 5. Sarabhaṅgattheragāthāvaṇṇanā
