| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
২. সপ্পুরিসসুত্তং
2. Sappurisasuttaṃ
৪২. ‘‘সপ্পুরিসো, ভিক্খৰে, কুলে জাযমানো বহুনো জনস্স অত্থায হিতায সুখায হোতি; মাতাপিতূনং 1 অত্থায হিতায সুখায হোতি; পুত্তদারস্স অত্থায হিতায সুখায হোতি; দাসকম্মকরপোরিসস্স অত্থায হিতায সুখায হোতি; মিত্তামচ্চানং অত্থায হিতায সুখায হোতি; সমণব্রাহ্মণানং অত্থায হিতায সুখায হোতি।
42. ‘‘Sappuriso, bhikkhave, kule jāyamāno bahuno janassa atthāya hitāya sukhāya hoti; mātāpitūnaṃ 2 atthāya hitāya sukhāya hoti; puttadārassa atthāya hitāya sukhāya hoti; dāsakammakaraporisassa atthāya hitāya sukhāya hoti; mittāmaccānaṃ atthāya hitāya sukhāya hoti; samaṇabrāhmaṇānaṃ atthāya hitāya sukhāya hoti.
‘‘সেয্যথাপি, ভিক্খৰে, মহামেঘো সব্বসস্সানি সম্পাদেন্তো বহুনো জনস্স অত্থায হিতায সুখায হোতি; এৰমেৰং খো, ভিক্খৰে, সপ্পুরিসো কুলে জাযমানো বহুনো জনস্স অত্থায হিতায সুখায হোতি; মাতাপিতূনং অত্থায হিতায সুখায হোতি; পুত্তদারস্স অত্থায হিতায সুখায হোতি; দাসকম্মকরপোরিসস্স অত্থায হিতায সুখায হোতি; মিত্তামচ্চানং অত্থায হিতায সুখায হোতি; সমণব্রাহ্মণানং অত্থায হিতায সুখায হোতী’’তি।
‘‘Seyyathāpi, bhikkhave, mahāmegho sabbasassāni sampādento bahuno janassa atthāya hitāya sukhāya hoti; evamevaṃ kho, bhikkhave, sappuriso kule jāyamāno bahuno janassa atthāya hitāya sukhāya hoti; mātāpitūnaṃ atthāya hitāya sukhāya hoti; puttadārassa atthāya hitāya sukhāya hoti; dāsakammakaraporisassa atthāya hitāya sukhāya hoti; mittāmaccānaṃ atthāya hitāya sukhāya hoti; samaṇabrāhmaṇānaṃ atthāya hitāya sukhāya hotī’’ti.
‘‘হিতো বহুন্নং পটিপজ্জ ভোগে, তং দেৰতা রক্খতি ধম্মগুত্তং।
‘‘Hito bahunnaṃ paṭipajja bhoge, taṃ devatā rakkhati dhammaguttaṃ;
বহুস্সুতং সীলৰতূপপন্নং, ধম্মে ঠিতং ন ৰিজহতি 3 কিত্তি॥
Bahussutaṃ sīlavatūpapannaṃ, dhamme ṭhitaṃ na vijahati 4 kitti.
‘‘ধম্মট্ঠং সীলসম্পন্নং, সচ্চৰাদিং হিরীমনং।
‘‘Dhammaṭṭhaṃ sīlasampannaṃ, saccavādiṃ hirīmanaṃ;
নেক্খং জম্বোনদস্সেৰ, কো তং নিন্দিতুমরহতি।
Nekkhaṃ jambonadasseva, ko taṃ ninditumarahati;
দেৰাপি নং পসংসন্তি, ব্রহ্মুনাপি পসংসিতো’’তি॥ দুতিযং।
Devāpi naṃ pasaṃsanti, brahmunāpi pasaṃsito’’ti. dutiyaṃ;
Footnotes:
Related texts:
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-২. আদিযসুত্তাদিৰণ্ণনা • 1-2. Ādiyasuttādivaṇṇanā
