| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၁၀. သပ္ပာဏကသိက္ခာပဒဝဏ္ဏနာ
10. Sappāṇakasikkhāpadavaṇṇanā
ဧကသ္မိံ ဃဋေ ဧကာဝ အာပတ္တီတိ ဧကသ္မိံ ဥဒကဃဋေ ဧကာဝ အာပတ္တိ။ ဧသ နယော သဗ္ဗဘာဇနေသု ။ ဝိစ္ဆိန္ဒန္တသ္သာတိ ဓာရံ ဝိစ္ဆိန္ဒန္တသ္သ။ ဧကေကံ ပက္ခိပန္တသ္သာတိ ဧကေကံ တိဏံ ဝာ ပဏ္ဏံ ဝာ မတ္တိကံ ဝာ အညံ ဝာ ကဋ္ဌဂောမယာဒိံ ပက္ခိပန္တသ္သ။ ပရိယာဒာနန္တိ ခယံ။
Ekasmiṃ ghaṭe ekāva āpattīti ekasmiṃ udakaghaṭe ekāva āpatti. Esa nayo sabbabhājanesu . Vicchindantassāti dhāraṃ vicchindantassa. Ekekaṃ pakkhipantassāti ekekaṃ tiṇaṃ vā paṇṇaṃ vā mattikaṃ vā aññaṃ vā kaṭṭhagomayādiṃ pakkhipantassa. Pariyādānanti khayaṃ.
‘‘ပဒီပေ (သာရတ္ထ. ဋီ. ပာစိတ္တိယ ၃.၁၄၀) ပတိတ္ဝာ ပဋင္ဂာဒိပာဏကာ မရိသ္သန္တီ’’တိ ဇာနန္တသ္သာပိ ကုသလစိတ္တေန ပဒီပုဇ္ဇလနံ ဝိယ ‘‘သိဉ္စနေန ပာဏကာ မရိသ္သန္တီ’’တိ ပုဗ္ဗဘာဂေ ဇာနန္တသ္သာပိ ‘‘ဣဒံ ဇလံ သိဉ္စာမီ’’တိ သိဉ္စန္တသ္သ ဝဓကစိတ္တံ န ဟောတီတိ အာဟ ‘‘ဝိနာ ဝဓကစေတနာယာ’’တိအာဒိ။ ဧဝဉ္စ ကတ္ဝာ ‘‘ပဏ္ဏတ္တိဝဇ္ဇ’’န္တိ ဣဒမ္ပိ သမတ္ထိတံ ဟောတိ။ တိစိတ္တန္တိ ကုသလာကုသလာဗ္ယာကတဝသေန တိစိတ္တံ။ တထာ ဟိ ပဏ္ဏတ္တိံ မဒ္ဒိတ္ဝာ သိဉ္စန္တသ္သ ဝာ သိဉ္စာပေန္တသ္သ ဝာ အကုသလစိတ္တေန ဟောတိ, ‘‘အာသနံ ဓောဝိသ္သာမီ’’တိ စိတ္တေန ဓောဝနတ္ထံ သိဉ္စန္တသ္သ ဝာ သိဉ္စာပေန္တသ္သ ဝာ ကုသလစိတ္တေန ဟောတိ, ပဏ္ဏတ္တိံ အဇာနတာ အရဟတာ သိဉ္စနာဒိကရဏေ အဗ္ယာကတစိတ္တေန ဟောတီတိ ကုသလာကုသလာဗ္ယာကတစိတ္တဝသေန တိစိတ္တံ ဟောတိ။
‘‘Padīpe (sārattha. ṭī. pācittiya 3.140) patitvā paṭaṅgādipāṇakā marissantī’’ti jānantassāpi kusalacittena padīpujjalanaṃ viya ‘‘siñcanena pāṇakā marissantī’’ti pubbabhāge jānantassāpi ‘‘idaṃ jalaṃ siñcāmī’’ti siñcantassa vadhakacittaṃ na hotīti āha ‘‘vinā vadhakacetanāyā’’tiādi. Evañca katvā ‘‘paṇṇattivajja’’nti idampi samatthitaṃ hoti. Ticittanti kusalākusalābyākatavasena ticittaṃ. Tathā hi paṇṇattiṃ madditvā siñcantassa vā siñcāpentassa vā akusalacittena hoti, ‘‘āsanaṃ dhovissāmī’’ti cittena dhovanatthaṃ siñcantassa vā siñcāpentassa vā kusalacittena hoti, paṇṇattiṃ ajānatā arahatā siñcanādikaraṇe abyākatacittena hotīti kusalākusalābyākatacittavasena ticittaṃ hoti.
သပ္ပာဏကသိက္ခာပဒဝဏ္ဏနာ နိဋ္ဌိတာ။
Sappāṇakasikkhāpadavaṇṇanā niṭṭhitā.
ဘူတဂာမဝဂ္ဂော ဒုတိယော။
Bhūtagāmavaggo dutiyo.
