| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၇. သန္တုဋ္ဌိသုတ္တဝဏ္ဏနာ
7. Santuṭṭhisuttavaṇṇanā
၂၇. သတ္တမေ အပ္ပာနီတိ ပရိတ္တာနိ။ သုလဘာနီတိ သုခေန လဒ္ဓဗ္ဗာနိ, ယတ္ထ ကတ္ထစိ သက္ကာ ဟောန္တိ လဘိတုံ။ အနဝဇ္ဇာနီတိ နိဒ္ဒောသာနိ။ ပိဏ္ဍိယာလောပဘောဇနန္တိ ဇင္ဃာပိဏ္ဍိယဗလေန စရိတ္ဝာ အာလောပမတ္တံ လဒ္ဓံ ဘောဇနံ။ ပူတိမုတ္တန္တိ ယံကိဉ္စိ မုတ္တံ။ ယထာ ဟိ သုဝဏ္ဏဝဏ္ဏောပိ ကာယော ပူတိကာယောတိ ဝုစ္စတိ, ဧဝံ အဘိနဝမ္ပိ မုတ္တံ ပူတိမုတ္တမေဝ။
27. Sattame appānīti parittāni. Sulabhānīti sukhena laddhabbāni, yattha katthaci sakkā honti labhituṃ. Anavajjānīti niddosāni. Piṇḍiyālopabhojananti jaṅghāpiṇḍiyabalena caritvā ālopamattaṃ laddhaṃ bhojanaṃ. Pūtimuttanti yaṃkiñci muttaṃ. Yathā hi suvaṇṇavaṇṇopi kāyo pūtikāyoti vuccati, evaṃ abhinavampi muttaṃ pūtimuttameva.
ဝိဃာတောတိ ဝိဂတဃာတော, စိတ္တသ္သ ဒုက္ခံ န ဟောတီတိ အတ္ထော။ ဒိသာ နပ္ပဋိဟညတီတိ ယသ္သ ဟိ ‘‘အသုကဋ္ဌာနံ နာမ ဂတော စီဝရာဒီနိ လဘိသ္သာမီ’’တိ စိတ္တံ ဥပ္ပဇ္ဇတိ, တသ္သ ဒိသာ ပဋိဟညတိ နာမ။ ယသ္သ ဧဝံ န ဥပ္ပဇ္ဇတိ, တသ္သ နပ္ပဋိဟညတိ နာမ။ ဓမ္မာတိ ပဋိပတ္တိဓမ္မာ။ သာမညသ္သာနုလောမိကာတိ သမဏဓမ္မသ္သ အနုလောမာ။ အဓိဂ္ဂဟိတာတိ သဗ္ဗေတေ တုဋ္ဌစိတ္တသ္သ ဘိက္ခုနော အဓိဂ္ဂဟိတာ ဟောန္တိ အန္တောဂတာ န ပရိဗာဟိရာတိ။
Vighātoti vigataghāto, cittassa dukkhaṃ na hotīti attho. Disānappaṭihaññatīti yassa hi ‘‘asukaṭṭhānaṃ nāma gato cīvarādīni labhissāmī’’ti cittaṃ uppajjati, tassa disā paṭihaññati nāma. Yassa evaṃ na uppajjati, tassa nappaṭihaññati nāma. Dhammāti paṭipattidhammā. Sāmaññassānulomikāti samaṇadhammassa anulomā. Adhiggahitāti sabbete tuṭṭhacittassa bhikkhuno adhiggahitā honti antogatā na paribāhirāti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၇. သန္တုဋ္ဌိသုတ္တံ • 7. Santuṭṭhisuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၇. သန္တုဋ္ဌိသုတ္တဝဏ္ဏနာ • 7. Santuṭṭhisuttavaṇṇanā
