| Library / Tipiṭaka / તિપિટક • Tipiṭaka / ખુદ્દસિક્ખા-મૂલસિક્ખા • Khuddasikkhā-mūlasikkhā |
૪૮. સન્તોસનિદ્દેસવણ્ણના
48. Santosaniddesavaṇṇanā
૪૫૯. ‘‘ચત્તારિમાનિ , ભિક્ખવે, અપ્પાનિ ચેવ સુલભાનિ ચ, તાનિ ચ અનવજ્જાનિ. કતમાનિ ચત્તારિ? પંસુકૂલં, ભિક્ખવે, ચીવરાનં અપ્પઞ્ચ સુલભઞ્ચ, તઞ્ચ અનવજ્જં. પિણ્ડિયાલોપો, ભિક્ખવે, ભોજનાનં અપ્પઞ્ચ સુલભઞ્ચ, તઞ્ચ અનવજ્જં. રુક્ખમૂલં , ભિક્ખવે, સેનાસનાનં અપ્પઞ્ચ સુલભઞ્ચ, તઞ્ચ અનવજ્જં. પૂતિમુત્તભેસજ્જં, ભિક્ખવે, ભેસજ્જાનં અપ્પઞ્ચ સુલભઞ્ચ, તઞ્ચ અનવજ્જં. ઇમાનિ ખો, ભિક્ખવે, ચત્તારિ અપ્પાનિ ચેવ સુલભાનિ ચ, તાનિ ચ અનવજ્જાની’’તિ (અ॰ નિ॰ ૪.૨૭; ઇતિવુ॰ ૧૦૧) વચનતો ‘‘અપ્પેના’’તિઆદિ વુત્તં.
459. ‘‘Cattārimāni , bhikkhave, appāni ceva sulabhāni ca, tāni ca anavajjāni. Katamāni cattāri? Paṃsukūlaṃ, bhikkhave, cīvarānaṃ appañca sulabhañca, tañca anavajjaṃ. Piṇḍiyālopo, bhikkhave, bhojanānaṃ appañca sulabhañca, tañca anavajjaṃ. Rukkhamūlaṃ , bhikkhave, senāsanānaṃ appañca sulabhañca, tañca anavajjaṃ. Pūtimuttabhesajjaṃ, bhikkhave, bhesajjānaṃ appañca sulabhañca, tañca anavajjaṃ. Imāni kho, bhikkhave, cattāri appāni ceva sulabhāni ca, tāni ca anavajjānī’’ti (a. ni. 4.27; itivu. 101) vacanato ‘‘appenā’’tiādi vuttaṃ.
સન્તુટ્ઠોતિ એત્થ યથાલાભયથાબલયથાસારુપ્પસન્તોસાનં વસેન એકેકસ્મિં પચ્ચયે તયો તયો કત્વા ચતૂસુ પચ્ચયેસુ દ્વાદસ સન્તોસા હોન્તિ. મત્તઞ્ઞૂતિ એત્થ (મ॰ નિ॰ અટ્ઠ॰ ૧.૪૨૨; સં॰ નિ॰ અટ્ઠ॰ ૩.૪.૨૩૯; અ॰ નિ॰ અટ્ઠ॰ ૨.૩.૧૬; ઇતિવુ॰ અટ્ઠ॰ ૨૮; ધ॰ સ॰ અટ્ઠ॰ ૧૨૪-૧૩૪) ચત્તારો મત્તા પરિયેસનમત્તા પટિગ્ગહણમત્તા પરિભોગમત્તા વિસ્સજ્જનમત્તાતિ. ઇતરીતરેન યાપેન્તો સુભરો નામ. સન્તોસવિનિચ્છયો.
Santuṭṭhoti ettha yathālābhayathābalayathāsāruppasantosānaṃ vasena ekekasmiṃ paccaye tayo tayo katvā catūsu paccayesu dvādasa santosā honti. Mattaññūti ettha (ma. ni. aṭṭha. 1.422; saṃ. ni. aṭṭha. 3.4.239; a. ni. aṭṭha. 2.3.16; itivu. aṭṭha. 28; dha. sa. aṭṭha. 124-134) cattāro mattā pariyesanamattā paṭiggahaṇamattā paribhogamattā vissajjanamattāti. Itarītarena yāpento subharo nāma. Santosavinicchayo.
સન્તોસનિદ્દેસવણ્ણના નિટ્ઠિતા.
Santosaniddesavaṇṇanā niṭṭhitā.
