| Library / Tipiṭaka / តិបិដក • Tipiṭaka / បដិសម្ភិទាមគ្គ-អដ្ឋកថា • Paṭisambhidāmagga-aṭṭhakathā |
១០-១២. សញ្ញោជនិកាទិទិដ្ឋិនិទ្ទេសវណ្ណនា
10-12. Saññojanikādidiṭṭhiniddesavaṇṇanā
១៤៣. យស្មា សញ្ញោជនិកា ទិដ្ឋិ សព្ពទិដ្ឋិសាធារណា, តស្មា តស្សា សព្ពទិដ្ឋិសញ្ញោជនត្តា សព្ពទិដ្ឋិសាធារណោ អត្ថោ និទ្ទិដ្ឋោ។ សោ ហេដ្ឋា វុត្តទិដ្ឋិបរិយុដ្ឋានានេវ។
143. Yasmā saññojanikā diṭṭhi sabbadiṭṭhisādhāraṇā, tasmā tassā sabbadiṭṭhisaññojanattā sabbadiṭṭhisādhāraṇo attho niddiṭṭho. So heṭṭhā vuttadiṭṭhipariyuṭṭhānāneva.
១៤៤. មានវិនិពន្ធទិដ្ឋីសុ ចក្ខុ អហន្តិ អភិនិវេសបរាមាសោតិ មានបុព្ពកោ អភិនិវេសបរាមាសោ។ ន ហិ ទិដ្ឋិ មានសម្បយុត្តា ហោតិ។ តេនេវ ច មានវិនិពន្ធាតិ វុត្តំ, មានបដិពន្ធា មានមូលកាតិ អត្ថោ។
144. Mānavinibandhadiṭṭhīsu cakkhu ahanti abhinivesaparāmāsoti mānapubbako abhinivesaparāmāso. Na hi diṭṭhi mānasampayuttā hoti. Teneva ca mānavinibandhāti vuttaṃ, mānapaṭibandhā mānamūlakāti attho.
១៤៥. ចក្ខុ មមន្តិ អភិនិវេសបរាមាសោតិ ឯត្ថាបិ ឯសេវ នយោ។ ឯត្ថ បន ‘‘មមា’’តិ វត្តព្ពេ ‘‘មម’’ន្តិ អនុនាសិកាគមោ វេទិតព្ពោ។ ‘‘អហ’’ន្តិ មានវិនិពន្ធាយ រូបាទីនិបិ អជ្ឈត្តិកានេវ។ ន ហិ កសិណរូបំ វិនា ពាហិរានិ ‘‘អហ’’ន្តិ គណ្ហាតិ។ ‘‘មម’’ន្តិ មានវិនិពន្ធាយ បន ពាហិរានិបិ លព្ភន្តិ។ ពាហិរានិបិ ហិ ‘‘មម’’ន្តិ គណ្ហាតិ។ យស្មា បន ទុក្ខា វេទនា អនិដ្ឋត្តា មានវត្ថុ ន ហោតិ, តស្មា ឆ វេទនា តាសំ មូលបច្ចយា ឆ ផស្សា ច ន គហិតា។ សញ្ញាទយោ បន ឥធ បច្ឆិន្នត្តា ន គហិតាតិ វេទិតព្ពា។
145.Cakkhu mamanti abhinivesaparāmāsoti etthāpi eseva nayo. Ettha pana ‘‘mamā’’ti vattabbe ‘‘mama’’nti anunāsikāgamo veditabbo. ‘‘Aha’’nti mānavinibandhāya rūpādīnipi ajjhattikāneva. Na hi kasiṇarūpaṃ vinā bāhirāni ‘‘aha’’nti gaṇhāti. ‘‘Mama’’nti mānavinibandhāya pana bāhirānipi labbhanti. Bāhirānipi hi ‘‘mama’’nti gaṇhāti. Yasmā pana dukkhā vedanā aniṭṭhattā mānavatthu na hoti, tasmā cha vedanā tāsaṃ mūlapaccayā cha phassā ca na gahitā. Saññādayo pana idha pacchinnattā na gahitāti veditabbā.
សំយោជនិកាទិទិដ្ឋិនិទ្ទេសវណ្ណនា និដ្ឋិតា។
Saṃyojanikādidiṭṭhiniddesavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / ខុទ្ទកនិកាយ • Khuddakanikāya / បដិសម្ភិទាមគ្គបាឡិ • Paṭisambhidāmaggapāḷi / ១០-១២. សញ្ញោជនិកាទិទិដ្ឋិនិទ្ទេសោ • 10-12. Saññojanikādidiṭṭhiniddeso
