| Library / Tipiṭaka / തിപിടക • Tipiṭaka / മിലിന്ദപഞ്ഹപാളി • Milindapañhapāḷi |
൧൦. സഞ്ഞാലക്ഖണപഞ്ഹോ
10. Saññālakkhaṇapañho
൧൦. ‘‘ഭന്തേ നാഗസേന, കിംലക്ഖണാ സഞ്ഞാ’’തി? ‘‘സഞ്ജാനനലക്ഖണാ, മഹാരാജ, സഞ്ഞാ. കിം സഞ്ജാനാതി? നീലമ്പി സഞ്ജാനാതി, പീതമ്പി സഞ്ജാനാതി, ലോഹിതമ്പി സഞ്ജാനാതി, ഓദാതമ്പി സഞ്ജാനാതി, മഞ്ജിട്ഠമ്പി 1 സഞ്ജാനാതി. ഏവം ഖോ, മഹാരാജ, സഞ്ജാനനലക്ഖണാ സഞ്ഞാ’’തി.
10. ‘‘Bhante nāgasena, kiṃlakkhaṇā saññā’’ti? ‘‘Sañjānanalakkhaṇā, mahārāja, saññā. Kiṃ sañjānāti? Nīlampi sañjānāti, pītampi sañjānāti, lohitampi sañjānāti, odātampi sañjānāti, mañjiṭṭhampi 2 sañjānāti. Evaṃ kho, mahārāja, sañjānanalakkhaṇā saññā’’ti.
‘‘ഓപമ്മം കരോഹീ’’തി. ‘‘യഥാ, മഹാരാജ, രഞ്ഞോ ഭണ്ഡാഗാരികോ ഭണ്ഡാഗാരം പവിസിത്വാ നീലപീതലോഹിതോദാതമഞ്ജിട്ഠാനി 3 രാജഭോഗാനി രൂപാനി പസ്സിത്വാ സഞ്ജാനാതി. ഏവം ഖോ, മഹാരാജ, സഞ്ജാനനലക്ഖണാ സഞ്ഞാ’’തി.
‘‘Opammaṃ karohī’’ti. ‘‘Yathā, mahārāja, rañño bhaṇḍāgāriko bhaṇḍāgāraṃ pavisitvā nīlapītalohitodātamañjiṭṭhāni 4 rājabhogāni rūpāni passitvā sañjānāti. Evaṃ kho, mahārāja, sañjānanalakkhaṇā saññā’’ti.
‘‘കല്ലോസി, ഭന്തേ നാഗസേനാ’’തി.
‘‘Kallosi, bhante nāgasenā’’ti.
സഞ്ഞാലക്ഖണപഞ്ഹോ ദസമോ.
Saññālakkhaṇapañho dasamo.
Footnotes:
