| Library / Tipiṭaka / តិបិដក • Tipiṭaka / មិលិន្ទបញ្ហបាឡិ • Milindapañhapāḷi |
១០. សញ្ញាលក្ខណបញ្ហោ
10. Saññālakkhaṇapañho
១០. ‘‘ភន្តេ នាគសេន, កិំលក្ខណា សញ្ញា’’តិ? ‘‘សញ្ជាននលក្ខណា, មហារាជ, សញ្ញា។ កិំ សញ្ជានាតិ? នីលម្បិ សញ្ជានាតិ, បីតម្បិ សញ្ជានាតិ, លោហិតម្បិ សញ្ជានាតិ, ឱទាតម្បិ សញ្ជានាតិ, មញ្ជិដ្ឋម្បិ 1 សញ្ជានាតិ។ ឯវំ ខោ, មហារាជ, សញ្ជាននលក្ខណា សញ្ញា’’តិ។
10. ‘‘Bhante nāgasena, kiṃlakkhaṇā saññā’’ti? ‘‘Sañjānanalakkhaṇā, mahārāja, saññā. Kiṃ sañjānāti? Nīlampi sañjānāti, pītampi sañjānāti, lohitampi sañjānāti, odātampi sañjānāti, mañjiṭṭhampi 2 sañjānāti. Evaṃ kho, mahārāja, sañjānanalakkhaṇā saññā’’ti.
‘‘ឱបម្មំ ករោហី’’តិ។ ‘‘យថា, មហារាជ, រញ្ញោ ភណ្ឌាគារិកោ ភណ្ឌាគារំ បវិសិត្វា នីលបីតលោហិតោទាតមញ្ជិដ្ឋានិ 3 រាជភោគានិ រូបានិ បស្សិត្វា សញ្ជានាតិ។ ឯវំ ខោ, មហារាជ, សញ្ជាននលក្ខណា សញ្ញា’’តិ។
‘‘Opammaṃ karohī’’ti. ‘‘Yathā, mahārāja, rañño bhaṇḍāgāriko bhaṇḍāgāraṃ pavisitvā nīlapītalohitodātamañjiṭṭhāni 4 rājabhogāni rūpāni passitvā sañjānāti. Evaṃ kho, mahārāja, sañjānanalakkhaṇā saññā’’ti.
‘‘កល្លោសិ, ភន្តេ នាគសេនា’’តិ។
‘‘Kallosi, bhante nāgasenā’’ti.
សញ្ញាលក្ខណបញ្ហោ ទសមោ។
Saññālakkhaṇapañho dasamo.
Footnotes:
